Փասատինայի Ս. Սարգիս Եկեղեցւոյ Ս. Ծննդեան Համերգը

Հովանաւորութեամբ եւ ներկայութեամբ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի եւ կազմակերպութեամբ Փասատինայի Ս. Սարգիս եկեղեցւոյ հոգեւոր հովիւին եւ հոգաբարձութեան, Ուրբաթ, 21 Դեկտեմբեր 2018-ի երեկոյեան, եկեղեցւոյ յարկին տակ տեղի ունեցաւ Ս. Ծննդեան տօնին նուիրուած հոգեւոր համերգ մը։ Ելոյթ ունեցաւ եկեղեցւոյ դպրաց դասի երգչախումբը, խմբավարութեամբ դպրապետ Բարշ. Երուանդ Սրկ. Քէշիշեանի։

Ներկայ էին Ազգ. Վարչութեան անդամներէն Տիար Աւօ Քէշիշեան, եկեղեցւոյ գլխաւոր բարերար Տէր եւ Տիկին Սարգիս եւ Սիւզան Կիտցինեան, ազգային երեսփոխաններ, հոգաբարձութեան ու տիկնանց միութեան անդամներ, քոյր միութեանց ներկայացուցիչներ եւ հաւատացեալներ։

Յայտագիրը սկիզբ առաւ հոգեւոր հովիւին՝ Արժ. Տ. Պօղոս Քհնյ. Պալթայեանի բացման խօսքով։ Ան նշեց, որ համերգը նուիրուած է նորածին Փրկչին Ս. Ծննդեան, որ կը թելադրէ դադրեցնել եսի կռիւը եւ Անոր աստղով կը լիցքաւորենք մեր հոգիները։ Յանուն եկեղեցւոյ մեծ ընտանիքին, ան ողջունեց Առաջնորդ Սրբազան Հայրն ու ներկաները, գնահատեց դպրապետին ու երգչախումբին ջանքերը եւ փոխանցեց Նոր Տարուան եւ Ս. Ծննդեան բարեմաղթութիւններ։

Այնուհետեւ, երգչախումբը ներկայացուց Ս. Ծննդեան տօնին յատուկ շարականներ եւ երգեր, մէջ ընդ մէջ կատարելով Սուրբ Կոյս Մարիամի աւետումէն մինչեւ Յիսուսի մկրտութեան դրուագներէն Ս. Գրային ընթերցումներ։ Յայտագիրը իր ամբողջութեանը մէջ արտացոլացումն էր Ս. Ծննդեան աւետարանական պատումին։ Գոհունակութեան առիթ էր, որ այս տարի, եկեղեցւոյ Կիրակնօրեայ վարժարանի աշակերտներն ալ մասնակցութիւն բերին կարգ մը երգերու մատուցման։ Հանդիսականները ցնծութեան զգացումով մանուկներէն լսեցին Ս. Ծննդեան աւետիսը։

Առաջնորդ Սրբազանը արտասանեց գնահատանքի եւ օրհնութեան իր խօսքը։ Ան գնահատեց խմբավարն ու երգչախումբին անդամները, որոնք գեղեցիկ մատուցումով մը աւետած էին Յիսուսի Ս. Ծնունդը։ «Հաւաքուած ենք, որպէսզի արդարութեան արեւն ու կեանքի լոյսը մեր մէջ յայտնուի», ընդգծեց Առաջնորդ Սրբազանը եւ յորդորեց հաւատացեալները՝ Յիսնակի շրջանը օգտագործելու հոգեկան պատրաստութեան համար, որ հոգեպէս ներշնչուած եւ պատրաստ սրտով ու հոգիով վերըմբռնենք, վերահասկնանք եւ վերապրինք սքանչելի եւ մեծ խորհուրդը որ յայտնուեցաւ Յիսուսի Ս. ծնունդին։ «Յիսուսի ծնունդը ապացոյցն էր մարդուն հանդէպ Աստուծոյ հաւատարմութեան, հետեւաբար, մենք ալ հրաւիրուած ենք Իրեն հանդէպ մեր հաւատարմութիւնը արտայայտելու, հետեւելով իր պատգամներուն, սէր եւ հաւատարմութիւն ցուցաբերելով մեզի նմաններուն նկատմամբ», շեշտեց Սրբազան Հայրը, նկատել տալով, որ երբ տօնական օրերուն նուէրներ ու բարեմաղթութիւններ կը փոխանակենք, երբեք մտահան չընենք, որ արդէն Աստուծմէ կողմէ ստացած ենք մեծագոյն պարգեւը։ «Խոր երախտագիտութեամբ մեր կեանքերուն մէջ ընդունինք Երկնաւոր Հօր տուած նուէրը, զայն պահպանենք ընդմիշտ, եւ Ս. Ծննդեան տօնին ոգին ու խորհուրդները մեր մէջ ապրեցնենք տարուան բոլոր օրերուն, Աստուծոյ սէրն ու ջերմութիւնը տարածելով մեր շրջապատին մէջ», եզրափակեց Առաջնորդ Սրբազանը։

Յայտագիրը վերջ գտաւ Առաջնորդ Սրբազանին պահպանիչով եւ «Կիլիկիա»ի երգեցողութեամբ։ Ապա, «Անտոնեան» սրահին մէջ տեղի ունեցաւ պատշաճ հիւրասիրութիւն։

Print Friendly, PDF & Email

ՎԵՐՋԻՆ ԼՈՒՐԵՐ

2020 – Յատուկ Խնամքի Կարօտ Հայորդիներու Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

November 22, 2020 November 15, 2020