Միջ-Դպրոցական Ասմունքի Մրցանակաբաշխումի Հանդէս


Չորեքշաբթի, 15 Յունիս 2016ի երեկոյեան, Ազգային Առաջնորդարանի «Տիգրան եւ Զարուհի Տէր Ղազարեան» սրահին մէջ տեղի ունեցաւ միջ-դպրոցական ասմունքի մրցումին աւարտական հանդէսը, հովանաւորութեամբ եւ ներկայութեամբ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի: Ներկայ էին Արժ. Տ. Նարեկ Աւ. Քհնյ. Փեհլիվանեան, Տ. Ղեւոնդ Քհնյ. Քիրազեան, Ազգ. Վարչութեան նորընտիր անդամներէն Տիար Ալեք Պաղտասարեան, Ազգ. Վարժարաններու Խնամակալ Մարմինի ատենապետ Տիկին Լիզա Կապուտեան եւ անդամներ, դատական կազմի անդամներ՝ Տիկին Թագուհի Արզումանեան եւ Տիար Գրիգոր Օկարեան, կազմակերպիչ յանձնախումբի անդամ Տիար Միհրան Թումաճեան, որ յանձն առած էր հանդիսավարութիւնը, դաստիարակներ, ծնողներ եւ մշակութասէր հայորդիներ: Իբրեւ բանախօս հրաւիրուած էր Փրոֆ. Շուշան Կարապետեան:

Երեկոն սկսաւ աղօթքով: Հանդիսավարը ողջունեց հոգեւոր հայրերը, կրթական պատասխանատուներն ու ներկաները, շնորհակալութեան յատուկ խօսք ուղղեց 14 Մայիսի մրցումը հիւրընկալող Հայ Քոյրերու Վարժարանի տնօրէնութեան եւ բոլոր անոնց, որոնք մասնակից եղան այս ձեռնարկին կազմակերպման ու յաջողութեամբ պսակումին: Ան յիշեցուց, որ ասմունքի մրցումը տեղի ունեցած էր Շաբաթ, 14 Մայիսին, մասնակցութեամբ հայկական 7 վարժարաններէ աւելի քան 40 աշակերտներու, բաժնուած՝ տարիքային երեք խումբերու: Արցախի ապրիլեան ճակատումները իրենց ներգործութիւնը ունեցած էին աշակերտներուն վրայ, որոնք հայրենասիրական մթնոլորտի մէջ ու ապրող հայրենասիրութեամբ արտասանած էին մեծանուն գրողներու գործերը: Դատական կազմը, մասնակիցներուն մատուցումը քննարկելէ ետք, ճշդած էր մրցանակաւորները:

Մրցանակի արժանացած են հետեւեալ աշակերտները.-

Նախակրթարանի բաժինէն (4րդ, 5րդ եւ 6րդ դասարաններ), առաջին հանդիսացած է Արթուր Կնեազեան, Ազգային Ռոզ եւ Ալէք Փիլիպոս Վարժարանէն, 6րդ դասարան, երկրորդ հանդիսացած է Նիքոլ Զիփթիա, Հ.Բ.Ը.Մ.ի Մ. Մանուկեան-Տէմիրճեան Վարժարանէն, 4րդ դասարան, երրորդ՝ Մերի Ճաւահիրեան, Ազգային Մեսրոպեան Վարժարանէն, 6րդ դասարան:

Միջնակարգի բաժինէն՝ (7րդ, 8րդ եւ 9րդ), առաջին հանդիսացած է Արազ Պալեան, Ազգային Ս. Նահատակաց Ֆերահեան Վարժարանէն, 7րդ դասարան, երկրորդ՝ Անի Անմահունի, Ազգային Վահան եւ Անոյշ Շամլեան Վարժարանէն, 7րդ դասարան, եւ Նշան Պիլիկեան, Ազգային Ռոզ եւ Ալէք Փիլիպոս Վարժարանէն, 9րդ դասարան, իսկ երրորդ հանդիսացած է Սեւանա Այվազեան, Հ.Բ.Ը.Մ.ի Մանուկեան-ՏէմիրճեանՎարժարանէն, 7րդ դասարան:

Երկրորդականի բաժինէն (10րդ, 11րդ եւ 12րդ), առաջին հանդիսացած է Ալեքս Մանուկեան, Ազգային Մեսրոպեան Վարժարանէն, 11րդ դասարան, երկրորդ՝ Անուշ Ղուկասեան, եւ Վիքթորիա Սինքըկրանի, երկուքն ալ Ազգային Մեսրոպեան Վարժարանէն, 10րդ դասարան:

Մրցանակաւոր աշակերտները գեղարուեստական յայտագիրին մասնակցութիւն բերին ասմունքներով ու երաժշտական մատուցումով: Ասմունքի բաժինին մասնակցեցաւ նաեւ անցեալ տարուան մրցանակակիրներէն Անի Թովմասեան (Ազգ. Ռ. եւ Ա. Փիլիպոս Վրժ.), որ անցեալ ամառ մասնակցած էր Շուշիի մէջ ասմունքի համահայկական փառատօնին ու առաջին մրցանակը շահած էր:

Բանախօսը՝ Փրոֆ. Շ. Կարապետեան վեր առաւ այս ու նմանօրինակ ձեռնարկներուն կենսական դերը՝ հայ մանուկին ու պատանիին կեանքին մէջ մեր լեզուի կենսունակ պահպանման մէջ, շեշտելով, որ լեզուն սորվելու կողքին, նոյնքան կարեւոր է անոր կենդանի պահպանումը՝ զայն յարատեւօրէն գործածելով, իսկ այս առաջադրանքին կիրարկման ամէնէն պերճախօս վկայութիւնը եղաւ ասմունքի այս ձեռնարկը: Ան նկատեց, որ Լոս Անճելըսի մեր գաղութը իւրայատուկ միջավայր է, ուր հայերէնի երկու գլխաւոր ճիւղերը կողք կողքի կ’ապրին ու կը կենսաւորեն գաղութը, նոր սերունդներուն պարտ է ըլլալ լեզուին պահապանը, կրողն ու կենդանի պահողը: Ան դրուատիքով խօսեցաւ աշակերտներուն մատուցումներուն մասին եւ մաղթեց, որ անոնք ոչ միայն շարունակեն ասմունքի կիրարկումը, այլ նաեւ օր մը անոնց գրածները արտասանուին բեմերէ:

Գնահատանքի խօսքեր ուղղեցին դատական կազմի անդամները՝ Տիկին Թ. Արզումանեան եւ Տիար Գ. Օկարեան: Տիկին Արզումանեան շեշտը դրաւ մայրենիին իւրացման կարեւորութեան ու այս նպատակին իրագործման մէջ նման ձեռնարկներու կարեւորութեան վրայ, յիշելով Խ. Աբովեանի այն խօսքը, որ աշակերտին կը թելադրէ տասը լեզու սորվիլ, բայց մայրենին ամուր պահել: Ան աշակերտները յորդորեց իւրացնելու մեր լեզուին արմատները եւ շնորհակալութեան խօսք ուղղեց ծնողներուն, դաստիարակներուն եւ Ազգ. Առաջնորդարանին ու գործակիցներուն, այս ձեռնարկին մարմնաւորման համար: Տիար Գ. Օկարեան մեծ գոհունակութեամբ արտայայտուեցաւ աշակերտներուն մատուցման կարողութեան մասին, յիշեցուց, որ Ցեղասպանը աւելի քան 100 տարի առաջ կ’ուզէր միանգամընդմիշտ բնաջնջել հայութիւնը եւ միայն մէկ հայ պահել իբրեւ թանգարանային նմոյշ, սակայն այս ձեռնարկը նորագոյն ապացոյցն է, որ այդ Ցեղասպանը ձախողած է, եւ ինչպէս նշած է Սարոյեան՝ երբ քանի մը հայ իրարու քով գան, կը ստեղծեն փոքրիկ Հայաստան մը, ասմունքի այս մրցումն ալ մարմնաւորեց մեծ գրողին խօսքը։

Սրտի խօսք արտասանեց Ազգ. Վարչութեան նորընտիր անդամներէն Տիար Ալեք Պաղտասարեան, որ ասմունքի այս մրցումին հիմնադիրն է ու 5 տարիէ ի վեր կը կազմակերպէ Շուշիի համագաղութային ասմունքի մրցումները: Ան շնորհաւորեց ո՛չ միայն մրցանակաւորները, այլ մրցումին բոլոր մասնակցողները, որոնք յաղթական են նոյնինքն իրենց մասնակցութեամբ: Ան մաղթեց, որ աշակերտները շարունակեն այս ընթացքը եւ կոչ ուղղեց, որ եթէ կը փափաքին, մասնակից ըլլան Շուշիի փառատօնին, որ նախատեսուած է 1էն 5 Օգոստոսին, եւ որուն ներկաները մասնակից պիտի ըլլան նաեւ Սփիւռքի նախարարութեան «Արի Տուն» ծրագիրին:

Այնուհետեւ, տեղի ունեցաւ մրցանակաբաշխութիւնը, ձեռամբ Առաջնորդ Սրբազանին, Խնամակալ Մարմինի ատենապետուհիին եւ դատական կազմի անդամներուն: Մրցանակաւորները ստացան վկայագիրներ եւ յուշանուէրներ:

Եզրափակիչ խօսքը ուղղեց Առաջնորդ Սրբազանը: Ան յայտնեց, որ այս երեկոն հոգեկան վայելքի պահ մը եղաւ բոլորին համար, գնահատեց աշակերտներուն մատուցումն ու օրհնեց բոլորը: Ան պահը համեմատեց Յիսուսի երկրաւոր կեանքի այն դրուագին, երբ աշակերտներուն հետ Թափօր լեռ բարձրացած էր ու Մովսէս ու Եղիա մարգարէներու ներկայութեան՝ պայծառակերպուեցաւ եւ հոգեկան անսահման վայելքի պահ մը շնորհեց աշակերտներուն, որոնցմէ Պետրոս փափաք յայտնեց ընդմիշտ մնալ հոգեկան վայելքի այդ մթնոլորտին մէջ: Ան յայտնեց, որ այսօր, նման պահ մը ապրեցան ներկաները եւ աւելի՛ հայացան վստահաբար: Ան գնահատեց շնորհալի եւ տաղանդաւոր աշակերտներուն հոգածութիւն տրամադրող ծնողները, դաստիարակները եւ տնօրէնները, ինչպէս նաեւ ձեռնարկին կազմակերպման ու մարմնաւորման նպաստ բերող Ազգ. Վարչութիւնը, Խնամակալ Մարմինը, յանձնախումբն ու գործակիցները, ծնողները: Խօսքը աշակերտներուն ուղղելով, Առաջնորդ Սրբազանը, մէջբերելով Սիլվա Կապուտիկեանի «Խօսք իմ որդուն» բանաստեղծութեան այն տողերը, ուր կ’ըսուի, թէ մեր բազմադարեան լեզուն մանկացած է իր մանկիկին շուրթերուն, նկատեց, որ այս խօսքը մարմնաւորուած է նաեւ այս մրցումին, երբ հայերէնը հոսած է մանուկներու եւ պատանիներու շուրթերէն: Ան յորդորեց, որ աշակերտները մայրենին կենդանի պահեն իբրեւ գանձ ու հարստութիւն: Ան շեշտեց, որ աշակերտները մեր ժողովուրդին մէկական զինուորներն են, ու մաղթեց, որ յառաջիկայ տարի, այս մրցումին մասնակիցները աճին:

Հանդէսը վերջ գտաւ Առաջնորդ Սրբազան Հօր «Պահպանիչ»ով ու «Կիլիկիա»ի եւ «Մեր Հայրենիք»ի խմբերգումով:

Print Friendly, PDF & Email

ՎԵՐՋԻՆ ԼՈՒՐԵՐ

Միացեալ Նահանգներու Ներկայացուցիչներու Տունը Ընդունեց Հայոց Ցեպասպանութիւնը Որդեգրող Թիւ 296 Բանաձեւը

Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, Կրօնական Ժողովն ու Ազգային Վարչութիւնը, կ՛ողջունեն Երեքշաբթի 29 Հոկտեմբեր 2019-ին, Հայոց Ցեղասպանութիւնը... [...]

2019 – Հայ Մամուլի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

Առաջնորդ Սրբազան Հօր Ս. Զատկուան Պատգամը

Ս. ՅԱՐՈՒԹԻՒՆԸ՝ ՅԱՂԹԱՆԱԿ ՃՇՄԱՐՏՈՒԹԵԱՆ ԵՒ ԱՐԴԱՐՈՒԹԵԱՆ Յարութեան տօնին յաղթական աւետիսը դարձեալ ցնծութեամբ կը լեցնէ մեր կեանքը, իր լոյսով կը պայծառացնէ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

December 8, 2019 December 1, 2019