Մեծի Տանն Կիլիկիոյ Կաթողիկոսութեան Միաբանական Ընդհանուր Ժողով


Հինգշաբթի, 3 Ապրիլ 2014ի առաւօտեան, Ն.Ս.Օ.Տ.Տ. Արամ Ա. Կաթողիկոսի նախագահութեամբ, Մեծի Տանն Կիլիկիոյ Կաթողիկոսութեան Միաբանական Ընդհանուր Ժողովին բացումը կատարուեցաւ Անթիլիասի Մայրավանքին մէջ,։ Ժողովին կը մասնակցին Թեմիս բարեջան Առաջնորդ Բարձր. Տ. Մուշեղ Արք. Մարտիրոսեանն ու Թեմիս միաբան հայրերը։

Վեհափառ Հայրապետին պատգամէն յետոյ Տնօրէն Ժողովը իր տեղեկագիրը ներկայացուց, ապա տեղի ունեցաւ ընդհանուր քննարկում՝ միաբանութեան կեանքին ու առաքելութեան առնչուած աշխատանքներուն ու ծրագիրներուն մասին։ ժողովը նաեւ վաւերացուց Միաբանական Կանոնագրութիւնը, որ ենթարկուեցաւ որոշ բարեփոխումներու։

Ժողովի օրակարգի հիմնական հարցն էր դասախօսութիւններու ու քննարկումներու ճամբով լուսարձակի տակ բերել վերջին հարիւր տարիներու մեր ժողովուրդի հաւաքական յիշողութիւնը, յատկապէս շեշտելով մեր Սուրբ Աթոռին առնչուած յատկանշական դէպքերը ցեղասպանութենէն մինչեւ այսօր։

Ժողովը իր աշխատանքներու աւարտին պիտի հրապարակէ հայոց ցեղասպանութեան, ինչպէս նաեւ ընդհանրապէս Սուրիոյ հայութեան ու յատկապէս Քէսապի գծով յայտարարութիւն մը։

Միաբանական Ընդհանուր Ժողովի նախօրեակին, Երեքշաբթի, 1 Ապրիլին, Ն.Ս.Օ.Տ.Տ. Արամ Ա. Կաթողիկոսին նախագահութեամբ, Անթիլիասի Մայրավանքին մէջ տեղի ունեցաւ Ազգ. Կեդր. Վարչութեան Կրօնական Ժողովի հանդիպում, մասնակցութեամբ Թեմակալ Առաջնորդներուն։

Հանդիպման ընթացքին զեկոյցներ տրուեցան միջ-եկեղեցակիան ու միջ-կրօնական յարաբերութեանց, ծիսական ու Սրբադասման յանձնախումբերու աշխատանքներուն, եւ կրօնական բնոյթ ունեցող այլ հարցերու գծով։ Վեհափառ Հայրապետը նաեւ անդրադարձաւ ընդհանրապէս Սուրիոյ հայութեան ու յատկապէս Քէսապի գծով Մեծի Տանն Կիլիկիոյ Կաթողիկոսութեան կողմէ տարուող աշխատանքներուն։

Ժողովի ընթացքին ճշդուեցան հետեւեալները.-

ա) Հայոց ցեղասպանութեան 100-ամեակին առիթով տեղի ունենալիք Միւռոնօրհնէքը կատարել Կիրակի 19 Յուլիս, 2015-ին, Պիքֆայայի ցեղասպանութեան յուշարձանին շուրջ։

բ) Հայոց ցեղասպանութեան 100-ամեակին առիթով կազմակերպել ուխտագնացութիւններ՝ դէպի Անթիլիաս (13-20 Յուլիս, 2015)։

գ) Յատուկ կարեւորութեամբ շարունակել ընդհանրապէս Սուրիոյ հայութեան ու յատկապէս Քէսապի օժանդակութեան աշխատանքները թեմերէն ներս։

դ) Նորին Սրբութիւնը յայտնեց, որ Մայիսի սկիզբը հրաւիրուած է որպէս գլխաւոր դասախօս Պահրէյնի պետութեան կողմէ կազմակերպուած միջ-կրօնական համագումարին։ Վեհափառը նաեւ յայտնեց, որ Յունիսի սկիզբը պաշտօնական այցելութիւն պիտի տայ ու հանդիպում պիտի ունենայ Սրբազան Քահանայապետին, Ֆրանսիս Ա. Պապին հետ։

Շաբաթ, 5 Ապրիլին, Ս. Գրիգոր Լուսաւորիչի Մուտն ի Վիրապ տօնին, Պիքֆայայի մէջ տեղի պիտի ունենայ Միաբանական նոր շէնքի բացումը, նախագահութեամբ Վեհափառ Հայրապետին եւ մասնակցութեամբ միաբան հայրերու։

Print Friendly, PDF & Email

ՎԵՐՋԻՆ ԼՈՒՐԵՐ

Առաջնորդ Սրբազան Հօր Ս. Զատկուան Պատգամը

ԱՄԵՆԱԼՈ՜ՅՍ ՊԱՅԾԱՌ ԿԻՐԱԿԻՆ Կիրակիները, արեգակնային դրութեան ճշգրտութեամբ, կը յաջորդեն իրարու: Բայց Կիրակին այն, որուն կը սպասեն երկիր ու մարդկութիւն, Կիրակին,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

June 26, 2022 June 19, 2022