Հայաստան Ուղեւորութեան Նախօրեակին՝ Ազգ. Շամլեան Վարժարանի Աշակերտները Այցելեցին Ազգ. Առաջնորդարան

Ազգային Վահան եւ Անոյշ Շամլեան վարժարանը տարիներէ ի վեր հաստատած է բարի աւանդութիւն մը. գարնանամուտին, աւարտական դասարանի աշակերտները Հայաստան կ’այցելեն եւ ուղղակի հաղորդակից կը դառնան հայրենի հողին, ժողովուրդին ու դարերէն եկող մշակութային ժառանգութեանց. ուխտագնացութենէն առաջ, անոնք կ’այցելեն Ազգ. Առաջնորդարան եւ կը ստանան Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի օրհնութիւնն ու կը լսեն անոր պատգամը։ Այս աւանդութիւնը անգամ մը եւս մարմին ստացաւ Հինգշաբթի, 15 Մարտ 2018-ի կէսօրին, երբ 8-րդ դասարանի 62 աշակերտներ այցելեցին Ազգ. Առաջնորդարան։ Անոնց կողքին էին տնօրէնուհին՝ Դոկտ. Թալին Քարկոտորեան, փոխ տնօրէնուհին՝ Տիկին Ռիթա Գաբրիէլեան, հայերէնի դաստիարակներ եւ խումբ մը ծնողներ։

Առաջնորդ Սրբազանը, իր կողքին ունենալով Առաջնորդական փոխանորդ Գերպ. Տ. Թորգոմ Ծ. Վրդ. Տօնոյեանն ու Արժ. Տ. Նարեկ Աւ. Քհնյ. Փեհլիվանեանը, աշակերտներն ու ընկերակիցները ընդունեց «Ս. Տրդատ եւ Ս. Աշխէն» մատրան մէջ, ուր միասնաբար ունեցան աղօթքի պահ մը։ Տէրունական աղօթքէն ետք, հոգեւոր հայրերը երգեցին Արեւագալի «Լոյս» շարականը։ Այնուհետեւ, բոլորը անցան «Տիգրան եւ Զարուհի Տէր Ղազարեան» սրահ, ուր աշակերտները ներկայացուցին գեղարուեստական յայտագիր մը։

Հանդիսավարութիւնը կատարեցին երկու աշակերտներ՝ Էրիք Թովմասեան եւ Նայիրի Գալինճեան, որոնք շնորհակալութիւն յայտնեցին այս բացառիկ ընդունելութեան համար, ապա, յաջորդաբար յայտարարեցին յայտագիրին բաժինները։ Նախ բոլորը արտասանեցին «Գովք Հայաստանի»ն. աշակերտներուն անունով սրտի խօսք մը արտասանեց Նաթալի Յարութիւնեան, որ բացատրեց այցելութեան շարժառիթը եւ այս խումբը բախտաւոր նկատեց, որովհետեւ Հայաստան ուխտագնացութիւնը կը զուգադիպի Հանրապետութեան 100-ամեակին, Արցախեան Շարժումի 30-ամեակին ու Երեւանի 2800-ամեակին։ Ան ընկերներուն անունով խոստացաւ հայրենի հողին վրայ լիարժէքօրէն հաղորդակից ըլլալ մեր անցեալին ու ներկային՝ այցելելով Ս. Էջմիածին, Սարդարապատ, Ս. Մեսրոպ Մաշտոցի գերեզմանն ու այլ յիշատակելի վայրեր, ու եզրափակեց հաստատելով, որ հաւատարիմ են մայրենիին, աւանդներուն, կը խոստանան ըլլալ հայութեան արժանաւոր զաւակները։ Յայտագիրի յաջորդ բաժիններով, ներկայացուեցան նուագ (Ալիք Խաչերեան), մենապար (Նազելի Աղաճանեան), իսկ 4 աշակերտներ (Պելլա Նազարեան, Անահիտ Պօղոսեան, Քլոէ Կարապետեան եւ Սուզաննա Ակոբեան) արտայայտուեցան Հայաստան այցելութենէն իրենց ակնկալութեանց մասին։ Անոնք այժմէն իսկ կը նախզգային այն յուզումը, որ պիտի համակէ հայրենիք առաջին այցելողները, նաեւ այն ապրումները, որոնք պիտի ունենան պատմական վայրեր այցելութեան պահուն, մասնաւորաբար Սարդարապատի մէջ հաղորդուելով մեր պատմակերտ հերոսներուն շունչով ու մեր տաճարներու յարկին տակ լուսաւորուելով մեր սրբազան հայրերուն ժառանգութեամբ։ Անոնք նաեւ վկայեցին, որ բախտաւոր կը զգան, երբ ժամանակակից են ազատ ու անկախ Հայաստանին ու Արցախին, իսկ այս այցելութիւնը առիթ պիտի ըլլայ ինքնագիտակցութեան խորացման։

Առաջնորդ Սրբազանը բարձր գնահատեց աշակերտներուն հայրենասիրական զգացումները, որոնք արտայայտուած էին իրենց իսկ կողմէ։ Ան նկատեց, որ աշակերտները յատուկ խանդավառութեամբ պատրաստուած են Հայաստան ուղեւորութեան, իրենց արտայայտութիւնները թարգմանն են իրենց էութեան մէջ եռացող հայրենասիրութեան, իսկ այցելութիւնը առիթ մը պիտի ըլլայ, որ դասագիրքերուն ու դպրոցին մէջ իրենց սորվածները անձամբ տեսնեն ու հաղորդակից ըլլան անոնց։ Առաջնորդ Սրբազանը աշակերտներուն յիշեցուց, որ երկու օր առաջ, Արցախի Թեմի Առաջնորդ Տ. Պարգեւ Արք. Մարտիրոսեանի հետ այցելած էին Շամլեան վարժարան ու հիւր սրբազանը զիրենք հրաւիրած էր նաեւ Արցախ, ու յորդորեց, որ եթէ այս հանգրուանին անոնք պիտի չկարենան երթալ Արցախ, հետագային անպայման հաղորդակից ըլլան նաեւ անոր հողին։ Յիշեցնելով, որ մատրան մէջ երգած էին «Լոյս» շարականը՝ մաղթեց, որ աշակերտներուն սիրտերն ու միտքերը Հայաստանի մէջ լուսաւորուին Աստուծոյ լոյսով ու մեր հայրենիքի պատմութենէն ու ներկայէն բխող ժառանգութիւններով, անդրադառնան ու գիտակցին, որ նոյն լոյսը ներշնչած էր մեր պատմութիւնը կերտող սրբազան հայրերն ու պապերը, որպէսզի կերտեն հայութեան յաւերժութեան ուղին։ Ան նաեւ աշակերտներուն թելադրեց Հայաստանի մէջ ամէն օր աղօթել, որպէսզի Աստուած իրենց մէջ զօրացնէ հայրենասիրութիւնը, իմատութիւնն ու հաւատքի լոյսը։ Այս շաբաթ, ըսաւ Առաջնորդ Սրբազանը, մեր եկեղեցին կը տօնէ Ս. Գրիգոր Լուսաւորիչի Խոր Վիրապ մուտքի յիշատակը, ու ըսաւ «երբ Խոր Վիրապ այցելէք՝ յիշեցէք, որ Լուսաւորիչ Հայրապետը այդ նեղ վիրապին մէջ 13 տարի ապրեցաւ Աստուծմէ լոյս խնդրելով, յաղթահարեց բոլոր դժուարութիւնները, ապա նոյն լոյսով լուսաւորեց մեր հայրենիքը։» Ան իր խօսքը եզրափակեց մաղթելով, որ աշակերտներուն բոլոր բաղձանքները իրականանան եւ անոնք աւելի՛ եւս հայացած ու հաւատքի մէջ զօրացած վերադառնան տուն։ Վերջապէս՝ դրուատիքով ողջունեց տնօրէնուհին եւ բոլոր դաստիարակները եւ աղօթք բարձրացուց, որ Աստուած վարձահատոյց ըլլայ բոլորին։

Հանդիպումը վերջ գտաւ «Կիլիկիա»ի եւ «Մեր Հայրենիք»ի խմբերգումով։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022