«ՀՕՄ-ը Համահայկակա՛ն Բանակ Է», Ըսաւ Թորգոմ Եպս. Տօնոյեան

Երեքշաբթի, 29 Յունիս 2021-ի յետմիջօրէին, Արեւմտեան Թեմի Առաջնորդ՝ Գերշ. Տ. Թորգոմ Ս. Եպս. Տօնոյեան ընդունեց այցելութիւնը ՀՕՄ-ի Արեւմտեան Ամերիկայի Շրջանային վարչութեան, գլխաւորութեամբ ատենապետուհի Սիլվա Փօլատեանի: Անոնք եկած էին Առաջնորդ Սրբազան Հօր օրհնութիւնները ստանալու իրենց ներկայ եւ հետագայ ծրագիրներու յաջողութեան համար:

Սրբազան Հայրը դրուատանքով խօսեցաւ հայութեան կեանքին մէջ ՀՕՄ-ի ներկայութեան եւ դերակատարութեան մասին՝ նշելով, որ հայ կանանց այս կազմակերպութիւնը իր գոյութեան առաջին իսկ օրէն օգնութեան ձեռք կ՛երկարէ Հայաստանի եւ Սփիւռքի հայութեան կարիքաւոր հատուածներուն, բարձր կազմակերպուածութեամբ կը ղեկավարէ իր աշխատանքներն ու ծառայութիւնը եւ ազգը հարուածող ճգնաժամային բոլոր պահերուն աղէտի գօտի օգնութեան փութացող առաջին զինուորագրեալներէն է:

«Մեծ է ՀՕՄ-ը, որովհետեւ մեծ է ու լայնածիր իր ծառայութեան դաշտը հայրենեաց հողի վրայ, թէ աշխարհատարած հայութեան կեանքին մէջ, ուր միշտ ներկայ է ան իբրեւ ազգային ու բարեսիրական անխոնջ կազմակերպութիւն: Աշխատանքի տեսակէտէ՝ ճակատ մեկնող հայ կանանց բանակ է ՀՕՄ-ը, միշտ պատնէշի վրայ եւ ընդհուպ պատրաստ՝ ծառայելու հայ ժողովուրդին ու հայրենիքին», ըսաւ Առաջնորդ Սրբազան Հայրը եւ բարձր գնահատեց Արեւմտեան շրջանի, Հայաստանի, Արցախի, Ջաւախքի մէջ ու աշխարհի տարածքին գործող ՀՕՄ-ի բոլոր մասնաճիւղերու հայրենանուէր եւ հայանուէր վաստակն ու գործունէութիւնը:

Հանդիպման աւարտին, Շրջանային վարչութեան անդամները շնորհակալութիւն յայտնեցին Առաջնորդ Սրբազան Հօր եւ անոր մաղթեցին արեւշատ օրեր, անսպառ եռանդ ու քաջապինդ ծառայութիւն Հայ Եկեղեցւոյ ճամբով ազգի հոգեւոր անդաստանէն ներս: Հուսկ, Թորգոմ Եպս. Տօնոյեան իր օրհնութիւնները փոխանցեց այցելուներուն եւ անոնց ընդմէջէն խրախուսեց աշխարհատարած հօմուհիները՝ յաջողութիւն մաղթելով Հայ Օգնութեան միութեան նախաձեռնած համահայկական բոլոր աշխատանքներուն եւ ազգանուէր ծրագիրներուն:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022