Շաբաթ, 7 Նոյեմբեր 2015ին, սկիզբ առաւ Հ.Մ.Ը.Մ.ի սկաուտներուն յատուկ «Ս. Մեսրոպ Մաշտոց» շքանշանի այս տարուան դասընթացքը, որուն ընթացքին, սկաուտներուն եւ արենոյշներուն հիմնական ու կարեւոր գիտելիքներ կը տրուին մեր եկեղեցւոյ պատմութեան ու դաւանանքի, ինչպէս նաեւ ազգի պատմութեան հանգրուանային իրադարձութիւններուն մասին: Դասընթացքը յաջողութեամբ աւարտողները Թեմիս Առաջնորդ Սրբազանին՝ Բարձր. Տ. Մուշեղ Արք. Մարտիրոսեանի ձեռամբ կ’արժանանան «Ս. Մեսրոպ Մաշտոց» շքանշանին:
Առաջին հանդիպումը տեղի ունեցաւ Էնսինոյի Ս. Նահատակաց Եկեղեցւոյ յարկին տակ, «Եղիա Սարաֆեան» դահլիճին մէջ. դասախօսն էր Արժ. Տ. Վազգէն Քհնյ. Աթմաճեան: Ներկայ էին Հ.Մ.Ը.Մ.ի Շրջանային Վարչութեան ներկայացուցիչը, սկաուտական պատասխանատուներ. դասընթացքին կը հետեւին 25 սկաուտներ եւ արենոյշներ:
Տէր Հօր դասախօսութիւնը լայնածիր էր. ան ներկայացուց մեր եկեղեցւոյ ծագումը, բացատրութիւններ տուաւ եկեղեցւոյ կառոյցին, ներքին բաժանումներուն հոգեւորականներու հանդերձանքին, եկեղեցւոյ մէջ նիստ ու կացի պատշաճութիւններուն մասին, միաժամանակ պատասխանելով մասնակիցներուն հարցումներուն: Աւարտին, փոխանցուած տեղեկութիւններուն մասին սկաուտները անցան քննութենէ, ապա, հանդիպումը վերջ գտաւ հաւաքական ճաշով: