Շամլեան Ազգ. Վարժարանի 8րդ Կարգի Աշակերտները Առաջնորդ Սրբազանին Օրհնութիւնները Ստացան Հայաստան Ուխտագնացութենէն Առաջ


Հինգշաբթի, 20 Մարտ 2014-ի յէտ միջօրէին, Վահան եւ Անոյշ Շամլեան Ազգ. Վարժարանի ութերորդ կարգի աշակերտները Ազգ. Առաջնորդարան այցելեցին, դէպի Հայաստան իրենց ուխտագնացութեան նախօրեակին, Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեանի օրհնութիւնները ստանալու։

Առաջնորդ Սրբազան Հօր կողքին էին Արժ. Տ. Նարեկ Աւ. Քհնյ. Փեհլիվանեան եւ Արժ. Տ. Վազգէն Քհնյ. Աթմաճեան։ Իսկ աշակերտութեան կ՚ընկերանային Վարժարանի Փոխ Տնօրէնուհի Տիկ. Ռիթա Գաբրիէլեան, ուսուցիչներ եւ խումբ մը ծնողներ։

Առաջնորդարանի «Տիգրան եւ Զարուհի Տէր Ղազարեան» սրահին մէջ համախմբուելէ ետք, աշակերտութեան կողմէ բացման խօսք արտասանեց Էջմին Ռոստամեան։ Ան իր խօսքին մէջ յայտնեց որ ինքն ու իր դասընկերները պատիւ կը զգային Առաջնորդ Սրբազան Հօր օրհնութիւնները ստանալու նախքան Հայրենիք այցելութիւնը։

Հանդիսավարի բացման խօսքէն ետք, առաջին աշակերտը, Ալիք Մարսէլեան, բեմ բարձրանալով իր ուրախութիւնը յայտնեց Ազգ. Առաջնորդարան այցելութեան, որովհետեւ աշակերտները Առաջնորդարանը կը նկատեն իրենց տունը եւ Առաջնորդ Սրբազանը իրենց հոգեւոր հայրը, որ միշտ սրտբաց զիրենք կ՚ընդունի իբրեւ հարազատ զաւակները։ Ան շեշտեց, որ Առաջնորդարանի եւ վարժարանի կապը աշակերտութեան համար ամբողջութիւն մըն է։ Շարունակելով իր խօսքը, աշակերտուհին աւելցուց, ըսելով որ Ս. Զատկուան եւ Ապրիլ 24ի շրջանին պիտի գտնուին Հայաստան, ու պիտի այցելեն Ս. Էջմիածին եւ Ծիծեռնակաբերդ յարգելու համար մեր նահատակներուն յիշատակը, ինչպէս նաեւ, Օշականի մէջ Ս. Մեսրոպ Մաշտոցի քերեզմանը, Խոր Վիրապ, Սարդարապատ եւ այլ պատմական վայրեր։ Եզրափակելով իր խօսքը, ան խոստացաւ որ միշտ Հայերէն պիտի խօսին եւ պիտի պահպանեն մեր աւանդութիւնները որպէսզի արժանի ժառանգորդները ըլլան մեր նախնիներուն։

Յաջորդ աշակերտը, Արման Հայրապետեան, յայտնեց թէ բազմիցս այցելած է մայր Հայաստան եւ ամէն անգամ կը զգայ թէ իր հարազատ տունը վերադարձած է։ Իր փափաքն է որ օր մը վերջնականապէս վերադառնայ հայրենիք եւ իր արմատներուն։

Ապա, երկու աշակերտուհիներ, Նայիրի Փանոսեան ու Ալինա Լահեան, ընթերցեցին Հայաստանի մասին իրենց գրած բանաստեղծութիւնները։

Հայոց Ցեղասպանութեան 100-ամեակին մասին անդրադառնալով, աշակերտուհի մը, Թանիա Պույուքեանց, ներկայացուց իր եւ իր դասընկերներուն կողմէ քննարկուած գաղափարներ պատշաճօրէն յարգելու յիշատակը մեր նահատակներուն, որոնց շարքին՝ մասնակցիլ քաղաքական հաւաքներու, երիտասարդականի ցոյցերու, եկեղեցական արարողութիւններու, եւ միջոցներ որոնելով օտարներուն եւ ընդհանրապէս ուսանողներուն յաւելեալ տեղեկութիւններ փոխանցել Ցեղասպանութեան մասին։

Վերջին խօսք առնող աշակերտը, Լիանա Չրախճեան, յուզումով արտայայտուեցաւ որ այս տարի կ՚աւարտէ Շամլեան Ազգ. Վարժարանը եւ ցաւ յայտնեց որ ստիպուած է ուսումը շարունակել ոչ-հայկական վարժարանի մէջ, շրջանին մէջ հայկական երկրորդական վարժարանի մը չգոյութեան պատճառով։

Ապա, հանսդիսավարը բեմ հրաւիրեց Առաջնորդ Սրբազանը Հայրը որ փոխանցէ իր օրհնութեան խօսքը։

Առաջնորդ Սրբազանը նշեց, որ այսօր աշակերտութեան այցելութիւնն ու իրենց պատրաստած յայտագիրը օրհնաբեր եւ անմոռանալի առիթ մը եղաւ բոլորիս համար։ Ան բարձր գնահատեց աշակերտները, որոնք իսկապէս պատիւ կը բերեն մեր վարժարանին, տնօրէնութեան, ուսուցչակազմին եւ ծնողներուն։ Շարունակելով իր խօսքը, Առաջնորդ Սրբազանը վստահեցուց որ մայր հայրենիքէն վերադարձին, այցելելէ ետք պատմական եւ սուրբ վայրերը, մեր աշակերտներու հոգիներուն մէջ աւելի պիտի արմատանայ սէրը մեր մշակոյթին, հողին, լեզուին եւ հաւատքին նկատմամբ։ Անդրադառնալով Հայոց Ցեղասպանութեան 100-ամեակին, Առաջնորդ Սրբազանը տեղեկացուց թէ 100-ամեակի ոգեկոչման առնչուած ժողովէ մը նոր վերադարձած է, ու նշեց թէ ոգեկոչման ձեռնարկները ո՛չ միայն աշխարհին պիտի յիշեցնեն մեր արդար դատն ու իրաւունքները, այլ մանաւանդ ցոյց պիտի տան թէ ինչպէս մեր նոր սերունդի զաւակները արթնութեամբ եւ գործնականօրէն մասնակից են մեր արդար դատին հետապնդման, ինչպէս աշակերտներուն խօսքերն ու արտասանութիւնները ապացուցեցին քիչ առաջ։

Աշակերտներուն յիշեցնելով այն ճշմարիտ խօսքը որ կ՚ըսէ՝ «ինչ որ ցանես զայն կը հնձես», Առաջնորդ Սրբազանը յայտնեց թէ մեր ակնկալութիւնն է որ մեր աշակերտներուն էութեան մէջ սերմանուած սէրն ու յարգանքը մեր հաւատքին եւ մշակոյթին հանդէպ օր մը առատ բերքով վերադառնան մեր ժողովուրդին, եւ անոնք որպէս կրթական մշակներ, հոգեւոր առաջնորդներ եւ ազգի նուիրեալներ ծառայեն մեր ազգին։ Եզրափակելով իր խօսքը, Առաջնորդ Սրբազանը իր գոհունակութիւնը յայտնեց տնօրէնութեան եւ ուսուցիչներուն իրենց տածած հոգածութեան համար, նաեւ գնահատեց ծնողները, որ անոնք իրենց զաւակները կը վստահին Ազգ. վարժարաններուն։

Ապա, աշակերտները Ս. Մեսրոպ Մաշտոցի քանդակով յուշանուէր մը յանձնեցին Առաջնորդ Սրբազանին։ Ան իր կարգին դպրոցի գրադարանին նուիրեց Հրայր Բազէի «Երկիր 2 Երկիր» նկարչական ալպոմը եւ փոքրիկ աղօթքներ բաժնեց աշակերտութեան։

Հանդիպումը իր աւարտին հասաւ Առաջնորդ Սրբազան Հօր «Պահպանիչ» աղօթքով եւ «Կիլիկիա» մաղթերգով։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022