Ս. Աստուածածնի Վերափոխման Տօնին Առիթով՝ Եպիսկոպոսական Ս. Պատարագ, Խաղողօրհնէք եւ Մատաղօրհնէք Կլենտէյլի Ս. Աստուածածին Եկեղեցւոյ Մէջ

Կիրակի, 18 Օգոստոս 2019-ին, Ս. Աստուածածնի վերափոխման տօնը հանդիսաւորապէս նշուեցաւ մեր Թեմի բոլոր եկեղեցիներուն մէջ Ս. Պատարագի մատուցումով եւ աւանդական խաղողօրհնէքի արարողութեամբ։ Այս առիթով, համանուն եկեղեցւոյ անուանակոչութեան օրը, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ մատուցանեց Կլենտէյլի Ս. Աստուածածին եկեղեցւոյ մէջ, յաւուր պատշաճի քարոզեց եւ կատարեց խաղողի ու մատաղի օրհնութիւն։ Իսկ Առաջնորդական փոխանորդ Գերշ. Տ. Թորգոմ Եպս. Տօնոյեան Ս. Պատարագ մատուցանեց, սրբապատկերի օծում եւ խաղողօրհնէք կատարեց Սան Ֆրանսիսքոյի Ս. Գրիգոր Լուսաւորիչ եկեղեցւոյ մէջ։

Ս. Սեղանին սպասարկեցին եկեղեցւոյ հոգեւոր հովիւներէն՝ Արժ. Տ. Վազգէն Աւ. Քհնյ. Աթմաճեանը եւ Արժ. Տ. Արտակ Քհնյ. Տէմիրճեանը, ինչպէս նաեւ սարկաւագաց ու դպրաց դասը:

Արարողութեանց ներկայ էին ժողովականութեան անդամներ եւ հաւատացեալներու ստուար բազմութիւն մը, որ եկած էր հաղորդակից դառնալու օրուան խորհուրդին եւ հոգեպէս համակուելու Ս. Աստուածածնի տօնին խորհուրդով։

Առաջնորդ Սրբազան Հայրը իր օրուայ քարոզի բնաբանը ընտրած էր Ս. Աստուածածնին նուիրուած աղօթքէն. «Ո՜վ փառաւորեալ եւ ամենօրհնեալ միշտ Ս. Կոյս Աստուածածին Մարիամ մայր Քրիստոսի, քու որդւոյդ եւ մեր Աստուծոյն մօտ մեր խնդրանքները հասցուր» (Ժամագիրք)։ Ան անդրադարձաւ Ս. Աստուածածնի երկրաւոր ամբողջ կեանքին՝ իր ծնունդէն սկսելով մինչեւ վերափոխումը, մատնանշելով, որ Աստուածամայրը իր կեանքի ընթացքին ապրեցաւ համեստութեամբ, առաքինութեամբ եւ իր մայրական լիակատար պարտականութիւնները առանց երկբայելու ի կատար ածեց։

Առաջնորդ Սրբազանը ընդգծեց, որ Ս. Մարիամը մեր ժողովուրդի կեանքին մէջ դարձաւ ճշմարիտ մայրութեան խորհրդանի՛շ՝ իր պատուիրանապահութեամբ, զեղուն սիրով, ամբողջական նուիրումով եւ անարատ սրբութեամբ։ Ան հրաւիրեց իւրաքանչիւր հաւատացեալ Աստուածամօր նման Աստուծոյ կամքին հնազանդելու եւ իր օրինակին հետեւելով՝ Աստուծոյ պատգամաբերին՝ Գաբրիէլ Հրեշտակապետին «Այո՛» ըսելու, անոր բարեխօսութիւնը խնդրելու ժամանակ՝ Երկնաւոր Հօր Աստուծոյ հաւատարիմ զաւակները ըլլալու մեր ուխտը վերանորոգելու, Հայաստանեայց Առաքելական Ս. Եկեղեցւոյ դաւանանքին կառչած մնալու եւ մեր ընտանիքները վերածելու խաղաղութեան յարկի, սրբութեան տաճարի, ազգային հոգիի ու շունչի խորանի։

Ան իր պատգամը աւարտեց աղօթելով Ս. Աստուածածնին, որ բարեխօսէ մեր հայրենիքի խաղաղութեան եւ բարօրութեան համար եւ վերանորոգէ բոլորին կեանքը՝ սիրոյ, խոնարհութեան, հնազանդութեան, հաւատքի եւ յոյսի սերմերը ցանելով բոլորին սիրտերուն եւ հոգիներուն մէջ։

Ս. Պատարագի աւարտին, Առաջնորդ Սրբազան Հայրը եկեղեցւոյ հայրերու կանոններուն համաձայն ընթերցեց Աստուածամօր ուղղուած գոհաբանական աղօթքը եւ օրհնեց Ս. Աստուածածնին որպէս երախայրիք ընծայաբերուած մատաղն ու խաղողը։ Ներկայ հաւատացեալները օրհնուած խաղողէն ու մատաղէն բաժին առնելով՝ օրուան խորհուրդով լիցքաւորուած վերադարձան իրենց տուները։

Print Friendly, PDF & Email

ՎԵՐՋԻՆ ԼՈՒՐԵՐ

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 13, 2019 October 6, 2019

ԼՈՒՐԵՐՈՒ ԱՐԽԻՒ