Հայ-Ամերիկեան Թանգարանի Մեկնարկի Պաշտօնական Ճաշկերոյթը

Կլենտէյլի մէջ կառուցուելիք Հայ-Ամերիկեան թանգարանի ծրագիրին գործնական մեկնարկը նշող պաշտօնական ճաշկերոյթ-ընդունելութիւնը տեղի ունեցաւ Կիրակի, 9 Դեկտեմբեր 2018-ի երեկոյեան, Լոս Անճելըսի «Տոլպի» սրահին մէջ, մասնակցութեամբ հոգեւոր առաջնորդներու, պետական պաշտօնատարներու, գաղութի ներկայացուցչական դէմքերու եւ բարերարներու։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ներկայ եղաւ ձեռնարկին, ընկերակցութեամբ Առաջնորդական փոխանորդ Գերշ. Տ. Թորգոմ Եպս. Տօնոյեանի եւ Արժ. Տ. Ռազմիկ Աւ. Քհնյ. Խաչատուրեանի։ Ներկայ էին Ազգ. Կեդրոնական Վարչութեան անդամ Տիար Կայծակ Զէյթլեան, Ազգ. Վարչութեան ատենապետ Տիար Կարօ Էշկիան եւ անդամ Տոքթ. Նաւասարդ Գազազեան, եւ Ազգ. Առաջնորդարանի բարերարներ, որոնք մաս կը կազմեն թանգարանի հիմնադիր նուիրատուներու շրջանակին։ Ծրագիրին զօրակցող պետական անձնաւորութիուններ արժանացան յատուկ պատիւի եւ գնահատանքի։

Հանդիսաւոր երեկոն սկսաւ դրօշակի արարողութեամբ, զոր կատարեցին Հ.Մ.Ը.Մ.-ի սկաուտները։ Կլենտէյլի Երկորդական վարժարանի երգչախումբը կատարեց քայլերգները։ Բացման աղօթքը կատարեցին թանգարանի վարչական խորհուրդի չորս համանախագահները՝ հայկական յարուանուանութեանց առաջնորդներ՝ Բարձր. Տ. Մուշեղ Արք. Մարտիրոսեան, Գերշ. Տ. Յովնան Արք. Տէրտէրեան, Գերպ. Տ. Միքայէլ Եպս. Մուրատեան եւ Վեր. Պերճ Ճամպազեան։

Հանդիսավարը՝ Տիկ. Արաքսիա Կարապետեան արտասանեց ողջոյնի խօսք։ Յանուն գործադիր յանձնախումբին, Տիար Պերճ Կարապետեան շնորհակալութեան խօսք ուղղեց ներկաներուն եւ պատիւի արժանացող զօրակիցներուն։ Քալիֆորնիոյ Ծերակոյտի նախագահ Թոնի էթքինզ շնորհաւորանքի խօսք ուղղեց մեծարեալներուն ու վեր առաւ հայ համայնքին հետ Քալիֆորնիա նահանգին սերտ կապերը։

Ճաշի պահուն, ներկաները ապրեցան Ալին Արուստամեանի երգերուն գեղարուեստական մթնոլորտին մէջ, դաշնակի վրայ նուագակցութեամբ Վահան Բզնունիի։

Դաշնակցային խորհրդարանի անդամ Էտըմ Շիֆ իր զօրակցութիւնը յայտնեց այս ծրագիրին։ Ներկաները յոտնկայս ցնծութեամբ եւ ծափողջոյններով ողջունեցին Լոս Անճելըս գաւառի վերակացու Քաթրին Պարկըրի անակնկալը. ան թանգարանի ներկայացուցիչներուն յանձնեց մէկ միլիոն տոլարի չէք մը։

Յատուկ յարգանքի ու մեծարանքի արժանացան ծրագիրին զօրակցող ու նպաստ բերող պետական անձնաւորութիւններ։ Քալիֆորնիա նահանգի խորհրդարանի անդամ Ատրին Նազարեան եւ խորհրդարանի նախագահ Էնթընի Ռէնտըն պատիւի արժանացան՝ նահանգին կողմէ տրամադրուած սկզբնական մէկ միլիոն տոլարի յատկացումին համար, նահանգի ծերակուտականներէն Էնթընի Փորթանթինօ եւ Քեւին Տը Լէոն՝ խորհրդարանէն յաւելեալ 3 միլիոն տոլարի յատկացումին ապահովման համար, իսկ Կլենտէյլի քաղաքապետ Զարեհ Սինանեան ու քաղաքապետական խորհուրդի անդամներ Արա Նաճարեան, Փոլա Տիվայն, Վարդան Կարապետեան եւ Վրէժ Աղաճանեան՝ քաղաքապետութեան կողմէ այս ծրագիրին համար ծանօթ հողաշերտին տրամադրուելուն համար։ Պարգեւատրուողները արտասնեցին սրտի խօսքեր ու վերահաստատեցին ծրագիրին իրենց զօրակցութիւնը։

Print Friendly, PDF & Email

ՎԵՐՋԻՆ ԼՈՒՐԵՐ

Արեւմտեան Մեր Թեմէն Երիտասարդներ Կը Մասնակցին Կաթողիկոսարանի Երիտասարդական Ամառնային Խտացեալ Դասընթացքին

Նկատի ունենալով ընդհանրապէս երիտասարդութեան ու յատկապէս համալսարանական երիտասարդներու կարեւոր դերակատարութիւնը մեր ազգային-եկեղեցական կեանքէն ներս եւ այս գծով Մեծի Տանն Կիլիկիոյ... [...]

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

August 18, 2019 August 11, 2019

ԼՈՒՐԵՐՈՒ ԱՐԽԻՒ