Ն.Ս.Օ.Տ.Տ. Արամ Ա. Կաթողիկոսին Ձեռնադրութեան եւ Օծման 50-ամեակի Տօնախմբութիւն

Կիրակի, 21 Հոկտեմբեր 2018-ը Մեծի Տանն Կիլիկիոյ Կաթողիկոսութեան ժամանակակից պատմութեան մէջ կարեւոր օր մը դարձաւ, երբ մեր ժողովուրդը հանդիսաւոր կերպով իր յարգանքը մատուցանեց Ն.Ս.Օ.Տ.Տ. Արամ Ա. Կաթողիկոսին՝ ձեռնադրութեան եւ օծման 50-ամեակին առիթով։

Կիրակի առաւօտեան, Անթիլիասի Մայրավանքի Ս. Գրիգոր Լուսաւորիչ Մայր Տաճարին մէջ Ս. եւ Անմահ Պատարագ մատուցանեց Վեհափառ Հայրապետը։ Ներկայ էին Հայաստանի Հանրապետութեան վարչապետի պաշտօնակատար Նիկոլ Փաշինեան եւ իր տիկինը, ընկերակցութեամբ պաշտօնական պատուիրակութեան մը, Լիբանանի նախագահին, վարչապետին եւ խորհրդարանի նախագահին ներկայացուցիչները, Ամենայն Հայոց Կաթողիկոս Ն.Ս.Օ.Տ.Տ. Գարեգին Բ. Հայրապետին, Հռոմի Պապին ու քրիստոնեայ համայնքապետերու ներկայացուցիչները, պետական նախարարներ, երեսփոխաններ, դեսպաններ, քաղաքական կուսակցութեանց ու կազմակերպութեանց ներկայացուցիչները, ազգային բարերարներ եւ մեր ժողովուրդի զաւակները։

Արարողութեան մասնակցեցան Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան եւ Առաջնորդական փոխանորդ Գերշ. Տ. Թորգոմ Եպս. Տօնոյեան։ Ներկայ էին նաեւ Ազգային Կեդրոնական Վարչութեան Արեւմտեան մեր Թեմի անդամները՝ Տեարք Վահէ Եագուպեան եւ Կայծակ Զէյթլեան։

Օրուան պատգամը փոխանցեց Նորին Սրբութիւնը, որ իբրեւ բնաբան ընտրած էր Քրիստոսի խօսքը. «Ես աշխարհ եկայ ո՛չ թէ ծառայութիւն ստանալու, այլ ծառայելու»։ Վեհափառ Հայրապետը ընդհանուր գիծերով պարզեց ծառայութեան իմաստը քրիստոնէական տեսանկիւնէն դիտուած, յիշեցուց, որ եկեղեցին ինքզինք կ՚ըլլայ, իր հարազատ էութեամբ, ծառայութեան ճամբով, որովհետեւ եկեղեցին ոչ անշարժ կառոյց է եւ ոչ ալ զմռսուած մտածողութիւն, այլ ժողովուրդին գացող ծառայական առաքելութիւն է։ Խօսելով իր ծառայական կեանքին մասին, ան նշեց, որ կեանքի դժուար պայմաններուն մէջ, անցեալ 50 տարիներուն, յատկապէս իբրեւ Լիբանանի հայոց թեմի առաջնորդ եւ ապա Կաթողիկոս, փորձած է Քրիստոսի թելադրութեան հաւատարիմ ըլլալ իր ծառայական կեանքին մէջ։ Ան յիշեց, որ ինք Ցեղասպանութենէն վերապրողներու զաւակ է եւ Լիբանան ծնած առաջին Կաթողիկոսը։

Նորին Սրբութիւնը հանգամանօրէն խօսեցաւ Հայոց Ցեղասպանութենէն ետք Լիբանանի մատուցած օգնութեան։ Լիբանանի մէջ հայ համայնքը ոչ միայն շուտով ինքզինք վերակազմակերպեց, այլ նաեւ դարձաւ յառաջապահը հայ ժողովուրդի վերածննդեան ու սիրտը՝ Սփիւռքի հայութեան, իսկ ներկայիս, իբրեւ Լիբանանի եօթը գլխաւոր համայնքներէն մէկը՝ Լիբանանի հայութիւնը միշտ տէր է իր պարտաւորութիւններուն եւ իրաւունքներուն։

Լիբանանի նախագահին, վարչապետին ու խորհրդարանի նախագահին մասին գնահատական արտայայտութենէ ետք, Վեհափառ Հայրապետը յատուկ կերպով ողջունեց Հայաստանի վարչապետի պաշտօնակատարը, շեշտելով, որ հայրենի ժողովուրդին կամքին ու սպասումներուն թարգմանը ըլլալով՝ ան նոր էջ բացաւ Հայաստանի ներկայ ժամանակներու պատմութեան մէջ։ Վեհափառ Հայրապետը վստահեցուց, որ Մեծի Տանն Կիլիկիոյ Կաթողիկոսութիւնը պիտի շարունակէ վերանորոգ հաւատքով իր մասնակցութիւնը բերել Հայաստանի հզօրացման ու ծաղկման աշխատանքներուն, եւ կոչ ուղղեց, որ Լիբանանի ու Հայաստանի միջեւ եղբայրական սերտ կապն ու գործակցութիւնը աւելի՛ ամրապնդուին։

Պատարագէն ետք, Վեհարանի դահլիճին մէջ խօսք առաւ Ազգային Կեդրոնական Վարչութեան ատենապետ Տիար Ստեփան Տէր Պետրոսեան եւ վեր առնելէ ետք Վեհափառ Հայրապետին 50-ամեայ ծառայութեան կարեւորութիւնը, յաջորդաբար հրաւիրեց Ամենայն Հայոց Կաթողիկոսին, Պապին եւ Հանրապետութեան նախագահին ներկայացուցիչները եւ ապա վարչապետի պաշտօնակատար Նիկոլ Փաշինեանը՝ իրենց խօսքերը արտասանելու։

Գերշ. Տ. Նաթան Արք. Յովհաննէսեան ընթերցեց Ամենայն Հայոց Կաթողիկոսին շնորհաւորական ուղերձը, որ անդրադարձ մըն էր Նորին Սրբութեան յիսնամեայ ծառայութեան անկիւնադարձային հանգրուաններուն եւ վաստակին՝ հայ եկեղեցւոյ հոգեւոր ու ազգային կեանքին եւ միջ-եկեղեցական աշխարհին մէջ, միաժամանակ կը նշէր, որ Մեծի Տանն Կիլիկիոյ Կաթողիկոսութեան առաքելութեան ծաւալուն աշխատանքին իբրեւ արդիւնք՝ նոր հորիզոններ բացուած են Հայ Եկեղեցւոյ դիմաց, պայծառացնելու աշխարհասփիւռ հայերու հոգեւոր կեանքը եւ հզօրացնելու անոր միասնականութիւնը. «Հաւատում ենք, որ միասնակամ գործակցութեամբ պիտի շարունակենք լուծման առաջնորդել հոգեւոր-եկեղեցական մեր անդաստանում առկայ մարտահրաւէրները», կ՚եզրափէր ուղերձը։

Պապական նուիրակ Ճոզէֆ Արք. Սփիթերին ընթերցեց Ֆրանչիսկոս Պապին ուղերձը։ Պապը կը շնորհաւորէր Նորին Սրբութիւնը՝ քահանայական ձեռնադրութեան եւ օծման 50-ամեակին առիթով, եւ աղօթք կը բարձրացնէր անոր քաջառողջութեան եւ երկարակեցութեան համար։

Լիբանանի Հանրապետութեան նախագահի անունով խօսք առաւ երեսփոխան Իպրահիմ Քանաան, որ նշեց, թէ այս առիթը կը մարմնաւորէ ազատութեան, հաստատ սկզբունքներու եւ համակեցութեան պատգամները, յայտարարեց, որ Լիբանանի ժողովուրդը մէկ է եւ միշտ իբրեւ մէկ ամբողջութիւն պիտի կանգնի՝ Լիբանանի յարութեան համար։ «Դուք՝ Նորին Սրբութիւն, եւ հայ համայնքը, կը կազմէք այս հայրենիքին ամէնէն կարեւոր բաղկացուցիչ տարրերէն մէկը», շեշտեց Քանաան։

Հանդիսութեան վերջին խօսքը արտասանեց Հայաստանի Հանրապետութեան վարչապետի պաշտօնակատարը, որ անդրադարձաւ Վեհափառ Հայրապետին եկեղեցանուէր, ազգանուէր եւ ազգաշէն գործունէութեան եւ վեր առաւ Մեծի Տանն Կիլիկիոյ Կաթողիկոսութեան դերակատարութիւնը Ցեղասպանութենէն ճողոպրած հայութեան կեանքի վերակազմակերպման առաքելութեան մէջ։ «Մեծի Տանն Կիլիկիոյ Կաթողիկոսութիւնը Սփիւռքի առաքելական հայերի մի մեծ հատուածի հոգեւոր կեդրոնն է, եկեղեցական եւ կրօնական աւանդոյթների պահպանման ու հարստացման իւրայատուկ դարբնոցը։ Անթիլիասը հազարաւոր հայերի սրտում է։ Շնորհակալ ենք, որ այս պատերի ներքոյ տարիներ ի վեր փայփայուել են մեր ազգային ինքնութիւնը, մշակութային արժէքները, խրախուսուել ազգապահպանութեան ծրագրերը», ըսաւ Վարչապետի պաշտօնակատարը եւ մասնաւորաբար շեշտեց Նորին Սրբութեան աշխատանքը՝ Հայոց Ցեղասպանութեան արդար հատուցման ապահովման նպատակով, նաեւ աւելցուց, որ անժխտելի է Նորին Սրբութեան իմաստուն խօսքի ազդեցութիւնը ազգային կեանքին, հայոց պետականաշինութեան եւ համազգային առաջնահերթութիւններու իրականացման գործընթացքին մէջ։ Վերջապէս, ան վեր առաւ Վեհափառ Հայրապետին միջ-եկեղեցական ոլորտին մէջ եւ միջազգային գետնի վրայ ունեցած գործունէութիւնն ու համբաւը եւ եզրափակեց երախտագիտական արտայայտութեամբ։

Աւարտին, ներկաները շնորհաւորեցին Վեհափառ Հայրապետը։

ՀԱՆԴԻՊՈՒՄ ՎԵՀԱՓԱՌ ՀԱՅՐԱՊԵՏԻՆ ԵՒ ՎԱՐՉԱՊԵՏԻ ՊԱՇՏՕՆԱԿԱՏԱ ՄԻՋԵՒ
Նոյն օրը, յետ միջօրէին, Վեհափառ Հայրապետին ու Հայաստանի Հանրապետութեան վարչապետի պաշտօնակատարին միջեւ առանձին հանդիպում մը տեղի ունեցաւ Անթիլիասի Մայրավանքին մէջ։ Արծարծուեցան Հայաստանի ներքին կացութեան, պետութիւն-եկեղեցի յարաբերութեան եւ Հայաստան-Սփիւռք գործակցութեան առնչուած շարք մը հարցեր, որոնց շուրջ տեղի ունեցաւ տեսակէտներու փոխանակում։ Կարեւորութեամբ շեշտուեցաւ մեր ժողովուրդին միասնականութիւնը ամուր պահելու, Հայաստանը առաւել հզօրացման մղող աշխատանքներուն շուրջ համախմբուելու եւ Հայաստան-Սփիւռք գործակցութիւնը առաւել ծաւալելու հրամայականը։

ՊԱՇՏՕՆԱԿԱՆ ՃԱՇԿԵՐՈՅԹ Ի ՊԱՏԻՒ Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍԻՆ
Երեկոյեան, «Le Royal» պանդոկին մէջ, պաշտօնական ճաշկերոյթ մը տեղի ունեցաւ ի պատիւ Վեհափառ Հայրապետին։ Խօսք առաւ Ազգային Կեդրոնական Վարչութեան համա-ատենապետ Տիար Գրիգոր Մահսէրէճեան. կարդացուեցաւ Արցախի Հանրապետութեան նախագահ Բակօ Սահակեանի ուղերձը. յաջորդաբար խօսք առին Հայաստանի վարչապետի պաշտօնակատար Տիար Նիկոլ Փաշինեանն ու Նորին Սրբութիւնը։

Տիար Գ. Մահսէրէճեան ըսաւ, որ Նորին Սրբութեան նկարագիրին գերակշիռ յատկութիւններէն են համահայկական մտածողութիւնն ու աշխատանքի մղող նկարագիրը, ինչպէս նաեւ եկեղեցին պատերէն անդին տանելու յանձնառութիւնը։

Տիար Պետօ Տէմիրճեան ընթերցեց Արցախի նախագահին ուղերձը, ուր կը նշուէր որ Նորին Սրբութեան ձեռնադրութեան եւ օծման յիսնամեակը նշանակալից իրադարձութիւն է ոչ միայն Մեծի Տանն Կիլիկիոյ Կաթողիկոսութեան, այլ նաեւ Հայ Առաքելական եկեղեցւոյ, հայրենիքին եւ Սփիւռքի բազմաթիւ օճախներուն համար։ Շնորհաւորանքի արտայայտութենէ ետք, ան կ՚ընդգծէր, որ Արցախը բարձր կը գնահատէ Նորին Սրբութեան կրթական-հայագիտական, միջ-եկեղեցական եւ միջ-կրօնական կապերու խորացման միտող լայնածաւալ գործունէութիւնը, ընդգծելով, որ Վեհափառ Հայրապետը, թէ՛ օրհասական պահուն եւ թէ յաղթական ժամուն, միշտ նեցուկ կանգնած է հայ ազգին:

Ապա, բեմ բարձրացաւ Հայաստանի Հանրապետութեան վարչապետի պաշտօնակատարը, որ շնորհաւորեց Վեհափառ Հայրապետը, մաղթելով քաջառողջութիւն եւ արեւշատութիւն։ Տիար Փաշինեան ընդգծեց Նորին Սրբութեան ծառայասիրութիւնը եւ ըսաւ, որ ան 50 տարուան հոգեւոր ծառայութիւնը գործնականացուցած է «զրուցելով» Աստուծոյ եւ ժողովուրդի հետ, եւ բնական է, որ նման նուիրական անհատ մը վայելէ համատարած վստահութիւն ու յարգանք թէ՛ ազգային եւ թէ միջազգային մակարդակներու վրայ։

Աւարտին, իր խօսքը ուղղեց Նորին Սրբութիւնը, որ շնորհակալութիւն յայտնեց յոբելենական երեկոյին ու ջերմ շնորհաւորանքներուն համար, ընդգծեց, որ մեր կեանքին իմաստն ու նպատակը չի կրնար ըլլալ այլ բան՝ քան ծառայութիւնը. ան ըսաւ, որ հոգեւորականի կեանքին մէջ, ազդուելով իր նախորդ երեք Կաթողիկոսներէն եւ ըլլալով անոնց անջնջելի հետքերով կազմաւորուած, կը մատուցանէ իր ծառայութիւնը։ Իր խօսքը ուղղելով վարչապետի պաշտօնակատարին, Վեհափառ Հայրապետը ընդգծեց, որ թաւշեայ յեղափոխութեան առաջին օրերէն իսկ կապ հաստատելով Փաշինեանի հետ, շեշտած է հարցերու հանգուցալուծման առաջնորդող յեղափոխութիւն մը ըլլալուն կարեւորութիւնը, որ պէտք է հետապնդէ մէկ նպատակ՝ Հայաստանի հզօրացումը։ Վեհափառ Հայրապետը ըսաւ, որ Սփիւռքը հարկադրաբար Հայաստանէն հեռու ապրած է, տագնապած է անոր ցաւերով եւ ուրախացած անոր վերանկախացումը տեսնելով, սակայն մեր ժողովուրդը ոչ միայն կ՚ուզէ տեսնել անկախացած Հայաստանը, այլեւ Հայաստանը կ՚ուզէ տեսնել Արարատո՛վ։

«Պէտք է հզօրացնենք Հայաստանը ի խնդիր Մեծ Հայաստանին։ Զօրացնենք Սփիւռքը, որպէսզի Հայաստանը աւելի հզօրանայ։ Հայաստանը հզօրացնենք, որպէսզի Սփիւռք-Հայաստան-Արցախ եռամիութիւնը փոխադարձ հասկացողութեամբ, ամբողջական համագործակցութեամբ, դերերու յստակեցումով, աշխատանքի բաժանումով, սակայն մէկ ազգի, մէկ հայրենիքի եւ մէկ ապագայի տեսլականով քալենք դէպի ժողովուրդի պայծառ ապագայ։ Հետեւաբար, իմ սպասումս է, որ Հայաստանի մէջ մեր ժողովուրդի մասնակցութեամբ յառաջացած թաւշեայ յեղափոխութիւնը այս գիտակցութեամբ ու հաւատքով հզօրացնէ մեր հայրենիքը։ Կը վստահեցնեմ ձեզի, թէ Սփիւռքը, Մեծի Տանն Կիլիկիոյ Կաթողիկոսութիւնը ձեզի հետ է, Հայաստանին հետ է, Արցախին հետ է», եզրափակեց Նորին Սրբութիւնը։

Գերշ. Տ. Նաթան Արք. Յովհաննէսեան Մայր Աթոռ Ս. Էջմիածնի Կաթողիկոսութեան անունով Նորին Սրբութեան նուիրեց յուշանուէր մը՝ Ս. Էջմիածնի ոսկեձոյլ խաչի մանրակերտը, իսկ Վեհափառ Հայրապետը Նիկոլ Փաշինեանին նուիրեց Բարձր Բերդի ձեռագիր աւետարանէն կրկնօրինակ մը։

Ճաշկերոյթէն առաջ, վարչապետի պաշտօնակատար Նիկոլ Փաշինեան այցելեց Անթիլիասի Մայրավանքի Սրբոց Նահատակաց մատուռը եւ ծաղկեպսակ մը զետեղեց անոր առջեւ, ներկայութեամբ Վեհափառ Հայրապետին եւ Միաբանութեան։

Print Friendly, PDF & Email

ՎԵՐՋԻՆ ԼՈՒՐԵՐ

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

September 15, 2019 September 8, 2019

ԼՈՒՐԵՐՈՒ ԱՐԽԻՒ