ՍԱՐՖ-ի Կազմակերպած Հանրահաւաքին Բերիոյ Հայոց Թեմի Առաջնորդը Հանրութեան Ծանօթութիւններ Տուաւ Սուրիահայութեան Վերականգնումի Աշխատանքին Մասին

Հովանաւորութեամբ Հայ Առաքելական, Կաթողիկէ եւ Աւետարանական համայնքներու հոգեւոր առաջնորդներուն եւ կազմակերպութեամբ Սուրիահայութեան Օժանդակութեան Միացեալ Մարմինին – ՍԱՐՖ-, Ուրբաթ, 15 Դեկտեմբեր 2017-ի երեկոյեան, Իրանահայ Միութեան կեդրոնին մէջ տեղի ունեցաւ հանրաւաք, ներկայութեամբ Բերիոյ հայոց Թեմի Առաջնորդ Բարձր. Տ. Շահան Արք. Սարգիսեանի։ Հիւր Առաջնորդը ներկայացուց Սուրիոյ մայր գաղութի վերականգնումի եւ վերակառուցման ծրագիրները։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, ընկերակցութեամբ Առաջնորդական փոխանորդ Գերպ. Տ. Թորգոմ Ծ. Վրդ. Տօնոյեանի եւ Արժ. Տ. Արտակ Քհնյ. Տէմիրճեանի, ներկայ եղաւ ձեռնարկին։

Երեկոն սկսաւ Սուրիոյ մէջ զոհ գացած հայորդիներու յիշատակին մէկ վայրկեան յոտնկայս լռութեամբ։ Յանուն կազմակերպիչ Մարմինին, ատենադպրուհին՝ Տիկին Սօնա Մատարեան արտասանեց ողջոյնի խօսք։ Մարմինին ատենապետը խօսք առնելով՝ նկատել տուաւ, որ Սուրիոյ վիճակը, բաղդատմամբ ՍԱՐՖի ստեղծման օրերուն, բարեշրջում ապրած է, սակայն այս Մարմինին առաքելութիւնը վերջ չէ գտած, հետեւաբար, կոչ ուղղեց ներկաներուն, որ զօրակցին նաեւ վերաշինութեան ու վերականգնումի ճիգերուն։

Ցուցադրուեցաւ ժապաւէն մը, որ կը ներկայացնէր վերակառուցման աշխատանքներէն պատկերներ։

Թեմիս բարեխնամ Առաջնորդ Սրբազանը ողջունեց Շահան Սրբազանին ներկայութիւնը եւ հակիրճ տեղեկութիւններ տուաւ Լոս Անճելըսի մէջ անոր վերջին օրերու հանդիպումներուն մասին, որոնց կարգին՝ ՍԱՐՖ-ի հանգանակային ձեռնարկն ու կարգ մը ազգային վարժարաններ այցելութիւնը։ Ան յիշեցուց, որ հիւր Առաջնորդ Սրբազանին նախորդ այցելութիւնները անմիջական օժանդակութիւններու ապահովման նպատակով էին, մինչդեռ այս անգամ կը նպատակադրէ վերականգնումի աշխատանքներուն աջակցութիւն ապահովել։ Ան նշեց, որ Շահան Սրբազանը 14 տարիէ ի վեր ձեռնհասօրէն կը վարէ Բերիոյ Թեմի Առաջնորդի առաքելութիւնը, որուն եօթը տարիները անցան ահաւոր տագանապի մէջ։ Ան գնահատանքով արտայայտուեցաւ մեր Թեմի զաւակներուն լիաբուռն աջակցութեան մասին, որ տագնապի տարիներուն տրամադրուեցաւ Սուրիոյ հայութեան, ու կոչ ուղղեց նոյն ոգիով մասնակից ըլլալու վերակառուցման երթին։

Շահան Սրբազանը իր խօսքը սկսաւ փառք տալով Աստուծոյ, որ իր այս առաքելութիւնը յոյս ներշնչող պայմաններու մէջ տեղի կ’ունենայ եւ ընդգծեց, որ լաւատեսութիւնը պատերազմը շահելուն կէսն է. գաղութի զաւակները ընդհանրապէս լաւատեսութիւնը չեն կորսնցուցած, մասնաւորաբար Հալէպի ազատագրումէն ետք, եւ ահա մօտաւորապէս տարիէ մը ի վեր գաղութը լծուած է մոխիրներէ վերականգնելու աշխատանքին։ Կեանքը դանդաղօրէն կը վերագտնէ բնականոն հունը, վերականգնումի եւ վերաշինութեան շօշափելի քայլեր կ’առնուին՝ յաւելեալ յոյս ներշնչելով ժողովուրդին։ Ան երախտագիտութեան խօսք ուղղեց ամբողջ հայութեան, որ տագնապի տարիներուն կանգնեցաւ Սուրիոյ հայութեան կողքին, իսկ Արեւմտեան Միացեալ Նահանգներու հայութիւնը ունեցաւ մասնայատուկ դերակատարութիւն, օժանդակութեան ձեռք երկարեց Սուրիոյ իր հարազատներուն եւ առիթ ընծայեց, որ հայկական վարժարաններ բաց մնան։ Ան հաստատեց, որ Ն.Ս.Օ.Տ.Տ. Արամ Ա. Կաթողիկոսի Հալէպ այցելութիւնը՝ անցեալ ամանորին եւ Ս. Ծննդեան տօնի օրերուն, ներշնչում պարգեւեց ու գօտեպնդեց հայութիւնը, ամրացնելով վերակառուցման ենթահողը։ Հայութեան բոլոր միաւորներուն ու շրջանակներուն միացեալ ծրագրումով՝ ճշդուած են վերականգնումի առաջնահերթութիւնները, ու իր խօսքը եզրափակեց կոչ ուղղելով մեր ժողովուրդին, որ Հալէպի իրենց քոյրերն ու եղբայրները պահեն իրենց աղօթքներուն մէջ, շարունակեն զօրակից ու աջակից մնալ անոնց։

Հ.Յ.Դ. Արեւմտեան Միացեալ Նահանգներու Կեդր. Կոմիտէի ներկայացուցիչ Տիար Տարօն Տէր Խաչատուրեան ներկաները բաժնեկից դարձուց կարգ մը մտածումներու եւ փորձառութեանց, որոնք քաղուած են Դեկտեմբերի սկիզբին՝ Մեծի Տանն Կիլիկիոյ Կաթողիկոսութեան Ազգ. Ընդհանուր Ժողովին իր մասնակցութենէն։ Ան շեշտեց, որ հայութիւնը մէկ է ու միասնական, անհրաժեշտ է առաջնորդուիլ իրարօգնութեան զգացումով։

Աւարտին, Շահան Սրբազանը պատասխանեց ներկաներու հարցումներուն։ Երեկոն վերջ գտաւ հոգեւորականաց դասու փակման աղօթքով։

Print Friendly, PDF & Email

ՎԵՐՋԻՆ ԼՈՒՐԵՐ

2020 – Յատուկ Խնամքի Կարօտ Հայորդիներու Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

November 22, 2020 November 15, 2020