Ս. Ծննդեան Ճրագալոյցը Մեր Թեմի Եկեղեցիներէն Ներս

Կիրակի, 5 Յունուար 2020-ին, մեր Տիրոջ եւ Փրկչին Յիսուս Քրիստոսի Ս. Ծննդեան եւ Աստուածայայտնութեան նախօրեակին, մեր Թեմի բոլոր եկեղեցիներուն մէջ Ճրագալոյցի Ս. Պատարագ մատուցուեցաւ։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ մատուցանեց եւ իր պատգամը փոխանցեց Էնսինոյի Ս. Նահատակաց եկեղեցւոյ մէջ։ Նշենք, որ նախքան Ս. Պատարագը, Կիրակնօրեայ վարժարանի սաները ընթերցեցին մարգարէական ընթերցուածները։

Առաջնորդ Սրբազանը իր քարոզին մէջ նախ հակիրճ տողերու մէջ ներկայացուց Քրիստոսի Ս. Ծննդեան խորհուրդի հանգամանքները եւ շեշտը դրաւ հրեշտակին կողմէ «մի՛ վախնաք» քաջալերական խօսքին վրայ, որ երեք առիթներով շեշտուեցաւ. առաջին անգամ հրեշտակին կողմէ հովիւներուն Քրիստոսի Ս. Ծնունդը աւետելու ժամանակ, ապա հրեշտակապետին կողմէ Մարիամին յղիութիւնը աւետելու ընթացքին եւ Յովսէփին Մարիամը իրեն կնութեան առնելու խրախուսիչ պատգամին մէջ։ «Հովիւներն ու մոգերը մեծ ուրախութիւն ապրեցան՝ լսելով Քրիստոսի Ս. Ծննդեան աւետիսը։ Անոնք գացին տեսնելու եւ երկրպագելու նորածին Թագաւորին ու վերադարձան՝ փառաբանելով զԱստուած այն բոլոր բաներուն համար, որոնք լսեցին ու տեսան։ Այսօր, նորածին Արքան պէտք է վերածնի մեր սիրտերուն եւ հոգիներուն մէջ. պէտք է մեր հոգիի աչքերով տեսնենք Բեթղեհէմի պայծառ աստղը եւ հոգիի ականջներով լսենք հրեշտակին քաջալերական խօսքերը։ Պէտք չէ վախնանք, որովհետեւ այսօր մեզի համար Փրկիչ մը ծնաւ՝ մեր մեղքերուն փոխարէն Իր Արիւնը փրկագին տալու եւ յաւիտենական կեանքի խոստումը բերելու համար, ինչպէս նաեւ մեր կեանքը լուսաւորելու, որպէսզի մենք եւս լուսաւորենք մեր շրջապատը, տուները, մեր Եկեղեցին եւ ազգային կեանքը։ Հետեւաբար, եկէք միշտ փառք տանք առ Բարձրեալն Աստուած, շարունակենք աղօթել աշխարհի խաղաղութեան եւ յատկապէս Միջին Արեւելքի համար։ Թող սէրը, հաճութիւնն ու բարի կամեցողութիւնը առաջնորդեն մեզ մեր առօրեայ յարաբերական կեանքին մէջ», նշեց ան։

Ս. Պատարագի աւարտին, «Խորհուրդ Մեծ» շարականի երգեցողութեամբ Առաջնորդ Սրբազանը Ս. Խորանէն Քրիստոսի եւ Աստուածայայտնութեան լոյսը խորհրդանշող մոմը վառելով փոխանցեց հաւատացեալներուն, որոնք իրենց մոմերը վառած լուսաւորեցին եկեղեցին եւ ապա Ս. Ծննդեան լոյսը տարին իրենց բնակարանները։

Print Friendly, PDF & Email

ՎԵՐՋԻՆ ԼՈՒՐԵՐ

Ուսումնական 2021-2022 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Հովուական գուրգուրանքով եւ հայրական ջերմ սիրով Արեւմտեան Թեմի Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը,... [...]

Կոչ Լիբանանահայութեան Զօրակցութեան

Ն.Ս.Օ.Տ.Տ. Արամ Ա. Վեհափառ Կաթողիկոսի՝ լիբանանահայութեան զօրավիգ կանգնելու համար մեզի ուղղուած կոչին ընդառաջ, այսու պաշտօնապէս բացուած կը յայտարարենք մեր նախագահութեամբ... [...]

2021 – Արցախի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց, եւ մեր ժողովուրդի զաւակներուն 2021 տարուան սեմին, Մեծի Տանն Կիլիկիոյ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 10, 2021 October 3, 2021