Տօն Անուանակոչութեան Ս. Քառասնից Մանկանց Եկեղեցւոյ


Շաբաթ, 25 Մարտ 2017ին, Հայց. Առաք. Եկեղեցին տօնեց Քրիստոսի խաչակիր գունդի նահատակներէն՝ Ս. Քառասնից Մանկանց տօնը, որ նաեւ անուանակոչութեան օրն է Օրէնճ Քաունթիի Ս. Քառասնից Մանկանց Եկեղեցւոյ։ Այս առիթով, Կիրակի, 26 Մարտին, Թեմիս Բարեխնամ Առաջնորդ Բարձր. Տ. Մուշեղ Արք. Մարտիրոսեան Ս. Պատարագ մատուցանեց եւ մատաղօրհնէք կատարեց Ս. Քառասնից Մանկանց Եկեղեցւոյ մէջ։

Առաջնորդ Սրբազան Հայրը «Հրաշափառ»ի երգեցողութեամբ մուտք գործեց եկեղեցի առընթերակայութեամբ Հոգշ. Տ. Վաչէ Վրդ. Պալըքճեանի ու Արժ. Տ. Գարեգին Քհնյ. Պետուրեանի։ Ս. Պատարագին աղօթակից էր նաեւ Գերպ. Տ. Թորգոմ Ծ. Վրդ. Տօնոյեան։

Իր պատգամին սկզբնաւորութեան, Առաջնորդ Սրբազան Հայրը առաջին հերթին ողջունեց ներկայ հաւատացեալներն ու Ս. Քառասնից Մանկանց եկեղեցւոյ մեծ ընտանիքի անդամները, ապա ներկայացուց Գերպ. Տ. Թորգոմ Ծ. Վրդ. Տօնոյեանն ու Հոգշ. Տ. Վաչէ Վրդ. Պալըքճեանը։

Շարունակելով իր պատգամը, Առաջնորդ Սրբազանը խօսեցաւ մէկ կողմէ՝ Սրբոց Քառասնից Մանկանց վարքին ու նահատակութեան, եւ միւս կողմէ՝ օրուան Աւետարանի ընթերցումին մէջ յիշատակուած՝ անիրաւ դատաւորին ու այրի կնոջ օրինակներուն զուգորդութեան մասին, շեշտելով, որ երկուքին ալ այժմէական պատգամը այն է, որ հաւատացեալը պէտք չէ ընկրկում ունենայ, աղօթէ յարատեւօրէն եւ չյուսահատի: Առաջնորդ Սրբազան Հայրը նշեց. «Սեբաստիոյ մէջ նահատակուած քառասուն երիտասարդ զինուորները սուրբեր են, որոնք իրենց քրիստոնէական հաւատքին մէջ աննկուն եւ անխորտակ մնացին. սուրբեր են, որոնք ի գին ամէն զոհողութեան, իրենց հաւատքին մէջ ամենեւին չթուլցան եւ չտկարացան, այլ արհամարհելով երկրաւոր փառքն ու իշխանութիւնը, յանձն առին նահատակութիւն, արժանանալու համար Աստուծոյ շնորհքին եւ փառաց պսակին: Անոնք մեզի համար օրինակ են անսակարկ հաւատքի, յոյսի, աղօթքի, եւ Աստուծոյ հանդէպ վստահութեան: Իրենց մղած բոլոր ճակատամարտերուն մէջ, նոյնիսկ հալածանքի ենթարկուելու ընթացքին, ու մինչեւ նահատակութիւն՝ անոնք չդադրեցան աղօթելէ եւ զԱստուած փառաբանելէ: Մահուան սպառնալիքն իսկ չսասանեցուց անոնց հաւատքը, որովհետեւ ամբողջ սրտով կը հաւատային, որ թէեւ պիտի մեռնէին, սակայն յաւիտենական կեանք պիտի ունենային Աստուծոյ արքայութեան մէջ»։

Առաջնորդ Սրբազան Հայրը կանգ առաւ եկեղեցւոյ անուանակոչութեան օրը նշելու կարեւորութեան վրայ, շեշտելով, որ անիկա միայն տօնախմբութեան առիթ չէ, այլ նաեւ ծխական համայնքի անդամներուն համար առիթ է ինքնաքննարկումի, սորվելու անցեալի փորձառութիւններէն, վերանորոգելու ծառայութեան ուխտը եւ աշխատանքին մօտենալու նոր յանձնառութեամբ, որպէսզի համայնքին կեանքը ապրի յարատեւ բարելաւում. «Ս. Քառասուն Մանուկները այս եկեղեցւոյ ու ծխականներուն պաշտպան սուրբերն են, Աստուծոյ մօտ մեր բարեխօսները: Մենք ալ պարտինք մեր կեանքը վարել համապատասխան անոնց ամուր հաւատքին, քաջութեան եւ նուիրումին: Այս ոգիով գործենք անհատապէս ու հաւաքաբար, ծառայելով մեր եկեղեցւոյ, ազգին, մանաւանդ, որ 2017-ը Վեհափառ Հայրապետին կողմէ հռչակուած է Վերանորոգութեան Տարի», յորդորեց Առաջնորդ Սրբազանը:

Նկատի ունենալով, որ ծխական շրջանը վերջերս ունեցած էր իր տարեկան անդամական ընդհանուր ժողովը եւ ընտրած՝ հոգաբարձութեան ու Ազգ. Երեսփոխանական Ժողովի անդամներ, Առաջնորդ Սրբազանը շնորհաւորեց նորընտիր հոգաբարձուներն ու երեսփոխանները եւ կոչ ուղղեց Հոգեւոր Հովիւին եւ ժողովականութեան անդամներուն, որ միասնական եւ գործակցական ոգիով աշխատին, գործեն վերանորոգ կամքով ու յանձնառութեամբ, ներդաշնակութեամբ ու եղբայրական մօտեցումով, ներշնչում առնելով սուրբերու վարքէն ու անոնց աւանդէն, եւ այս՝ ի խնդիր եկեղեցւոյ կեանքի բարելաւման եւ ի փառս Աստուծոյ: Առաջնորդ Սրբազանը հաւատացեալները հրաւիրեց յարատեւօրէն ու անկեղծօրէն աղօթելու, մնալու յուսալից եւ հաւատքի մէջ ամուր, ինչ որ ալ ըլլան պայմանները: Ան նշեց, որ շուտով պիտի հասնինք Աւագ Շաբաթուան, որ մեզի հրաւէր է վերանորոգելու մեր ուխտն ու հաւատքի յանձնառութիւնը, բարելաւելու ծառայական առաքելութեան ընթացքը, որովհետեւ վերանորոգութիւնը Քրիստոսի երկրաւոր կեանքի առաքելութեան ոգին եւ սիրտն է եղած։

«Տէր Ողորմեա»յի երգեցողութենէն առաջ, խօսք առաւ Արժ. Տ. Գարեգին Քհնյ. Պետուրեան եւ երախտագիտութեան խօսք ուղղեց Առաջնորդ Սրբազան Հօր, շնորհաւորեց եկեղեցւոյ մեծ ընտանիքը՝ անուանակոչութեան տօնին առթիւ եւ բարի գալուստ ու բարի երթ մաղթեց միաբան հայրերուն։

Յաւարտ Ս. Պատարագին, կատարուեցաւ հոգեհանգիստ՝ եկեղեցւոյ հանգուցեալ բարերարներուն, հոգաբարձուներուն եւ նուիրեալ սպասաւորներուն հոգւոց խաղաղութեան համար։ Ապա, Առաջնորդ Սրբազան Հայրը, շրջապատուած հոգեւորականներով եւ դպրաց դասի անդամներով, առաջնորդուեցաւ եկեղեցւոյ «Ղուկասեան» սրահը, ուր, կազմակերպութեամբ Եկեղեցւոյ Տիկնանց միութեան եւ մասնակցութեամբ հոծ բազմութեան, կատարեց մատաղի օրհնութիւնը։

Ուխտաւոր հաւատացեալներու մասնակցութեամբ տեղի ունեցաւ սիրոյ ճաշ։ Այս տարուան մատաղի բարերարն էր Քէոյլեան ընտանիքը։ Ճաշի ընթացքին, խօսք առաւ եկեղեցւոյ Հովիւը, որ յանուն Ս. Քառասնից Մանկանց եկեղեցւոյ մեծ ընտանիքին, ողջունեց եւ շնորհակալութիւն յայտնեց Առաջնորդ Սրբազան Հօր, շնորհակալութիւն յայտնեց բոլոր նուիրատուներուն եւ Տիկնանց Միութեան անդամներուն՝ իրենց տքնաջան աշխատանքին ու մատուցած ծառայութեանց համար։

«Պահպանիչ» աղօթքով վերջ գտաւ սիրոյ ճաշը։ Հաւատացեալները, օրուան խորհուրդով հաղորդուած, մեկնեցան իրենց բնակարանները, իրենց հետ ունենալով Սրբոց Քառասնից Մանկանց բարեխօսական աղօթքն ու աննկուն հաւատքը։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022