ԵՊԻՍԿՈՊՈՍԱԿԱՆ Ս. ՊԱՏԱՐԱԳ ԵՒ ՄԱՏԱՂՕՐՀՆԷՔ Ս. ՆԱՀԱՏԱԿԱՑ ԵԿԵՂԵՑՒՈՅ ՕԾՄԱՆ 49-ՐԴ ՏԱՐԵԴԱՐՁԻՆ ԱՌԹԻՒ

Կիրակի, 4 Նոյեմբեր, 2012-ը Սրբոց Նահատակաց եկեղեցւոյ ծխական համայնքին համար եղաւ ուրախութեան ու յիշատակելի օր մը։

Արդարեւ, եպիսկոպոսական հանդիսաւոր Ս. Պատարագով նշուեցաւ եկեղեցւոյ օծման 49-րդ տարեդարձը։ Պատարագեց եւ օրուան պատգամը փոխանցեց Թեմիս Բարեջան Առաջնորդ Բարձշ. Տ. Մուշեղ Ս. Արք. Մարտիրոսեան։ Ս. խորանին սպասարկեց եկեղեցւոյ հոգեւոր հովիւ Արժ. Տ. Ռազմիկ Քհնյ. Խաչատուրեան։ Ներկայ էին Ազգային Վարչութեան անդամ Դոկտ. Տիգրան Պապիկեան, շրջանի պատկան մարմիններու եւ միութեանց ներկայացուցիչներ։

Առաջնորդ Սրբազան Հայրը իր քարոզին մէջ գոհութիւն յայտնեց Աստուծոյ, որ բոլորս արժանի դարձուց Սրբոց Նահատակաց Եկեղեցւոյ հիմնադրութեան 49-րդ տարեդարձին նուիրուած Ս. եւ Անմահ Պատարագին եւ պատգամեց.

»Սրբոց Նահատակաց եկեղեցւոյ հիմնադրութեան տարեդարձը մեր ծառայական կեանքի ուխտի վերանորոգման առիթ է, որովհետեւ անիկա տօնն է բոլոր սուրբերուն, յայտնի կամ անյայտ, որոնք իրենց երկրաւոր կեանքը, Աստուծոյ պատուիրանները եւ խօսքերը կեանքի վերածելու ծառայեցուցին եւ իրենց ծառայական կեանքով, տքնութեամբ ու ճգնութեամբ հայու ոգին կերտեցին, հայուն ինքնութիւնը ապահովեցին, եւ հայ ժողովուրդի յաւերժութիւնը վաստակեցան, որպէսզի մենք այսօր Հայ Առաքելական Ս. Եկեղեցի ունենալով, մեր հայրերուն հաւատքով առաջնորդուինք եւ Աստուծոյ շնորհքով մեր կեանքը առաջնորդենք ճշմարտութեամբ ու սիրով։« Սրբազան Հայրը ուրախութիւն յայտնեց, որ Ս. Պատարագին ներկայ են Սրբոց Նահատակաց Եկեղեցւոյ կիրակնօրեայ դպրոցի եւ »Ֆերահեան« ազգային վարժարանի 2-րդ կարգի աշակերտները, եւ մաղթեց, որ անոնք աճին Աստուծոյ շնորհքով, ծնողներուն դաստիարակութեամբ եւ ուսուցիչներու ու կրթական մշակներու հետեւողութեամբ ըլլան շնորհքով օծուն, խելացի, ազնիւ եւ բարի զաւակները մեր ժողովուրդին։

Սրբազան Հայրը նաեւ յիշեց, թէ այսուհետեւ, ամէն տարի, Նոյեմբեր ամսուան առաջին Կիրակիին, հոգեհանգստեան յատուկ պաշտօն պիտի կատարուի Հ.Մ.Ը.Մ.ի անմահ գործիչներու յիշատակին, նաեւ աղօթք պիտի բարձրացուի մերօրեայ բոլոր նուիրեալներուն եւ ազնիւ ծառայողներու բարւոք գործունէութեան համար։ Քարոզի աւարտին Առաջնորդ Սրբազանը օրհնեց յիշատակը բոլոր անոնց, որոնք հաւատքով հիմը դրին այս եկեղեցւոյ, աղօթեց եկեղեցւոյս այժմու սպասարկուներուն համար։

Պատարագի աւարտին, տեղի ուեցաւ հոգեհանգստեան պաշտօն համայն Հ.Մ.Ը.Մ.ի ննջեցեալներուն, նաեւ հոգիներուն համար բոլոր անոնց, որոնք եկեղեցւոյ անդաստանին մէջ գործեցին ու անցան, եւ այժմ կը ննջեն անոր հովանիին ներքեւ։

Առաջնորդ Սրբազան Հօր գլխաւորութեամբ, թափօրը առաջնորդուեցաւ »Աւետիսեան« սրահ, ուր եկեղեցւոյս Տիկնանց Միութեան կողմէ պատրաստուած էր մատաղը, որ հովանաւորած էին Տիկին Ժանէթ Զաքարի եւ Տիկին Տայան Ազիզեան, ի յիշատակ իրենց հին եւ նոր ննջեցեալներուն։

Մատաղի օրհնութիւնը կատարելով, Սրբազան Հայրը բարձր գնահատեց տիկնանց միութեան եւ հոգաբարձութեան անդամներուն մատուցած ծառայութիւնը, ինչպէս նաեւ մատաղին իրենց նիւթական օժանդակութիւնը բերող բոլոր հաւատացեալները։ Ապա Ազգային Վարչութեան անդամ Դոկտ. Տիգրան Պապիկեան, յանուն Ազգային Վարչութեան, շնորհաւորեց եկեղեցւոյ օծման 49ամեակը եւ բարձր գնահատեց Հովիւին ու հոգաբարձութեան նուիրեալ ծառայութիւնը, յաջողութիւն մաղթելով բոլորին եկեղեցանուէր աշխատանքներուն։

»Պահպանիչ«ով, »Կիլիկիա« մաղթերգով եւ »Մեր Հայրենիք« քայլերգով վերջ գտաւ հոգեպարար արարողութիւնը։

Շաբաթ, 3 Նոյեմբերի երեկոյեան, Ֆերահեան վարժարանի »Աւետիսեան« սրահին մէջ նշուեցաւ եկեղեցւոյ օծման 49-րդ տարեդարձը, հովանաւորութեամբ Առաջնորդ Սրբազան Հօր եւ կազմակերպութեամբ եկեղեցւոյ հոգեւոր հովիւի, Հոգաբարձութեան եւ Տիկնանց Օժանդակ Մարմինին։

Ձեռնարկին պաշտօնական բաժինը սկսաւ Միացեալ Նահանգներու եւ Հայսատանի Հանրապետութեան քայլերգներով, կատարողութեամբ Թուխման Խաչատուրեանի եւ դաշնակի ընկերակցութեամբ Յովիկ Քէօշկէրեանի։

Բացման խօսքը կատարեց ու յայտագիրը վարեց հանդիսավարը՝ Պրն. Նիկոլ Մանուկեան։ Ապա ան բեմ հրաւիրեց եկեղեցւոյ հոգեւոր հովիւ Արժ. Տ. Ռազմիկ Քհնյ. խաչատուրեանը, որ սեղանօրհնէքէն վերջ փոխանցեց իր սրտի խօսքը։ Հոգաբարձութեան անդամներէն Տիկին Մարալ Դարբինեանը արտասանեց ողջոյնի խօսք։

Ապա հանդիսավարը բեմ հրաւիրեց Թեմիս բարեջան Առաջնորդ Բարձշ. Տ. Մուշեղ Ս. Արք. Մարտիրոսեանը, որպէսզի իր պատգամը փոխանցէ։

Սրբազան Հայրը փառք ու գոհունակութիւն տուաւ Աստուծոյ, որ անգամ մը եւս Սրբոց Նահատակաց Եկեղեցւոյ մեծ ընտանիքը եւ Սան Ֆերնանտօ Հովիտի կազմակերպութիւնները եւ միութիւնները, Ազգային վարժարանով միասին եւ ներկաներով, համախմբուած են տօնելու եկեղեցւոյ հիմնադրութեան 49-րդ տարեդարձը։ »Ըստ աւանդութեան, մեծ տօներէ առաջ ընդհանրապէս նախատօնակ կամ նաւակատիք տեղի կþունենայ, եւ նկատելով որ յառաջիկայ տարի մեր եկեղեցւոյ 50ամեակն է, վստահ ենք որ այս հաւաքը իբրեւ նաւակատիք եւ իբրեւ նախապատրաստութիւն պիտի ծառայէ ձեր բոլորին մասնակցութեամբ, եւ իբրեւ այդպիսին։ Մեր ժողովուրդը աւանդապահ ժողովուրդ է, ան իր եկեղեցիին կը փարի, իր եկեղեցին կը յարգէ ու կը սիրէ իբրեւ ազգային նկարագիրի եւ ազգային ինքնութեան օրրան, եւ այդ իսկ պատճառով, ազգային աւանդութիւններով, հաւատքի ճանապարհով, յարատեւութեան ոգիով, փոխադարձ յարգանքով եւ մանաւանդ կարգապութեամբ, մեր եկեղեցւոյ շինութեան համար անկարելին կարելի պէտք է դարձնենք«։ Ան իր խօսքը եզրափակեց ընդգծելով, որ »Ծառայութիւնը հաւատքի գործ է, եկեղեցւոյ ծառայութիւնը հաւատքով արտայայտուած ծառայութիւն է, իսկ հաւատքը առանց գործի մեռած է«։ Առաջնորդ Սրբազանը գնահատեց եկեղեցւոյ հոգեւոր հովիւ, բոլոր գործակիցները եւ բարերարները, որոնք հետեւողականօրէն յառաջ կը տանին եկեղեցւոյ պայծառացման աշխատանքները։

Print Friendly, PDF & Email

ՎԵՐՋԻՆ ԼՈՒՐԵՐ

2020 – Յատուկ Խնամքի Կարօտ Հայորդիներու Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

February 23, 2020 February 16, 2020

ԼՈՒՐԵՐՈՒ ԱՐԽԻՒ