Հայաստանեայց Առաքելական Եկեղեցւոյ Հոգեւոր Եղբայրակցութեան ներկայացուցիչները, գլխաւորութեամբ վարչութեան ատենապետ Աւօ Եղբայր Գապաքչուզեանի, Երեքշաբթի, 14 Յունիս 2016ին այցելեցին Ազգային Առաջնորդարան եւ ընդունուեցան Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի կողմէ: Եղբայրակցութեան ներկայացուցիչները եկած էին Առաջնորդ Սրբազանը շնորհաւորելու վերընտրութեան առիթով ու փոխանցեցին իրենց բարեմաղթութիւնները:
Խորհրդակցութեան նիւթ դարձան Եղբայրակցութեան հոգեւոր ծառայութեան աշխատանքներն ու ծրագիրները, որոնց մասին Առաջնորդ Սրբազանը արձանագրեց գնահատանք եւ կատարեց թելադրանքներ:
Առաջնորդ Սրբազանը Չորեքշաբթի, 15 Յունիսին ընդունեց այցելութիւնը նաեւ Հայկական Ոսկրածուծի Հիմնարկի վարչութեան, որ նմանապէս Ազգ. Առաջնորդարան եկած էր Առաջնորդ Սրբազանը շնորհաւորելու վերընտրութեան առիթով: Պատուիրակութիւնը կը գլխաւորէր Հիմնարկի նախագահ Տոքթ. Ֆրիտա Ճորտըն:
Հ. Ո. Հիմնարկի ներկայացուցիչները այս առիթով Առաջնորդ Սրբազանին հակիրճ տեղեկութիւններ տուին իրենց հայրենանուէր ու մարդասիրական աշխատանքներուն մասին: Առաջնորդ Սրբազանը գնահատանքով արտայայտուեցաւ նուիրեալ ծառայողներուն մասին եւ յաջողութիւն մաղթեց անոնց ծրագիրներուն:
