Շաբաթական Լուրեր – 17 Յունիս 2016

ԵՊԻՍԿՈՊՈՍԱԿԱՆ Ս. ՊԱՏԱՐԱԳ ՕՐԷՆՃ ՔԱՈՒՆԹԻԻ Ս. ՔԱՌԱՍՆԻՑ ՄԱՆԿԱՆՑ ԵԿԵՂԵՑՒՈՅ ՄԷՋ

– ԴՊԻՐՆԵՐՈՒ ՁԵՌՆԱԴՐՈՒԹԻՒՆ ԵՒ ՈՒՐԱՐԻ ՏՈՒՉՈՒԹԻՒՆ

Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Կիրակի, 19 Յունիս 2016ին Ս. Պատարագ պիտի մատուցանէ եւ իր պատգամը պիտի փոխանցէ Օրէնճ Քաունթիի Սրբոց Քառասնից Մանկանց Եկեղեցւոյ մէջ։ Ս. Պատարագի ընթացքին, Առաջնորդ Սրբազանը դպիրներու ձեռնադրութիւն պիտի կատարէ եկեղեցւոյ նուիրեալ սպասարկուներէն Զարեհ Կելոյեանի, Մայքըլ Տուայըրի, Աւօ Մովսէսեանի, Նարեկ Տիշոյեանի, Ժիրայր Ճենանեանի եւ Քրիստոֆըր Ռահէպի. Զարեհ Կելոյեան նաեւ պիտի արժանանայ ուրար կրելու իրաւունքին:

Ս. Պատարագէն ետք, հովանաւորութեամբ եւ ներկայութեամբ Առաջնորդ Սրբազան Հօր, «Յարութ Պարսամեան» Հայ Կեդրոնի «Ղազարեան» սրահին մէջ տեղի պիտի ունենայ Հայրերու Օրուան նուիրուած ճաշկերոյթ, կազմակերպութեամբ եկեղեցւոյ տիկնանց միութեան։

***

ԱՄԱՌՆԱՅԻՆ ԿՐՕՆԱԿԱՆ ԴԱՍՏԻԱՐԱԿՉԱԿԱՆ ԾՐԱԳԻՐՆԵՐ

Մեր Թեմի եկեղեցիներուն հոգեւոր հովիւները, հոգաբարձութիւններն ու Կիրակնօրեայ Վարժարանները վերջին տարիներուն ստեղծած են բարի աւանդութիւն մը. ամրան ընթացքին, մանուկներու եւ պատանիներու համար կը կազմակերպուին դաստիարակչական ծրագիրներ, մասնակիցներուն կը ջամբուին քրիստոնէական դաստիարակութիւն, հայերէն լեզու եւ մշակոյթ, եւ այս բոլորը՝ հաճելի ժամանցի մթնոլորտի մը մէջ:

Այս տարի, ամառնային ծրագիրները կը կիրարկուին հետեւեալ դրութեամբ.

– Օրէնճ Քաունթիի Ս. Քառասնից Մանկանց Եկեղեցւոյ Ս. Գրային ամառնային դպրոցը տեղի պիտի ունենայ 20էն 24 Յունիսին, առաւօտեան ժամը 9էն 1, մանկապարտէզէն մինչեւ 8րդ կարգի աշակերտներու համար:

– Փասատինայի Ս. Սարգիս Եկեղեցւոյ Ս. Գրային դպրոցի դրութիւնը պիտի սկսի 27 Յունիսին եւ պիտի տեւէ 4 շաբաթ, առաւօտեան ժամը 8:30էն մինչեւ կէսօրէ ետք ժամը 2, 3 տարեկան եւ վեր մանուկներու ու պատանիներու համար:

– Մոնթեպելլոյի Ս. Խաչ Մայր Տաճարի «Լուսաւոր Ճամբար» բանակումը տեղի պիտի ունենայ 10էն 16 Յուլիսին, Փալմտէյլի Angeles Crest Christian Camp-ին մէջ, 6էն 16 տարեկան մանուկներու եւ պատանիներու համար:

– Ֆրեզնոյի Ս. Երրորդութիւն Մայր Եկեղեցւոյ Ս. Գրային դաստիարակութեան դպրոցը տեղի պիտի ունենայ 24էն 28 Յուլիսին, առաւօտեան ժամը 9էն մինչեւ կէսօր, 4 տարեկան եւ վեր մանուկներու ու պատանիներու համար:

Կը յանձնարարենք ծնողները, որ իրենց զաւակները մասնակից դարձնեն այս օգտակար ծրագիրներուն: Յաւելեալ մանրամասնութեանց համար կարելի է կապ պահել եկեղեցիներու գրասենեակներուն հետ:

***

Print Friendly, PDF & Email

ՎԵՐՋԻՆ ԼՈՒՐԵՐ

2020 – Յատուկ Խնամքի Կարօտ Հայորդիներու Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց եւ մեր ժողովուրդի զաւակներուն Մեծի Տանն Կիլիկիոյ Կաթողիկոսութեան Անթիլիասի Մայրավանքէն... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

November 22, 2020 November 15, 2020