Ազգ. Ֆերահեան Վարժարանի 8րդ Կարգի Աշակերտները Այցելեցին Ազգ. Առաջնորդարան


Հաւատարիմ մնալով Ազգային Առաջնորդարանը ուխտավայր նկատելու մեր աշակերտներու բարի աւանդութեան, Ազգ. Ֆերահեան վարժարանի 8րդ կարգի աշակերտները Ուրբաթ, 26 Փետրուար 2016ի առաւօտուն այցելեցին Ազգ. Առաջնորդարան եւ հիւրընկալուեցան Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի կողմէ, որուն կողքին էր Արժ. Տ. Նարեկ Աւ. Քհնյ. Փեհլիվանեան: 49 աշակերտներու կ’ընկերանային խումբ մը դաստիարակներ:

Աշակերտները առաջին հերթին Առաջնորդ Սրբազանին եւ Տէր Հօր հետ աղօթքի պահ մը ունեցան «Ս. Տրդատ եւ Ս. Աշխէն» մատրան մէջ. հաւաքական «Հայր Մեր»էն ետք, երգուեցան Արեւագալի շարականներ:

Այնուհետեւ, աշակերտները անցան «Տիգրան եւ Զարուհի Տէր Ղազարեան» սրահը, ուր ստեղծուեցաւ հայկական մշակոյթ բուրող մթնոլորտ մը: Դաստիարակներէն՝ Տիկին Սեզա Քիւրտեան բացատրութիւն տուաւ այս այցելութեան նպատակին մասին եւ վարեց յաջորդող յայտագիրը, որ Փետրուարին զուգադիպելով՝ նուիրուած էր Ս. Վարդանանց: Խումբ մը աշակերտներ արտասանեցին Վ. Թէքէեանի «Խորհուրդ Վարդանանց»ը, Քրիսթինա Օղլեան եւ Նանօր Սերայտարեան երաժշտական կտորներ ներկայացուցին յաջորդաբար դաշնակով ու ջութակով:

Յայտագիրի աւարտին, Առաջնորդ Սրբազանը պատգամ մը ուղղեց հիւր աշակերտներուն: Ան գնահատեց դաստիարակները, որոնք աշակերտները առաջնորդած են ազգի այս յարկը, նաեւ աշակերտները՝ իրենց գեղեցիկ կատարումներուն համար, որոնք արտայայտութիւնն են իրենց ուշիմութեան ու արուեստներու հանդէպ սիրոյն: Առաջնորդ Սրբազանը ընդհանուր գիծերու մէջ ծանօթութիւններ տուաւ Մեծի Տանն Կիլիկիոյ Կաթողիկոսութեան պատմականին, Ցեղասպանութեան հետեւանքով անոր պարտադրուած աքսորականի վիճակին, կառոյցին ու համակարգին մասին, որուն մէկ անդամն է մեր Թեմը՝ իր Ազգ. Առաջնորդարանով, ժողովականութեամբ, անոնց կողքին գործող եկեղեցիներով, դպրոցներով ու յարակից միաւորներով: Ան շեշտեց, որ մեր վարժարաններն ու աշակերտները Ազգ. Առաջնորդարանի հոգածութեան գլխաւոր առարկաներէն են, որպէսզի հայ աշակերտները հասակ առնեն ու հարստանան քրիստոնէական հաւատքով ու ազգային ոգիով, եւ ինչպէս արտասանեցին աշակերտները՝ Վարդան Մամիկոնեանը «երթայ միշտ յառաջ»:

Առաջնորդ Սրբազանը նաեւ նշեց, որ Փետրուար ամիսը բազմաթիւ տօներու շրջան է. տօնեցինք Ս. Ղեւոնդեանց ու Ս. Վարդանանց տօները, ապա նաեւ Տեառնընդառաջը: Ան բացատրութիւններ տուաւ այս տօներուն պատմականին ու անոնցմէ մեզի հասած պատգամներուն մասին, որոնք յորդորներ են քրիստոնէական հաւատքի ու մեր ազգային ինքնութեան հաւատարմութեան: Առաջնորդ Սրբազանը յիշեց նաեւ, որ կը գտնուինք Մեծ Պահքի շրջանին մէջ, որ Ս. Յարութեան յաղթանակի տօնը կանխող՝ հոգեկան մաքրութեան ու վերանորոգութեան շրջան է: Վերջապէս, ան յիշեցուց, որ 2015 տարին նուիրուած էր Ցեղասպանութեան 100ամեակին, մեր եկեղեցին սրբադասեց մեր միլիոնաւոր նահատակները, որոնց մասունքները այսօր յատուկ խաչերու մէջ դրուած՝ կը գտնուին մեր եկեղեցիներուն մէջ, որպէսզի հաւատացեալներ նահատակներուն բարեխօսութեան խնդրանքով աղօթք մատուցեն: Ան իր խօսքը եզրափակեց յորդորելով աշակերտները, որ մեր նահատակներուն, Ս. Վարդանանց ու Ս. Ղեւոնդեանց պատգամները կենդանի եւ ամուր պահեն իրենց կեանքերուն ու հոգիներուն մէջ, հաւատարիմ մնան Վարդանանց հերոսամարտի «միշտ յառաջ» պատգամին եւ կենսաւորեն զայն, ինչ որ կը ստանան հայկական վարժարանէն, ծառայեցնեն ոչ միայն անհատական յաջողութիւններու համար, այլ նաեւ՝ մասնակցութիւն բերելու մեր ազգային կեանքին:

Առաջնորդ Սրբազանը յայտարարեց, որ իբրեւ նուէր՝ աշակերտները այսօր պիտի ստանան սրբադասեալ նահատակներուն խորհրդապատկերը, ինչպէս նաեւ բանաստեղծ Ժագ Ս. Յակոբեանի բանաստեղծութիւններէն փունջով մը կազմուած հատոր մը, որ Ազգ. Առաջնորդարանին կողմէ հրատարակուեցաւ 2015ին, Ցեղասպանութեան 100ամեակին առիթով, եւ բանաստեղծին փափաքով նուէր պիտի տրուի հայկական բոլոր վարժարաններու պատանի աշակերտներուն: Ան ընթերցեց հատորին բանաստեղծութիւններէն «Մենք»ը, մաղթելով, որ այս գրքոյկը մշտական ընկերակից մը ըլլայ աշակերտներուն եւ զանոնք վարակէ հարիւրամեայ բանաստեղծին քրիստոնէաշունչ ու ազգայնաշունչ ոգիով:

Աշակերտները հարցումներ ունէին Առաջնորդ Սրբազանին. հարց տրուեցաւ, որ ան ինչո՞ւ ընտրած է հոգեւոր ծառայութիւնը, ի՞նչ պիտի ըլլար այլընտրանքը, ինչպիսի՞ պահեր հաճելի են կամ տրտմեցնող: Առաջնորդ Սբազանը բացատրեց, որ հոգեւորականի ասպարէզ առաջնորդուելուն մէջ, հիմնական դեր ունեցած են ծնողները, որոնք զինք մղած են իբրեւ դպիր ծառայելու եկեղեցւոյ մէջ, ապա դառնալու դպրեվանքի սան: Երկրորդ ընտրանքը պիտի ըլլար ուսուցչութիւնը, սակայն իբրեւ հոգեւորական՝ կը կատարէ նաեւ այդ առաքելութիւնը: Հաճելի պահեր են աշակերտներու եւ դեռատի մանուկներու հետ հանդիպումները՝ երբ աշակերտներ Ազգ. Առաջնորդարան կ’այցելեն, իսկ տխրութեան պահեր են մեր ժողովուրդը տագնապեցնող վիճակները, ինչպէս՝ Սուրիոյ հայութեան ներկայի վիճակը, որուն համար անցեալ Կիրակի տեղի ունեցաւ թելեթոն: Այլ հարցումի մը՝ Առաջնորդ Սրբազանը պատասխանեց, որ հաւատացեալը պէտք է հեռու մնայ նախապաշարումներէ եւ սին հաւատալիքներէ, որոնց համար իբրեւ պաշտպան ունի խաչն ու իր զօրութիւնը։

Հանդիպումի աւարտին, Առաջնորդ Սրբազանը օրհնեց աշակերտներն ու ուսուցիչները, եւ «Պահպանիչ»ով արձակեց զանոնք: Բոլորը միասնաբար երգեցին «Կիլիկիա»ն եւ Հայաստանի Քայլերգը:

Ազգ. Առաջնորդարանին հրաժեշտ տալէ առաջ, անոնք Առաջնորդ Սրբազանին հետ ունեցան խմբանկար մը:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022

ԼՈՒՐԵՐՈՒ ԱՐԽԻՒ