Անցեալ շաբաթավերջին, կազմակերպութեամբ Ֆրեզնոյի Մուսա Լեռ Միութեան եւ մասնակցութեամբ Լոս Անճելըսի Մուսա Լեռ Միութեան, ֆրեզնոյի մէջ ոգեկոչուեցան Մուսա Լերան հերոսամարտի 104-ամեակը, ինչպէս նաեւ Այնճարի հիմնադրութեան 80-ամեակը։
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի տնօրինումով, Արժ. Տ. Նարեկ Աւ. Քհնյ. Փեհլիվանեան ներկայ գտնուեցաւ եւ կատարեց եկեղեցական արարողութիւնները։
Շաբաթ, 31 Օգոստոս 2019-ի երեկոյեան, Տ. Նարեկ կատարեց մատաղի պատրաստութեան համար աղի օրհնութեան արարողութիւնը, որմէ ետք տեղի ունեցաւ ընթրիք եւ խրախճանք։
Կիրակի առաւօտեան, Ս. Պատարագ մատուցանեց Արժ. Տ. Նարեկ Աւ. Քհնյ. Փեհլիվանեան եւ յաւուր պատշաճի քարոզեց։ Ապա հոգեհանգստեան արարողութիւն կատարուեցաւ Մուսա Լեռան հերոսամարտի նահատակներու հոգիներուն համար։ Ս. Պատարագի աւարտին, յաջորդաբաբ խօսք արտասանեցին Վեր. Ներսէս Պալապանեան, Գարին Տէր Գալուստեան եւ Յովիկ Գարայեան։
Այնուհետեւ, կատարուեցաւ մատաղի օրհնութիւնը։