Եպիսկոպոսական Ս. Պատարագ եւ Մատաղօրհնէք Էնսինոյի Ս. Նահատակաց Եկեղեցւոյ Անուանակոչութեան եւ Օծման 56-ամեակին Աոիթով

Կիրակի, 3 Նոյեմբեր 2019-ին, Էնսինոյի Ս. Նահատակաց եկեղեցւոյ անուանակոչութեան տօնին ու օծման 56-րդ տարեդարձին առթիւ, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ մատուցանեց, իր պատգամը ուղղեց եւ արարողութեան աւարտին կատարեց մատաղի օրհնութիւնը։ Ս. Սեղանին սպասարկեց եկեղեցւոյ հոգեւոր հովիւ Արժ. Տ. Ռազմիկ Աւ. Քհնյ. Խաչատուրեան։

Նշենք, որ Առաջնորդ Սրբազանը նոր վերադարձած էր Անթիլիասի Մայրավանքէն, ուր մասնակցած էր Ազգ. Կեդրոնական Վարչութեան Կրօնական եւ Խառն Ժողովներու նիստերուն։ Ան առաջին հերթին Ս. Աթոռոյս Գահակալ Ն.Ս.Օ.Տ.Տ. Արամ Ա. Կաթողիկոսի օրհնութիւնները փոխանցեց, ապա անդրադարձաւ Միջին Արեւելքի մէջ տեղի ունեցող դէպքերուն, աղօթք բարձրացնելով Լիբանանի, Սուրիոյ եւ Իրաքի խաղաղութեան եւ ապահովութեան համար։

Առաջնորդ Սրբազանը իր քարոզի բնաբանը ընտրած էր Լերան Քարոզի «Երանի՜ հեզերուն, որովհետեւ անոնք պիտի ժառանգեն երկիրը» հատուածէն (Մտ. 5.5) եւ օրուան աւետարանական «Մայրս եւ եղբայրներս ասոնք են, որոնք Աստուծոյ խօսքը կը լսեն եւ կը գործադրեն» (Ղկ. 8.21) համարներէն։ Անդրադառնալով նախորդ օրուան Ամենայն Սրբոց տօնին, ան նշեց, որ մեր սուրբերը՝ հին եւ նոր, յայտնի եւ անյայտ իրենց կեանքը ապրեցան որպէս Քրիստոսի մայրն ու եղբայրները, որովհետեւ Աստուծոյ խօսքը լսեցին ու գործադրեցին եւ երկիրը ժառանգեցին իրենց հեզութեան շնորհիւ։

Խօսելով հեզութեան առաքինութեան մասին, Առաջնորդ Սրբազանը հաստատեց, որ «Հեզը այն մարդն է, որ իր կեանքի ընթացքին Աստուծոյ ներկայութիւնը կը ցանկայ, զԱստուած կը դաւանի, Ս. Հոգւոյ պտուղներով հարստացած՝ իր կեանքը սիրով, ուրախութեամբ, համբերատարութեամբ, բարութեամբ, ազնուութեամբ, հաւատարմութեամբ եւ ժուժկալութեամբ կ’ապրի, իսկ Աստուծոյ նմանելով՝ Անոր սէրը մարդկութեան հանդէպ ո՛չ միայն կը զգայ, այլեւ կ’ապրի» (Հմմտ. Գղ. 5.22-23)։

Առաջնորդ Սրբազանը մատնանշեց, որ բոլոր սուրբերը հրաշագործներ չէին. այսօր մեր մէջ սուրբեր կրնանք ունենալ եւ մենք եւս ցանկանք նմանիլ անոնց՝ մեր հեզութեամբ, Աստուծոյ ներկայութիւնը, կարիքը եւ անհրաժեշտութիւնը զգալով, զԻնք ընդունելով որպէս մեր Փրկիչը, Անոր խօսքը լսելով ու գործադրելով, որպէսզի Ս. Հոգին գայ եւ բնակութիւն հաստատէ մեր սիրտերուն մէջ։ Ապա կոչ ուղղեց՝ ըսելով. «Անուանակոչութեան այս տօնին, վերանորոգուինք աղօթքով, խոստովանութեամբ ու Աստուծոյ խօսքին մտերմութեամբ, որպէսզի Ս. Հոգւոյ պտուղներով արդիւնաւորուինք եւ արգասաւորուինք եւ Աստուծոյ ներկայութիւնը ընդմիշտ վայելենք»։

Առաջնորդ Սրբազանը իր քարոզի աւարտին շնորհաւորեց ծխական մեծ ընտանիքը, ինչպէս նաեւ գնահատեց հոգեւոր հովիւը, երեսփոխանները, Հոգաբարձութիւնը, Տիկնանց Միութիւնը, եկեղեցւոյ սպասարկողներն ու դպրաց դասի անդամները եւ յորդորեց հեզութեամբ եւ նուիրուածութեամբ ծառայելու եւ իրենց ուխտը վերանորոգելով՝ շարունակելու իրենց նուիրումը եկեղեցւոյ անդաստանէն ներս։

Յետ Ս. Պատարագի, Առաջնորդ Սրբազանը նախագահեց հոգեհանգստեան պաշտօնին եւ կատարեց մատաղի օրհնութիւնը։ Աղօթք բարձրացուեցաւ եկեղեցւոյ հոգեւորական եւ աշխարհական բոլոր ծառայողներու հոգիներու խաղաղութեան համար։ Այս տարուան մատաղը հովանաւորած էր Տիկին Ժանէթ Վարդազարեանը ի յիշատակ իր ամուսնոյն՝ Ռազմիկ Վարդազարեանի։

Արարողութիւնը վերջ գտաւ «Կիլիկիա» մաղթերգով։

Print Friendly, PDF & Email

ՎԵՐՋԻՆ ԼՈՒՐԵՐ

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

November 17, 2019 November 10, 2019