Ս. Ծննդեան Տօնին Առիթով Ջրօրհնէք Կլենտէյլի «Մեմորիըլ» Հիւանդանոցին Մէջ

Համաձայն տարիներու բարի աւանդութեան, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Երեքշաբթի, 8 Յունուար 2019-ի կէսօրին այցելեց Կլենտէյլի «Մեմորիըլ» հիւանդանոցը եւ Ս. Ծննդեան ու Աստուածայայտնութեան տօնին առիթով աղօթքի պահ մը ունեցաւ անոր յարկին տակ, հիւանդանոցի պատասխանատուներուն ներկայութեամբ։ Առաջնորդ Սրբազանին կ’ընկերանային Արժ. Տ. Նարեկ Աւ. Քհնյ. Փեհլիվանեան, Տ. Վազգէն Աւ. Քհնյ. Աթմաճեան եւ Տ. Կոմիտաս Աւ. Քհնյ. Թորոսեան։

Առաջնորդ Սրբազանն ու հոգեւորականները դիմաւորուեցան հիւանդանոցի նախագահ Տիկին Ճիլ Ուելթընի, պատասխանատուներէն Տիկին Մէրի Ֆիլիփեանի, հոգեւոր խորհրդատու Քէսի Մըքարթիի եւ անձնակազմի անդամներու կողմէ։ Ներկայ էին Կլենտէյլի քաղաքապետական խորհուրդի անդամ Փօլա Տըվայն, ոստիկանապետ Քարլ Փովիլայթիս եւ ոստիկանապետութեան անդամներ, ներկայի հրշէջներու բաժանմունքի պետէր Սիլվիօ Լանզաս ու Պիլ Լինչ, դիւանագիտական ներկայացուցիչներ եւ ՀՕՄ-ի անդամներ։

Տիկին Ուելթըն ողջունեց Առաջնորդ Սրբազանին ու հոգեւորականներու ներկայութիւնը եւ շնորհակալութիւն յայտնեց, որ տարիներէ ի վեր, տօնական օրերու եւ այլապէս, անոնք հոգեւոր մատակարարութիւն կը տրամադրեն այս յարկին տակ խնամք ստացողներու։

Առաջնորդ Սրբազանը արտասանեց ողջոյնի խօսք՝ հիւրընկալներուն ու անոնց խնամքը վայելողներուն մաղթելով առողջութիւն եւ բարի ու խաղաղ տարի մը։ Ան գոհունակութիւն յայտնեց, որ անգամ մը եւս առիթ կ’ունենայ այցելելու այս հիւանդանոցը, աւետելու համար Աստուածորդւոյն Ս. Ծնունդը։ Խօսելով այս տօնին մասին՝ բացատրեց, թէ հայերս 6 Յունուարին տօնեցինք Ս. Ծնունդն ու Աստուածայայտնութիւնը եւ Մկրտութիւնը, տօն մը՝ որ միայն մէկ օրով չի սահմանափակուիր, որովհետեւ Քրիստոսի Ս. Ծնունդը հզօր, գեղեցիկ եւ մնայուն վկայութիւն մըն է մարդ արարածին հանդէպ Աստուծոյ սիրոյն ու հաւատարմութեան. Աստուած մարդը ազատագրեց մեղքի կապանքներէն ու անոր պարգեւեց յաւիտենական կեանք, շնորհեց լոյս եւ յոյս, հետեւաբար, հաւատարմութիւնը, սէրը, ներդաշնակութիւնը, խոնարհութիւնն ու բարի կամեցողութիւնը կը մնան այս տօնին անժամանցելի պատգամները։ Վերջապէս, Առաջնորդ Սրբազանը գնահատանքով արտայայտուեցաւ հիւանդանոցի անձնակազմին եւ բժիշկներուն մարդասիրական ու մասնագիտական ծառայութիւններուն մասին, մաղթելով, որ օրհնուած ջուրը առողջութիւն ու մաքրութիւն պարգեւէ այս հաստատութեան յարկին տակ խնամք ստացողներուն ու խնամողներուն։

Տեղի ունեցաւ Ս. Ծննդեան տօնին յատուկ արարողութիւն՝ տօնին նուիրուած շարականներով, աւետարանական ընթերցումով եւ ջրօրհնէքով։ Աղօթքի պահէն եւ ընդունելութենէն ետք, Առաջնորդ Սրբազանն ու քահանայ հայրերը առաջնորդուեցան հիւանդանոցի սենեակներու բաժինը, ուր Առաջնորդ Սրբազանը յատկապէս օրհնեց նորածին մանուկ մը ու իր մայրը։

Print Friendly, PDF & Email

ՎԵՐՋԻՆ ԼՈՒՐԵՐ

Յարութ Պարսամեան Ուսանողական Կրթաթոշակի Դիմումնագիրներու Ընդունում 2019-2020 Տարեշրջանին Համար

Արեւմտեան Թեմի բարեխնամ Առաջնորդ Բարձր. Տ. Մուշեղ Արք. Մարտիրոսեան, Ազգային Վարչութիւնն ու «Պարսամեան» Կրթաթոշակի Յանձնախումբը այսու կը յայտարարեն, թէ ուսումնական... [...]

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

June 23, 2019 June 16, 2019

ԼՈՒՐԵՐՈՒ ԱՐԽԻՒ