Հայաստան Ուխտագնացութեան Նախօրեակին Ազգ. Շամլեան Վարժարանի Աշակերտները Ազգ. Առաջնորդարան Այցելեցին


Ազգային Վահան եւ Անոյշ Շամլեան Վարժարանը ունի տարիներու բարի աւանդութիւն մը. Ս. Յարութեան տօնի օրերուն, աւարտական՝ 8-րդ դասարանի աշակերտները ուխտի կ’երթան Հայաստան. նախօրեակին, անոնք կ’այցելեն Ազգային Առաջնորդարան, ստանալու համար Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի օրհնութիւնն ու ներկայացնելու գեղարուեստական յայտագիր մը:

Այս տարուան ուխտագնացութիւնը պիտի սկսի 6 Ապրիլին: Հետեւաբար, շուրջ 80 աշակերտներ, իրենց դաստիարակներուն եւ խումբ մը ծնողներու ընկերակցութեամբ, Հինգշաբթի, 23 Մարտ 2017ի կէսօրին այցելեցին Ազգային Առաջնորդարան եւ «Տիգրան եւ Զարուհի Տէր Ղազարեան» սրահին մէջ հիւրընկալուեցան Առաջնորդ Սրբազանին ու հոգեւոր հայրերու կողմէ: Աշակերտներուն կ’ընկերանային տնօրէնուհին՝ Դոկտ. Թալին Քարկոտորեան, փոխ տնօրէնուհին՝ Տիկին Ռիթա Գաբրիէլեան, ուսուցիչներ եւ ծնողներ: Առաջնորդ Սրբազանին կողքին էին Գերպ. Տ. Թորգոմ Ծ. Վրդ. Տօնոյեան, Հոգշ. Տ. Վաչէ Վրդ. Պալըքճեան եւ Արժ. Տ. Նարեկ Աւ. Քհնյ. Փեհլիվանեան:

Յայտագիրը վարեց աշակերտներէն Սառա Քիլիցեան, որ ողջունեց Առաջնորդ Սրբազանն ու հոգեւոր հայրերը, ապա հրաւիրեց իր դասընկերներէն Արթիւր Չեպիշեանը՝ փոխանցելու աշակերտներուն սրտի խօսքը: Վերջինը շնորհակալութեան խօսք ուղղեց Առաջնորդ Սրբազանին, որ ուխտագնացութեան նախօրեակին ընդունած է աշակերտները, եւ հաւաստեց, որ Հայաստանի տարբեր ուխտավայրեր իրենց այցելութիւնը բարերար արձագանգ պիտի ունենայ իրենց հոգիներուն մէջ:

Յայտագիրը զարգացաւ խմբային արտասանութիւններով, կատարողութեամբ արեւելահայերէնի ու արեւմտահայերէնի բաժանմունքներուն: Մեղեդի Միքայէլեան մեներգեց, Արենի Չալըգեան ներկայացուց մենապար մը, Անիթա Օհաննէսեան նուագեց դաշնակի վրայ, իսկ Մեղեդի Փօլատեան ու Իզապէլ Մեսրոպեան զուգերգ մը կատարեցին: Այնուհետեւ, հանդիսավարը հրաւիրեց Առաջնորդ Սրբազանը՝ ուղղելու իր պատգամը:

Առաջնորդ Սրբազանը գոհունակութիւն յայտնեց, որ աշակերտներուն այցելութիւնն ու պատրաստած յայտագիրը ուրախ տրամադրութիւն ստեղծեց Ազգ. Առաջնորդարանի յարկին տակ, գնահատեց տնօրէնուհիին, փոխ տնօրէնուհիին, ուսուցիչներուն ու ծնողներու աշխատանքը, որուն մէկ բաժինը պիտի տրամադրուի «աշակերտներու բանակ»ը Հայաստան ուխտի տանելու: Առաջնորդ Սրբազանը նկատել տուաւ, որ այս հանդէսին մեզի հետ են երկու միաբան հայրեր, որոնք նոր ժամանած են մեր Թեմը, ապա կանգ առաւ ներկայացուցած յայտագիրին վրայ, զայն նկատելով աշակերտներուն աշխատասիրութեան, ծառայասիրութեան, հայրենասիրութեան եւ ինքնավստահութեան վկայութիւնը: Երբ Հայաստան հասնիք, շարունակեց Առաջնորդ Սրբազանը, անձամբ ականատես պիտի ըլլաք պատմական վայրերու՝ Ս. Էջմիածինին, Ծիծեռնակաբերդին, Սարդարապատին, Օշականին, Գառնիին ու Գեղարդին, որոնցմէ իւրաքանչիւրը պատգամ մը պիտի փոխանցեն ձեզի, պիտի տեսնէք, որ մեր այսօրը ինչպիսի՛ զոհաբերութիւններու եւ դարաւոր ճիգի արդիւնք է, գոյացած՝ մեր Ս. Նահատակներուն, սրբազան հայրերուն եւ հերոսներուն գործով ու վկայութեամբ: Ան վստահութիւն յայտնեց, որ Հայաստան այցելող աշակերտները հոգեփոխութիւն պիտի ապրին, անոնց մէջ աւելի՛ պիտի զօրանայ հայկական ոգին, հայրենասիրութիւնն ու մեր մշակութային ժառանգութեանց նկատմամբ սէրը, աւելի՛ ուժեղ կերպով պիտի փարին մայրենիին ու Ս. Մեսրոպ Մաշտոցի աւանդներուն: Առաջնորդ Սրբազանը նաեւ յորդորեց աշակերտները մտովին ու հոգեկան վերանորոգութեան ու զարգացման, որովհետեւ իրենք կոչուած են ապագային ըլլալու մեր ժողովուրդին ծառայողներն ու առաջնորդները:

Իր խօսքի վերջին բաժինով, Առաջնորդ Սրբազանը կանգ առաւ Մեծ Պահքի շրջանին ու անկէ բխող խորհուրդներուն վրայ, ընդգծելով որ Ս. Յարութեան տօնը կանխող այս ժամանակաշրջանը վերանորոգումի առիթ է, իսկ վերանորոգումը պէտք է ընկալել աւելի լաւ քրիստոնեայ ու հայ ըլլալու մտասեւեռումով: Ան օրհնեց աշակերտները, բարի ու անվտանգ ճամբորդութիւն մաղթեց անոնց ու ընկերակից ուսուցիչներուն եւ ծնողներուն, եւ յոյս յայտնեց, որ աւելի հայացած վերադառնան հայրենիքէն եւ այդ ոգիին բաժնեկից դարձնեն իրենց կրտսեր ընկերները:

Առաջնորդ Սրբազանին պահպանիչէն ետք, բոլորը միասնաբար երգեցին «Հայր Մեր»ը եւ «Մեր Հայրենիք»ը: Խմբանկարէ մը ետք, աշակերտները նուէր ստացան խաչեր:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022