Չորեքշաբթի, 16 Հոկտեմբեր 2019-ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ընդունեց այցելութիւնը Պոլսոյ Հայ Կաթողիկէ համայնքի Առաջնորդ եւ Մխիթարեան Միաբանութեան մօտ պապական նուիրակ Գերապայծառ Տ. Լեւոն Արք. Զէքիեանի։ Հիւր հոգեւորականին կ’ընկերանար Տիար Արամ Պօղոսեան։ Հոգշ. Տ. Սմբատ Վրդ. Սապունճեան եւ Հոգշ. Տ. Աշոտ Աբղ. Խաչատուրեան մասնակցեցան հանդիպումին։
Հանդիպումը անցաւ մտերմիկ մթնոլորտի մէջ եւ առիթ եղաւ ընդհանուր գիծերու մէջ զրուցելու մեր գաղութի եւ Պոլսոյ հայ համայնքի կեանքը յուզող հարցերու շուրջ։ Կողմերը փոխադարձաբար գոհունակութիւն յայտնեցին հանդիպումին համար, իսկ Առաջնորդ Սրբազան Հայրը իր կարգին յաջողութիւն մաղթեց Գերապայծառին իր աստուածահաճոյ առաքելութեան եւ ազգանուէր գործունէութեան մէջ։