Չորեքշաբթի, 15 Փետրուար 2023-ի երեկոյեան, Արեւմտեան Թեմի Հոգեւորականաց դասը, գլխաւորութեամբ Առաջնորդ՝ Գերշ. Տ. Թորգոմ Ս. Եպս. Տօնոյեանի, հանդիսաւորապէս նշեց Սրբոց Վարդանանց տօնը: Այս առիթով պատարագեց եւ քարոզեց Կրօնական ժողովի ատենադպիր՝ Արժ. Տ. Գարեգին Քհնյ. Պետուրեան, որ իր խօսքով վեր առաւ Վարդանանց խորհուրդը եւ ընդգծեց, որ բոլոր ժամանակներու համար Վարդանանք կը մնան օրինակելի, քրիստոնէութեան նկատմամբ իրենց ցուցաբերած հաւատարմութեամբ ու տոկունութեամբ եւ աւելցուց, որ հայոց բանակի սպարապետ ու զօրավար Վարդան Մամիկոնեան եւ իր քաջարի զինակիցները իրենց նահատակութեամբ նաեւ դարձան վկաները Քրիստոսի:
Սրբազան արարողութեան աւարտին, Հոգեւոր հայրերը համախումբ երգեցին Սրբոց Վարդանանց նուիրուած ազգային երգեր եւ վերանորոգեցին իրենց հոգեւոր ու ազգային պարտաւորութիւնը մեր հայրենեաց ու ժողովուրդին նկատմամբ: Տօնական մթնոլորտը իր պսակումին հասաւ Առաջնորդ Սրբազան Հօր փակման աղօթքով:
