Ճրագալոյցն ու Ս. Ծննդեան Տօնը Մեր Թեմին Մէջ


Հայաշխարհին հետ, Արեւմտեան մեր Թեմը եւս Ս. Ծննդեան եւ Աստուածայայտնութեան տօնը նշեց եկեղեցական հոգեպարար արարողութիւններով ու հանդիսաւոր տօնակատարութիւններով, որոնք տարածուեցան երեք օրերու վրայ։

Երեքշաբթի, 5 Յունուար 2016ի երեկոյեան, Ս. Ծննդեան Ճրագալոյցին, Ս. Պատարագ տեղի ունեցաւ մեր բոլոր եկեղեցիներուն մէջ։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան պատարագեց եւ քարոզեց Հոլիվուտի Ս. Կարապետ Մայր Եկեղեցւոյ մէջ եւ հաւատացեալներուն տուաւ Քրիստոսի Ս. Ծննդեան աւետիսը։

Չորեքշաբթի, 6 Յունուարի առաւօտուն, Ս. Ծննդեան եւ Աստուածայայտնութեան տօնին առիթով, բոլոր եկեղեցիներուն մէջ Ս. Պատարագ մատուցուեցաւ եւ կատարուեցաւ ջրօրհնէքի արարողութիւն։ Առաջնորդ Սրբազանը պատարագեց եւ քարոզեց Էնսինոյի Ս. Նահատակաց Եկեղեցւոյ մէջ: Ներկաներուն շարքին էին Հայաստանի հիւպատոսարանի խորհրդական Ռազմիկ Ստեփանեան եւ հիւպատոս Արմելա Շաքարեան:

Առաջնորդ Սրբազանը իր պատգամը սկսաւ ողջունելով պաշտօնական հիւրերն ու հաւատացեալները եւ մաղթելով ամենայն բարիք: Ան նշեց, որ Ս. Ծննդեան տօնը վերանորոգութեան հանգրուան մըն է Քրիստոսի Լոյսով, նաեւ հրաւէր մը՝ որ ծառայենք հետեւելով իր օրինակին: Մեր Տէրը աշխարհ եկաւ իբրեւ արդարութեան արեգակ, որպէսզի լուսաւորէ մեր կեանքը եւ մեր աչքերը բանայ Իր Լոյսին եւ Ճշմարտութեանց: Ան համեստ եւ խոնարհ պայմաններու մէջ իբրեւ նոր արքայ աշխարհ եկաւ, համեստ եւ բարի հովիւներուն յայտնուեցաւ եւ ժամանակի գիտնական եւ մեծ մոգերու կողմէ երկրպագութիւն ստացաւ։ Հետեւաբար, մենք ալ պարտինք մեր սիրտերն ու կեանքերը լուսաւորել իր լոյսով եւ այդ լոյսը տարածել մեր շրջապատին մէջ: Առաջնորդ Սրբազանը կոչ ուղղեց հետեւելու սիրոյ, համեստութեան ու ծառայասիրութեան Աստուածորդւոյն օրինակին, յիշեցնելով, որ ան եկաւ մարդուն ծառայելու առաքելութեամբ. այս պատգամը յատուկ նշանակութիւն կը զգենու այս տարի, որովհետեւ 2016ը Վեհաառ Հայրապետին կողմէ հռչակուած է իբրեւ Ծառայութեան Տարի:

Ս. Պատարագի աւարտին, Առաջնորդ Սրբազանը կատարեց Քրիստոսի Ս. Մկրտութիւնը խորհրդանշող ջրօրհնէքի արարողութիւնը: Խաչի կնքահայրն էր փոքրիկն Շանթ Ազայեան: Արարողութեան աւարտին, Առաջնորդ Սրբազանը օրհնեց հաւատացեալները, խաչի կնքահայրն ու անոր ծնողները:

Իսկ Հինգշաբթի, 7 Յունուարի առաւօտուն, Ս. Ծննդեան Մեռելոցի օրուան առիթով հոգեհանգստեան յատուկ արարողութիւններ տեղի ունեցան Հոլիվուտ Հիլզի Forest Lawn գերեզմանատան «Hall of Liberty»-ի սրահին եւ Կլենտէյլի Forest Lawn գերեզմանատան «Church of the Recessional» եկեղեցւոյ մէջ, աղօթք բարձրացնելով մեր ընտանեկան հարազատներուն ու ազգի ննջեցեալներուն հոգիներու խաղաղութեան համար: Առաջնորդ Սրբազանը նախագահեց Հոլիվուտ Հիլզի արարողութեան:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

Sempetmber 25, 2022 Sempetmber 18, 2022