Ինչպէս ծանօթ է, Հայաստանի վարչապետ Տիգրան Սարգսեան, նախարարական պատուիրակութեան մը ընկերակցութեամբ, Լոս Անճելըս այցելեց անցեալ շաբաթավերջին։ Այս առիթով, պատուիրակութիւնը արժանացաւ շարք մը պաշտօնական ընդունելութիւններու։
Լոս Անճելըսի քաղաքապետ Անթոնիօ Վիարակոսա Կիրակի, 9 Դեկտեմբերի առաւօտուն, իր բնակարանին մէջ կազմակերպած էր ընդունելութիւն մը, որուն հրաւիրուած էր Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան։ Առաջնորդ Սրբազանը ներկայ եղաւ ընդունելութեան եւ փոխանցեց իր բարեմաղթութիւնները։
Նոյն օրը, կէսօրին, ի պատիւ Վարչապետին ու ընկերակիցներուն, ընդունելութիւն մը կազմակերպուած էր նաեւ Հ.Յ.Դ. Արեւմտեան Միացեալ Նահանգներու Կեդրոնական Կոմիտէին կողմէ։ Ներկայ եղան Առաջնորդ Սրբազանն ու Ազգային Վարչութեան ներկայացուցիչները՝ ատենապետուհի Տիկին Ռիմա Պօղոսեան եւ փոխ ատենապետ Տիար Ճորճ Չորպաճեան։ Հանդիպումը առիթ եղաւ զրուցելու Հայաստանի զարգացման ընթացքին ու կառավարական պատուիրակութեան Լոս Անճելըս առաքելութեան մասին։ Առաջնորդ Սրբազանը արտասանեց սրտի խօսք, յաջողութիւն մաղթելով վարչապետին ու ընկերակից պատուիրակութեան, Միացեալ Նահանգներ իրենց առաքելութեան մէջ։
