Հայց. Առաք. Եկեղեցւոյ Հոգեւոր Եղբայրակցութեան Գոհաբանութեան Օրուան Ճաշկերոյթ

Երեքշաբթի, 26 Նոյեմբեր 2019-ին, Հայաստանեայց Առաքելական Եկեղեցւոյ Հոգեւոր Եղբայրակցութեան կազմակերպած Գոհաբանութեան օրուան աւանդական ճաշկերոյթը տեղի ունեցաւ Հոլիվուտի Ս. Կարապետ Մայր Եկեղեցւոյ «Կարապետեան» սրահին մէջ, հովանաւորութեամբ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանին։ Յանուն Առաջնորդ Սրբազան Հօր, ճաշկերոյթին ներկայ եղան Արժ. Տ. Վիգէն Աւ. Քհնյ. Վասիլեան, Արժ. Տ. Պօղոս Քհնյ. Պալթայեան եւ Արժ. Տ. Ղեւոնդ Քհնյ. Քիրազեան։

Յայտագիրը սկիզբ առաւ սեղաններու օրհնութեամբ եւ Եղբայրակցութեան քայլերգի երգեցողութեամբ։ Ողջոյնի խօսք արտասանեց Սարգիս եղբայր Թահմիզեան։ Ճաշի պահուն, մեներգով հանդէս եկաւ Հրաչ եղբայր Եսայեան, իսկ Եղբայրակցութեան երիտասարդ անդամներ ներկայացուցին գեղարուեստական յայտագիր մը, որ կ’ընդգրկէր երգեր ու սաղմոսներ։

Առաջնորդ Սրբազան Հօր օրհնութիւններն ու բարեմաղթութիւնները փոխանցեց Տէր Վիգէնը, որ միաժամանակ իր սրտի խօսքին մէջ նշեց, որ մարդ արարածը ամէն օր պէտք է Աստուծոյ գոհութիւն յայտնէ, զԱստուած փառաբանէ եւ երբեք չմոռնայ որ Տէ՛րն է բոլոր շնորհքներու եւ բարիքներու պարգեւիչը։ «Մենք պէտք չունինք ամերիկեան Գոհաբանութեան օրուան սպասելու՝ Աստուծոյ գոհութիւն վերառաքելու համար։ Մեր ժողովուրդը մշտապէս փառք տուած է Աստուծոյ։ Բացէք «Ժամագիրք»ը եւ պիտի տեսնէք, որ մեր Ս. Հայրերը գոհաբանութեան ինչպիսի՜ աղօթքներ գրած են», ընդգծեց Տէր Հայրը։

Ապա, խօսք առաւ վարչութեան ատենապետ՝ Աւօ եղբայր Գապաքչուզեան, որ շնորհակալութիւն յայտնեց Առաջնորդ Սրբազան Հօր իր հովանաւորութեան, ինչպէս նաեւ մշտապէս Եղբայրակցութեան վարչութեան եւ անդամներուն զօրավիգ կանգնելուն եւ աջակցելուն համար։

Ճաշկերոյթը վերջ գտաւ Տէր Պօղոսի «Պահպանիչ» աղօթքով։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022