Հինգշաբթի, 12 Սեպտեմբեր 2019-ին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ընդունեց այցելութիւնը Լիբանանի Ամերիկեան Հիմնարկի տնօրէն խորհուրդի նախագահ՝ Տիար Ժոզէֆ Քարաքիին, որ անձամբ եկած էր հրաւիրելու Առաջնորդ Սրբազանը Լոս Անճելըսի մէջ կայանալիք «House of Lebanon» մշակութային կեդրոնի բացման արարողութեան։
Հանդիպումը առիթ ընծայեց քննարկելու Լոս Անճելըսի հայ եւ լիբանանցի համայնքերու երկարամեայ յարաբերութիւնն ու գործակցութիւնը, ինչպէս նաեւ Առաջնորդարանի եւ Հիմնարկի միջեւ սերտ կապերը։
Առաջնորդ Սրբազանը շնորհակալութիւն յայտնեց Տիար Քարաքիին հրաւէրին եւ այս սիրալիր հանդիպումին համար եւ յաջողութիւն մաղթեց Հիմնարկի յետագայ ծրագիրներուն։