Օրհնութիւն եւ Քողազերծում Ցեղասպանութեան Սուրբ Նահատակներու Նուիրուած Ազգ. Առաջնորդարանի Յուշակոթողին


Ազգային Առաջնորդարանը Հինգշաբթի, 21 Ապրիլ 2016ի երեկոյեան ապրեցաւ պատմական օր մը եւ գործնական արձագանգ մը հնչեցուց «Կը յիշեմ ու կը պահանջեմ» կեցուածքին, որ բարձրացած էր անցեալ տարի, Ցեղասպանութեան 100-ամեակի հանգրուանին ու կը շարունակուի տարուէ տարի աւելի ուժգին հնչող նախաձեռնութիւններով: Արդարեւ, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, աղօթակցութեամբ հոգեւոր հայրերու, կատարեց օրհնութիւնն ու քողազերծումը Ազգ. Առաջնորդարանի յուշակոթողին, որ ձօնուած է Ցեղասպանութեան 100-ամեակին եւ նուիրուած է սրբադասեալ նահատակներուն: Յուշարձանին բացումը լոկ Ազգային Առաջնորդարանին արձանագրած նուաճումը չէր, այլ Ցեղասպանութեան 101րդ տարեդարձի այս օրերուն, անիկա եղաւ Արեւմտեան Միացեալ Նահանգներու հայութեան տարեգրութեան մէջ յիշատակելի քայլ մը:

Արարողութիւնը սկսաւ երեկոյեան ժամը 6:30ին, ներկայութեամբ դիւանագիտական ու պաշտօնական ներկայացուցիչներու, Ազգ. Առաջնորդարանի բարերարներու եւ բարեկամներու: Ներկայ էին Մեծի Տանն Կիլիկիոյ միաբանութեան երէց անդամներէն Գերշ. Տ. Եփրեմ Արք. Թապագեան, Հայ Կաթողիկէ համայնքի Միացեալ Նահանգներու առաջնորդ Գերպ. Տ. Միքայէլ Եպս. Մուրատեան, Հայ Աւետ. եկեղեցիներու միութեան ներկայացուցիչ Վեր. Վաչէ Էքմէքճեան, Հայաստանի գլխաւոր հիւպատոսութեան ներկայացուցիչներ՝ Տեարք Վալերի Մկրտումեան եւ Ռազմիկ Ստեփանեան, Ֆրեզնոյի մէջ Հայաստանի պատուոյ հիւպատոս Տիար Պերճ Աբգարեան, Լիբանանի գլխաւոր հիւպատոսի ներկայացուցիչ դատաւոր Ճէյմս Քաատօ,  Հ.Յ.Դ. Արեւմտեան Միացեալ Նահանգներու Կեդր. Կոմիտէի ներկայացուցիչ Տիար Տարօն Տէր Խաչատուրեան, Ազգ. Կեդրոնական եւ Թեմիս Ազգային Վարչութեան անդամներ, Թեմիս եկեղեցիներու հոգաբարձութեանց ու տիկնանց միութիւններու անդամներ, գաղութիս միութեանց, ընկերակցութեանց ու կազմակերպութեանց ներկայացուցիչներ եւ Ազգ. Առաջնորդարանի բարեկամներ ու բարերարներ:

Առաջնորդ Սրբազանը հոգեւորականաց թափօրով եւ «Այսօր Յարեաւ» շարականին երգեցողութեամբ, բարձրացաւ յուշարձան:

Ազգ. Առաջնորդարանի Կալուածոց Յանձնախումբի ատենապետ Տիար Վահան Պզտիկեան արտասանեց ողջոյնի խօսք ու կատարեց հանդիսավարութիւնը: Ան յայտնեց, որ այս յուշակոթողին գաղափարը համապատասխան է Ցեղասպանութեան 100-ամեակին առիթով հայութեան բարձրացուցած պահանջատիրական ձայնին, իրագործուեցաւ Առաջնորդ Սրբազանին նախաձեռնութեամբ ու մտայղացումով եւ Ազգ. Վարչութեան որոշումով, կոչուած է ըլլալու հայութիւնը դէպի արդար հատուցում առաջնորդող նոր ջահ մը:

Ապա, կատարուեցաւ Ս. Նահատակաց բարեխօսական կարգի արարողութիւնը, որուն ընթացքին ներկաները ականջալուր եղան նահատակներու յիշատակին նուիրուած «Հրաշացան Պակուցմամբ» շարականին: Այնուհետեւ, տեղի ունեցաւ յուշարձանին օրհնութիւնն ու քողազերծումը՝ ձեռամբ Առաջնորդ Սրբազանին, յուշարձանի բարերար Տէր եւ Տիկին Օսկօ եւ Երան Կիրակոսեան ամոլին ու Ազգ. Վարչութեան ատենապետ Տիար Վահէ Յովակիմեանի:

ԱՌԱՋՆՈՐԴ ՍՐԲԱԶԱՆԻՆ ՊԱՏԳԱՄԸ Իր պատգամին մէջ, Առաջնորդ Սրբազանը գոհունակութիւն յայտնեց, որ բոլորս միասնաբար ականատես վկաներն ենք պատմական այս արարողութեան, վեր առաւ այս յուշարձանին արժէքը՝ Ցեղասպանութեան յիշատակման ու պահանջատիրութեան երթին մէջ, ապա, շնորհակալութիւն յայտնեց բոլոր ներկաներուն ու մասնաւորաբար բարերար ամոլին, որոնք մասնակից էին ծրագիրին իրականացման ու բաժնեկից եղան այս պատմական օրուան:

«Ցեղասպանութեան 100ամեակին առիթով կանգնած այս յուշարձանին բացումն ու օրհնութիւնը կը կատարենք Ցեղասպանութեան 101րդ տարեդարձի նախօրեակին, յայտարարեց Առաջնորդ Սրբազանը. այս յուշարձանը կը միանայ աշխարհի տարածքին կանգնած աւելի քան 200 կոթողներուն: Ինչպէս կը տեսնէք, անիկա կը կրէ 100ամեակի խորհրդանիշ անմոռուկը, որ կը յուշէ մեր ժողովուրդին դէմ դար մը առաջ գործուած անմարդկային ոճիրը, ներկան՝ մեր վերածնունդն ու վերականգնումը, եւ ապագան՝ արդարութեան համար մեր պահանջատիրական երթն ու վերջնական յաղթանակը: Իսկ այս պատին վրայ կը տեսնէք Ցեղասպանութեան 50ամեակի հանգրուանին կանգնած՝ Ծիծեռնակաբերդի եւ Պիքֆայայի պատմական յուշակոթողներուն քանդակները, իբրեւ տեսանելի վկայութիւն, որ Հայաստանն ու Սփիւռքը մէկ ու միացեալ են, ողջ հայութիւնը անքակտելիօրէն կապուած է մայր հայրենիքին»:

Հակիրճ կերպով անդրադառնալէ ետք այս յուշարձանի գաղափարին ծնունդ առնելուն ու մարմնաւորուելուն, Առաջնորդ Սրբազանը գնահատանքի եւ շնորհակալութեան խօսք ուղղեց Կալուածոց յանձնախումբի անդամներուն՝ Տեարք Վահան Պզտիկեանի, Յովսէփ Պօյաճեանի եւ Պերճ Գաբրիէլեանի, ինչպէս նաեւ ճարտարապետ Արամ Ալաճաճեանի, քանդակները իրագործող արուեստագէտ Ռոման Գալստեանին, քարերը նուիրաբերող Տիար Յովսէփ Թոգաթի ու շրջապատը կանաչազարդող Տիար Վիգէն Աբէլեանի, ու մասնաւորաբար Տէր եւ Տիկին Օսկօ եւ Երան Կիրակոսեան բարերար ամոլին: Ան յիշեցուց, որ Կիրակոսեան ընտանիքը յաճախ ու հետեւողականօրէն սրտաբուխ նուիրատուութեամբ զօրավիգ եղած է Առաջնորդարանիս ծրագիրներուն, արժանացած է «Կիլիկեան Իշխան»ի շքանշանին: Այս ընտանիքին բարերարութիւններուն նորագոյններն են մեր նահատակներու մասունքները պարունակող եւ Թեմիս եկեղեցիներուն նուէր տրուած ճաճանչաւոր խաչերուն ու սոյն յուշարձանին հովանաւորումը, որոնց համար նուիրած է 100,000 տոլար: Աւելին, այս կէսօրին իսկ, Ազգ. Առաջնորդարան այցելութեան առիթով, ականատես ըլլալէ ետք գեղեցիկ իրագործումին, 15,000 տոլարի նոր նուիրատուութիւն մը կատարած է Առաջնորդարանիս:

Շարունակելով իր խօսքը, Առաջնորդ Սրբազանը յայտարարեց. «Այսօրուան մեր համախմբումը առանձնակի դէպք մը չէ. անիկա մաս կը կազմէ Ցեղասպանութեան 101րդ տարեդարձի յիշատակման ողջ հայութեան նախաձեռնութիւններուն, որոնք իրարու կ’արձագանգեն Հայաստանէն մինչեւ հայկական օճախներ: Այս տարի, 100 + 1 նշանաբանով կը շարունակենք յիշե՛լ ու պահանջե՛լ: Կիրակի օր, Ապրիլ 24ին, մենք դարձեալ միահամուռ եւ զանգուածաբար պիտի մասնակցինք թրքական հիւպատոսարանին առջեւ Արդարութեան Հանրահաւաքին, Նոյն առաւօտուն մեր եկեղեցիներուն մէջ Ս. Պատարագով պիտի յիշատակենք մեր սրբադասեալ նահատակները, իսկ Շաբաթ, 23 Ապրիլի կէսօրին, Մոնթեպելլոյի Յուշարձանին առջեւ, աղօթքով ու քաղաքական հաւաքով պիտի խոնարհինք մեր սուրբ նահատակներուն յիշատակին, մասնակցութիւն պիտի բերենք երիտասարդական ու մշակութային բոլոր այն նախաձեռնութիւններուն, որոնք մեր ձայնը լսելի պիտի դարձնեն տարբեր միջոցներով ու բեմերէ:

«Չմոռնանք, որ Ցեղասպանութեան 101րդ տարեդարձի նշումը տեղի կ’ունենայ այն օրերուն, երբ Արցախի մէջ դեռ արիւնը չէ չորցած՝ Ապրիլի առաջին օրերուն, Թուրքիոյ դաշնակից եւ գործակից Ազրպէյճանի դաւադիր ու վայրագ յարձակումին հետեւանքով բացուած վէրքին: Մեր քաջարի զինուորները, Ցեղասպանութենէն առաջ ու անկէ ետք ինկած նահատակներուն հայրենասիրութեան ու հայրենապաշտպանութեան ոգիին ժառանգորդները, ամենասուղը՝ իրենց կեանքը չսակարկեցին հայրենիքի պաշտպանութեան համար ու անգամ մը եւս վկայեցին, որ մեր արդար պահանջները սակարկելի չեն, հաստատեցին, որ աննահանջ պայքարը գրաւական է յաղթանակի:

Առաջնորդ Սրբազանը յիշեցուց, որ մեր երկու Վեհափառ Հայրապետները անցեալ շաբաթ Արցախ այցելեցին, զօրակցութիւն յայտնելու համար մեր սահմանապահ զինուորներուն ու Արցախի քաջարի ժողովուրդին: Այդ առիթով, անոնք մէկ միլիոն տոլարի նուիրատուութիւն մը յայտարարեցին ի նպաստ Արցախի: Ընդառաջելով Ս. Աթոռոյս գահակալ Ն.Ս.Օ.Տ.Տ. Արամ Ա. կաթողիկոսի նախաձեռնութեան, Ազգ. Առաջնորդարանս մամուլին տրուած կոչով մը կը դիմէ մեր ժողովուրդին, որ լիաբուռն մասնակցութիւն բերէ այս նպատակով սկսած հանգանակութեան: Ան կոչ ուղղեց ներկաներուն, որ հանգանակութեան մասնակից ըլլան այս երեկոյէն սկսեալ:

Առաջնորդ Սրբազանը իր պատգամը աւարտեց ըսելով.-

«Խունկ ու աղօթք մեր բոլոր նահատակներուն:

«Փառք մեր պահանջատիրութեան դրօշը բարձր պահողներուն:

«Թող Աստուած պահապան ըլլայ մեր հայրենիքին ու քաջարի բանակին, դէպի յաղթանակ առաջնորդէ մեր արդարատենչ քայլերը»:

Ապա, հրաւիրեց Տիար Օսկօ Կիրակոսեանը՝ արտասանելու իր սրտի խօսքը:

ՍՐՏԻ ԽՕՍՔԵՐ Տիար Օ. Կիրակոսեան փառք տուաւ Աստուծոյ, ընտանիքին հետ նման ձեռնարկի մասնակցութեան առիթը շնորհած ըլլալուն համար, նշեց, որ ինք ազգին ու եկեղեցւոյ ծառայութեան ճամբուն մէջ մտած է հետեւելով ծնողներուն ուղեցոյցին, իսկ իր զօրակցութիւնը արտայայտութիւն է ծնողաց աւանդին փոխ հատուցման. ան շնորհակալութիւն յայտնեց Առաջնորդ Սրբազանին, Ազգ. Առաջնորդարանին աջակցելու առիթին համար: Ան գոհունակութիւն յայտնեց վերջին տասնամեակներուն մեր գաղութին արձանագրած յառաջդիմութեան ու նուաճումներուն համար, վեր առնելով այս իրագործումներուն մէջ ղեկավարութեան դերը:

Սրտի խօսք արտասանեց նաեւ դատաւոր Ճէյմս Քաատօ, որ նշեց, թէ ինք այս հանդիսաւոր արարողութեան կը մասնակցի յանուն Լիբանեւամերիկեան հիմնարկին ու Լիբանանի հիւպատոսին, այս ու նման յուշահանդէսներ նկատեց առիթ՝ վեր առնելու ոչ միայն հայութեան տանջանքները, այլ նաեւ անոր դիմադրականութիւնն ու տոկունութիւնը: Ընդունելի չէ, որ պատմութիւնը մոռացութեան մատնէ մեծ ոճիրները, որովհետեւ ոեւէ ժողովուրդի դէմ ոճիր՝ համազօր է բոլոր ժողովուրդներու դէմ ոճիրի: Ան լիբանանցի ժողովուրդին անունով զօրակցութիւն յայտնեց հայութեան, հաստատեց, որ տառապանքի մէջ բաժնեկցութիւն կայ երկու ժողովուրդներու պատմութեան մէջ, եւ հաստատեց, որ զօրակցութիւնը պիտի շարունակուի մինչեւ արդարութեան յաղթանակը:

Յանուն Հայաստանի հիւպատոսութեան, խօսք առաւ Տիար Վալերի Մկրտումեան: Ան նշեց, որ նորակառոյց այս յուշարձանը նորագոյն վկայութիւն մըն է հայութեան պատմութեան ամէնէն մութ մէկ էջին՝ Ցեղասպանութեան. այսօր, կը խոնարհինք մեր 1.5 միլիոն նահատակներուն յիշատակին, սակայն կը վերահաստատենք արդարութեան վերահաստատման մեր յանձնառութիւնը: Ան հաստատեց, որ հայութիւնը ի սպառ բնաջնջելու օսմանեան Թուրքիոյ ոճրային ծրագիրը ձախողած է, հայութիւնը, իբրեւ Քրիստոնէութիւնը պետականօրէն ընդունող առաջին ժողովուրդ, մերժած է բնաջնջուիլ, այսօր բազմաթիւ վկայութիւններ կու տայ իր անպարտելի ոգիին, պատրաստ է արդարութեան ու արժանապատիւ կեանքի համար պայքարը շարունակելու մինչեւ արեան վերջին կաթիլ: Վեր առնելէ ետք հայութեան ու Հայաստանի վերականգնումի իրականութիւնը, ան անդրադարձաւ ազերիական վերջին յարձակումին ու անոր դիմաց հայութեան միահամուռ ու պատուաբեր ծառացումին, որուն մասնակից եղաւ նաեւ Լոս Անճելըսի հայութիւնը: Ան իր խօսքը աւարտեց նշելով, որ պատմական արդարութեան վերականգնումը կը հետաքրքրէ ոչ միայն հայութիւնը, այլ նաեւ ամբողջ մարդկութիւնը, որովհետեւ Ցեղասպանութեան նման ոճիրներու անտեսումը առիթը տուած է նմանօրինակ այլ ոճիրներու: Մեր պայքարը պիտի շարունակուի ու արդար հատուցումը պիտի չուշանայ:

Յուշարձանի բացման պաշտօնական յայտագիրը վերջ գտաւ Առաջնորդ Սրբազանին «Պահպանիչ» աղօթքով. ներկաները միասնաբար երգեցին «Կիլիկիա»ն, Հայաստանի Քայլերգն ու Տէրունական աղօթքը: Այնուհետեւ, անոնք վայլելեցին կոկիկ հիւրասիրութիւն, առիթ ունեցան Առաջնորդ Սրբազանը, բարերար ամոլն ու ժողովականութեան ներկայացուցիչները շնորհաւորելու այս իրագործումին առիթով: Անոնք ստացան յուշանուէրներ: Երեկոն անջնջելի յիշատակներ արձանագրեց բոլորին հոգիներուն մէջ:

Print Friendly, PDF & Email

ՎԵՐՋԻՆ ԼՈՒՐԵՐ

Յարութ Պարսամեան Ուսանողական Կրթաթոշակի Դիմումնագիրներու Ընդունում 2019-2020 Տարեշրջանին Համար

Արեւմտեան Թեմի բարեխնամ Առաջնորդ Բարձր. Տ. Մուշեղ Արք. Մարտիրոսեան, Ազգային Վարչութիւնն ու «Պարսամեան» Կրթաթոշակի Յանձնախումբը այսու կը յայտարարեն, թէ ուսումնական... [...]

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

June 23, 2019 June 16, 2019

ԼՈՒՐԵՐՈՒ ԱՐԽԻՒ