Ուաշինկթըն Ուղեւորութեան Նախօրեակին Ազգ. Ռ. եւ Ա. Փիլիպոս Վարժարանի 8-րդ Կարգի Աշակերտները Այցելեցին Ազգ. Առաջնորդարան

Տարիներու բարի աւանդութեան համաձայն, այս տարի եւս Ազգ. Ռոզ եւ Ալեք Փիլիպոս վարժարանի 8-րդ կարգի աշակերտները, Հինգշաբթի, 4 Ապրիլ 2019-ին, այցելեցին Ազգային Առաջնորդարան, ընկերակցութեամբ իրենց դաստիարակներուն։ Այցելութիւնը կը նպատակադրէր անոնց Ուաշինկթըն այցելութեան նախօրեակին, ստանալ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի օրհնութիւնը եւ լսել անոր պատգամը։

Աշակերտները դիմաւորուեցան Հոլիվուտի Ս. Կարապետ Մայր Եկեղեցւոյ Հովիւ Արժ. Տ. Վիգէն Աւ. Քհնյ. Վասիլեանի եւ Արժ. Տ. Նարեկ Աւ. Քհնյ. Փեհլիվանեանի կողմէ, ապա առաջնորդուեցան «Ս. Տրդատ եւ Ս. Աշխէն» մատուռ, ուր Առաջնորդ Սրբազան Հօր գլխաւորութեամբ, տեղի ունեցաւ աղօթքի պահ մը՝ Տէրունական աղօթքի եւ Արեւագալի շարականի երգեցողութեամբ։

Ապա «Տիգրան եւ Զարուհի Տէր Ղազարեան» սրահին մէջ, անոնք ներկայացուցին կոկիկ գեղարուեստական յայտագիր մը՝ բացման խօսքով, ասմունքներով, խմբերգներով, դաշնակի վրայ երաժշտական նուագով ու պարային ներկայացումով։

Յայտագրի աւարտին Առաջնորդ Սրբազանը գնահատեց աշակերտներու այցելութիւնն ու ներկայացուցած ճոխ յայտագիրը, հաղորդական երկխօսութեամբ մը նշելով, թէ այս այցելութիւնները ոչ միայն հոգեկան ցնծութեան պահեր կ’առթեն իր խճողուած ժամանակացոյցին մէջ, աւելին՝ ի տես մեր մատղաշ, սակայն ապագայ սերունդի պատրաստուածութեան, անոնք կ’ամրապնդեն իր յոյսը՝ անոնց մէջ տեսնելով խոստումնապահ ժառանգորդները մեր մշակոյթին, լեզուին ու աւանդութեանց։ «Ապրի՛ք աշակերտներ, մնացէք խոստումնապահ եւ ձեր դաստիարակներու, ծնողներու օրինակին հետեւելով, դուք պիտի ըլլաք մեր ազգին վաղուան նուիրեալ ծառայողները, ուսուցիչները, հոգեւոր հայրերն ու առաջնորդները», ըսաւ Առաջնորդ Սրբազանը, նաեւ մաղթեց, որ անոնք առիթ կ’ունենան Ուաշինկթըն եւ 3 քաղաքներ այցելութեան ընթացքին, այցելելու նաեւ տեղւոյն մեր եկեղեցիները, Հայ Դատի ու մամլոյ գրասենեակները։

«Կիլիկիա» եւ «Մեր Հայրենիք» խմբերգներէն ետք, աշակերտները յիշատակի խմբանկար մը ունեցան Առաջնորդ Սրբազան Հօր հետ, ապա իւրաքանչիւրին իբրեւ նուէր տրուեցաւ բանաստեղծ Ժագ Ս. Յակոբեանի «Հայ Գիրքը Շէմ Ոսկի» գիրքը։

Print Friendly, PDF & Email

ՎԵՐՋԻՆ ԼՈՒՐԵՐ

2020 – Յատուկ Խնամքի Կարօտ Հայորդիներու Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

February 23, 2020 February 16, 2020

ԼՈՒՐԵՐՈՒ ԱՐԽԻՒ