Հինգշաբթի, 19 Սեպտեմբեր 2019-ի յետմիջօրէին, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ազգ. Առաջնորդարանին մէջ ընդունեց Օթիզմի Հայկական Օժանդակ Մարմինի ներկայացուցիչները՝ գլխաւորութեամբ ատենապետուհի Տիկին Թալին Խաչատուրեանի։ Ներկայ էր նաեւ Քրեսենթա Հովիտի Եկեղեցւոյ հոգեւոր հովիւ Արժ. Տ. Ղեւոնդ Քհնյ. Քիրազեան։
Հանդիպումի ընթացքին յարգելի հիւրերը ներկայացուցին Մարմինի ընդհանուր առաքելութիւնը, ինչպէս նաեւ համայնքային տարբեր կազմակերպութեանց եւ դպրոցներու համատեղ ջանքերով իրագործուած գործունէութիւնը։ Անոնք ընդգծեցին Քրեսենթա Հովիտի Եկեղեցւոյ հետ համագործակցաբար կատարուած մարդասիրական ծառայութիւնը յատուկ կարիքի կարօտ հայորդիներու եւ անոնց ընտանիքներուն, մասնաւորաբար Վարդավառի, Ս. Աստուածածնի եւ Խաչվերացի տաղաւար տօներու առթիւ տեղի ունեցած արարողութիւններով, Տ. Ղեւոնդ Քահանայի կատարմամբ։ Նշենք, որ յառաջիկային Ս. Ծննդեան եւ Ս. Յարութեան տօներուն առթիւ պիտի կատարուին նմանօրինակ արարողութիւններ։
Առաջնորդ Սրբազանը բարձր գնահատեց կազմակերպութեան մարդասիրական աշխատանքները, վերահաստատեց Ազգ. Առաջնորդարանի զօրակցութիւնը եւ յաջողութիւն մաղթեց անոր յետագայ բոլոր ծրագիրներուն։