Շաբաթ, 27 Օգոստոս 2016ի երեկոյեան, Լոս Անճելըսի Իրանահայ Միութիւնը Կլենտէյլի իր կեդրոնին մէջ տօնեց հիմնադրութեան 60րդ տարեդարձը:
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան ներկայ եղաւ տօնակատարութեան: Առաջնորդ Սրբազանին կ’ընկերանար Արժ. Տ. Նարեկ Աւ. Քհնյ. Փեհլիվանեան: Ներկայ էին Կլենտէյլի եւ Լոս Անճելըսի քաղաքապետութեանց ներկայացուցիչներ եւ պետական այլ դէմքեր:
Պաշտօնական տօնակատարութեան սկիզբը, Առաջնորդ Սրբազանն ու ներկայ հոգեւորականները կատարեցին կեդրոնի անուանակոչութեան արարողութիւնը. կեդրոնը կոչուեցաւ բարերարներ Տէր եւ Տիկին Տոքթ. Յակոբ եւ Լուտովիքա Այնթապլեանի անունով։ Այնուհետեւ հանդիսաւոր բացումը կատարուեցաւ «Սինան եւ Անճելա Սինանեան» ընդունարանին, «Օտրի եւ վահան Գրեգորի» գրադարանին եւ ժողովասրահին, ինչպէս նաեւ «Գալուստ Պապախանեան եւ ընտանիք» անունով կոչուած ընթերցարանին: Առաջնորդ Սրբազանը իր օրհնութիւններն ու շնորհաւորութիւնները փոխանցեց բարերարներուն եւ Իրանահայ միութեան նուիրեալներուն:
Աւարտին, տեղի ունեցաւ ճաշկերոյթ։ Ներկաները շնորհաւորեցին միութեան հիմնադրութեան տարեդարձն ու փոխանցեցին բարեմաղթութիւններ:
