Չորեքշաբթի, 3 Օգոստոս 2016ին, Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեան ընդունեց այցելութիւնը Ազգ. Առաջնորդարանի բարեկամներէն՝ հանգուցեալ Գրիգոր Պետրոսեանի տիկնոջ՝ Քէթիին, դստեր՝ Ճէյն Ասմարին ու ամուսնոյն՝ Սքաթ Ասմարին եւ թոռներուն, որոնք եկած էին իրենց ամուսնոյն, հօր, եւ մեծ հօր յիշատակին ձօնուած խաչքարը տեսնելու եւ յուշատախտակի քօղազերծումը վկայելու, որմէ ետք, Առաջնորդ Սրբազան Հօր ուղեկցութեամբ աւելի մօտէն ծանօթացան Ազգային Առաջնորդարանի կառոյցին եւ բաժանմունքներուն։
Այս առթիւ, Տէր եւ Տիկին Ասմար, գնահատելով Ազգ. Առաջնորդարանի առաքելութիւնը, եւ իբրեւ գործնական արտայայտութիւն մեր Եկեղեցւոյ հանդէպ իրենց ունեցած նուիրումին, իշխանական նուիրատուութեան խոստում մը կատարեցին, որ պիտի յատկացուի Ազգ. Առաջնորդարանի Քրիստոնէական Դաստիարակութեան Բաժանմունքին եւ երիտասարդական ծրագիրներուն։ Մանրամասնութիւնները պիտի յայտարարուին մօտ ապագային։