Ազգ. Շամլեան Վարժարնի Աշակերտները Ս. Ծննդեան Տօնածառին Հեքիաթը Ներկայացուցին Ազգ. Առաջնորդարանին Մէջ

Ամանորի եւ Ս. Ծննդեան տօնի նախօրեակին, եւ պահպանելով աւանդութիւնը, Ազգային Վահան եւ Անոյշ Շամլեան վարժարանի առաջին կարգի աշակերտները Հինգշաբթի, 20 Հոկտեմբեր 2018-ի կէսօրին այցելեցին Ազգային Առաջնորդարան եւ հիւրընկալուեցան Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի կողմէ, որուն կողքին ներկայ էր Արժ. Տ. Նարեկ Աւ. Քհնյ. Փեհլիվանեան։

Մօտաւորապէս 80 աշակերտներ, ընկերակցութեամբ վարժարանի տնօրէնուհիին՝ Դոկտ. Թալին Քարկոտորեանի, փոխ տնօրէնուհի Տիկին Ռիթա Գաբրիէլեանի, դաստիարակներուն ու խումբ մը ծնողներու, Ազգ. Առաջնորդարանի հասան կէսօրէ առաջ ժամը 11-ին։ Մանուկները նախ համախմբուեցան «Ս. Տրդատ եւ Ս. Աշխէն» մատրան մէջ, ուր Առաջնորդ Սրբազանին եւ Տէր Հօր հետ ունեցան աղօթքի պահ մը։ Ապա, անոնք առաջնորդուեցան «Տիգրան եւ Զարուհի Տէր Ղազարեան» սրահը, ուր ստեղծեցին տօնական օրերու մթնոլորտ։

Աշակերտները պատրաստած էին գողտրիկ յայտագիր մը, որ երգերով, արտասանութիւններով եւ տրամախօսութեամբ կը ներկայացնէր Յիսուս մանուկի ծննդեան պատմութիւնը, հիւսուած՝ տօնածառի հեքիաթին վրայ։ Պահը վերածուեցաւ ամանորեան գեղեցիկ հանդէսի մը։

Հանդէսի սկզբնաւորութեան, քանի մը աշակերտներ արտասանեցին ողջոյնի խօսք։ Անոնք ուրախութիւն յայտնեցին, որ Ազգ. Առաջնորդարան կ’այցելեն եւ շնորհակալ են, որ Առաջնորդ Սրբազանը կ’ընդունի զիրենք։ Անոնք հաւաստեցին, որ ուրախ են ըլլալով Շամլեանի աշակերտներ, նաեւ՝ արժանաւոր թոռները Ս. Մեսրոպ վարդապետին, խոստացան պահպանել հայ լեզուն, սորվիլ մեր պատմութիւնը եւ ըլլալ տիպար հայ աշակերտներ։ Հանդէսի վերջին բաժինով, աշակերտները արտայայտեցին ամանորի եւ Ս. Ծննդեան տօնի բարեմաղթութիւններ ու շնորհաւորութիւններ։

Այնուհետեւ, Ս. Ծննդեան ու ամանորի երգերով, ընթացք առաւ տօնածառին հեքիաթը։ Ուշագրաւ եւ գնահատելի էին աշակերտներուն համաչափ եւ գեղեցիկ առոգանութեամբ արտայայտութիւնները։

Աւարտին, Առաջնորդ Սրբազանը արտասանեց գնահատանքի խօսք եւ մտերմիկ զրոյցի մը ճամբով, ուղղեց իր պատգամը։ Ան առանձնաբար գնահատեց աշակերտներուն մատուցումն ու ուսուցիչներուն եւ ծնողներուն գուրգուրոտ աշխատանքը, նշելով, որ այս յայտագիրին ճամբով, աշակերտները ուսուցիչի դեր կատարած են, յիշեցնելով հեքիաթն ու հայութեան հաւատարմութեան խոստումը։ Առաջնորդ Սրբազանը աշակերտները նմանցուց հրեշտակներու, որոնք կը վայելեն Աստուծոյ օրհնութիւնը, մաղթեց, որ Ս. Ծննդեան տօնին առիթով, երկինքի աստղերը լուսաւորեն յառաջիկայ տարուան իւրաքանչիւր օրը եւ հաւատք, յոյս ու սէր տարածեն բոլորի հոգիներուն ու յարկերուն տակ, հեռու վտանգներէ ու տագնապներէ։

Աշակերտները յուշանուէրներ բերած էին Առաջնորդ Սրբազանին, որ իր կարգին, մանուկներուն նուիրեց Յիսուսի Ս. Ծննդեան դրուագը ներկայացնող պատկերներ։

Print Friendly, PDF & Email

ՎԵՐՋԻՆ ԼՈՒՐԵՐ

Արեւմտեան Մեր Թեմէն Երիտասարդներ Կը Մասնակցին Կաթողիկոսարանի Երիտասարդական Ամառնային Խտացեալ Դասընթացքին

Նկատի ունենալով ընդհանրապէս երիտասարդութեան ու յատկապէս համալսարանական երիտասարդներու կարեւոր դերակատարութիւնը մեր ազգային-եկեղեցական կեանքէն ներս եւ այս գծով Մեծի Տանն Կիլիկիոյ... [...]

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

August 18, 2019 August 11, 2019

ԼՈՒՐԵՐՈՒ ԱՐԽԻՒ