Հիւսիսային Ամերիկայի Երեք Առաջնորդներու Առցանց Հանդիպում

Ուրբաթ, 5 Մարտ 2021-ին, Հիւսիսային Ամերիկայի երեք թեմերու Առաջնորդները՝ Գերշ. Տ. Անուշաւան Ս. Արք. Դանիէլեան (Արեւելեան Թեմ), Գերշ. Տ. Բաբգէն Ս. Արք. Չարեան (Գանատայի Թեմ) եւ Գերշ. Տ. Թորգոմ Ս. Եպս. Տօնոյեան (Արեւմտեան Թեմ) առցանց հանդիպում մը ունեցան, որուն ընթացքին խորհրդակցեցան՝ եկեղեցական, կրօնական, երեք գաղութները յուզող անմիջական ու հասարակաց հարցերու, կրթական ու հոգեմտաւոր աշխատանքներու, ինչպէս նաեւ հայութեան դիմագրաւած ընդհանրական մարտահրաւէրներու մասին:

Անուշաւան եւ Բաբգէն արքեպիսկոպոսները առաջին հերթին շնորհաւորեցին Թորգոմ Եպիսկոպոսը, Արեւմտեան Ամերիկայի Թեմի Առաջնորդ ընտրուելուն առիթով եւ բարի երթ մաղթեցին անոր առաքելութեան:

Այնուհետեւ, օրակարգի նիւթ դարձան պսակաձեւ ժահրի յարուցած խնդիրներն ու եկեղեցական-ծիսական արարողութեանց պատշաճեցումները՝ նկատի ունենալով իւրաքանչիւր շրջանի կարիքներն ու պետական կանխարգիլման դրոյթները:

Անդրադառնալով Սրբոց Թարգմանչաց Վարդապետաց տօնին առիթով երկու տարին անգամ մը կատարուելիք Հիւսիսային Ամերիկայի երեք Թեմերու հոգեւորականաց միացեալ համագումարին, որ այս տարի տեղի պիտի ունենար Նիւ Եորքի մէջ, Առաջնորդ Սրբազանները յարմար նկատեցին տարիով մը յետաձգել համագումարը:

Ժողովի ընթացքին որոշուեցաւ իւրաքանչիւր ամիս կրկնել առցանց հանդիպումները, որոնք պիտի ծառայեն արդիւնաւոր գործի կարգաւորման, ինչպէս նաեւ փորձառութեանց փոխանակման ու հոգեւոր կեանքի վերաշխուժացման ի նպաստ աւելի արդիւնաւոր միջոցներ որոնելու նպատակին:

Երեք առաջնորդները որոշեցին, որ յառաջիկայ ամիսներուն՝ ամենապատեհ առիթին, հանդիպում մը կայացուի թեմերէն մէկուն մէջ, համադրական աշխատանքներ մշակելու եւ հասարակաց ծրագիրներու շուրջ քննարկումներ կատարելու համար, ի խնդիր մեր Եկեղեցւոյ ու թեմերու աւելի եւս պայծառացման:

Print Friendly, PDF & Email

ՎԵՐՋԻՆ ԼՈՒՐԵՐ

2021 – Արցախի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց, եւ մեր ժողովուրդի զաւակներուն 2021 տարուան սեմին, Մեծի Տանն Կիլիկիոյ... [...]

2020 – Յատուկ Խնամքի Կարօտ Հայորդիներու Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

April 11, 2021 April 4, 2021