Կոչ՝ Արցախի Զօրակցութեան – Լիաբուռն Մասնակցինք Հանգանակութեան


Ինչպէս ծանօթ է, Մեծի Տանն Կիլիկիոյ Ս. Աթոռոյս գահակալ Ն.Ս.Օ.Տ.Տ. Արամ Ա. Կաթողիկոս, 11էն 15 Ապրիլին Հայաստան եւ Արցախ այցելեց, Ամենայն Հայոց Կաթողիկոս Ն.Ս.Օ.Տ.Տ. Գարեգին Բ. Վեհափառ Հայրապետին հետ միասնաբար զօրակցութիւն յայտնելու համար հայրենի պետութեան, Արցախի պետական պատասխանատուներուն, սահմանապահ մեր զինուորներուն ու քաջարի մեր ժողովուրդին: Այցելութեան աւարտին, Վեհափառ Հայրապետը Մեծի Տանն Կիլիկիոյ Կաթողիկոսութեան ու Թեմերուն անունով 500,000 (հինգ հարիւր հազար) տոլարի անմիջական օժանդակութիւն մը կատարեց Արցախին, որ Ապրիլի առաջին օրերուն տեղի ունեցած ազերիական թշնամական յարձակումներուն հետեւանքով ունեցաւ մարդկային զոհեր ու նիւթական մեծ վնասներ: Նոյնքան գումար մը տրամադրեց նաեւ Ամենայն Հայոց Կաթողիկոսը՝ Ս. Էջմիածինի ու թեմերուն անունով:

Ընդառաջելով Արամ Ա. Վեհափառ Հայրապետի կոչին, այսու յանուն Թեմիս Կրօնական Ժողովին ու Ազգային Վարչութեան, կը հրաւիրենք մեր ժողովուրդը լիաբուռն մասնակցութիւն բերելու Արցախի ի նպաստ հանգանակութեան, իբրեւ զօրակցութիւն պետութեան, բանակին ու մասնաւորաբար սահմանային գօտիի բնակիչներուն եւ նահատակներու ընտանիքներուն:

Մեր Թեմի զաւակները միշտ ալ սիրայօժար պատրաստակամութեամբ ընդառաջած են հայրենանուէր նման նախաձեռնութիւններու. վկայ՝ Հայաստան Համահայկական Հիմնադրամի տարեկան թելեթոնները, վկայ՝ Սուրիոյ հայութեան ի նպաստ վերջին չորս տարիներու հանգանակութիւններն ու 21 Փետրուար 2016ի թելեթոնը:

Երբ մեր սահմանապահ ուժերը իրենց կեանքը չեն սակարկեր հայրենիքի պաշտպանութեան համար, երբ մեր ժողովուրդը ոգի ի բռին կառչած կը մնայ դարաւոր հայրենիքին, Վեհափառ Հայրապետին կոչը ազնիւ մարտահրաւէր է բոլորիս, որպէսզի գործնապէս մասնակից ըլլանք Արցախի պահպանումին, մանաւանդ, որ Ազրպէյճանի դաշնակից Ցեղասպան Թուրքին դէմ մեր պահանջատիրական պայքարը թեւակոխած է կենսաւորումի նոր փուլ մը:

Եկէ՛ք, ուրեմն, գործնապէս ընդառաջենք Արցախի կանչին: Ձեր նուիրատութիւնները կրնաք կատարել Ազգային Առաջնորդարանիս ողղակիօրէն (Western Prelacy – Memo: Artsakh Support Fund) կամ Թեմիս Ձեր շրջանի եկեղեցիներուն միջոցաւ։

Թող օրհնեալ ըլլայ յիշատակը մեր նահատակներուն ու զոհերուն, մխիթարութիւն՝ անոնց ընտանիքներուն, անսպառ կորով՝ մեր քաջարի բանակին եւ ապահով ու խաղաղ կեանք մեր ժողովուրդին:

Փա՜ռք մեր սուրբ նահատակներուն:

Յաւերժ ապրի՛ մեր ժողովուրդը, ի Հայաստան, յԱրցախ եւ ի սփիւռս աշխարհի:

Մուշեղ Արք. Մարտիրոսեան, Առաջնորդ
Ա. Մ. Նահանգներու Արեւմտեան Թեմի

Print Friendly, PDF & Email

ՎԵՐՋԻՆ ԼՈՒՐԵՐ

Արեւմտեան Մեր Թեմէն Երիտասարդներ Կը Մասնակցին Կաթողիկոսարանի Երիտասարդական Ամառնային Խտացեալ Դասընթացքին

Նկատի ունենալով ընդհանրապէս երիտասարդութեան ու յատկապէս համալսարանական երիտասարդներու կարեւոր դերակատարութիւնը մեր ազգային-եկեղեցական կեանքէն ներս եւ այս գծով Մեծի Տանն Կիլիկիոյ... [...]

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

August 18, 2019 August 11, 2019

ԼՈՒՐԵՐՈՒ ԱՐԽԻՒ