Փիլիպոս Ազգ. Վարժարանի 11րդ Կարգի Աշակերտները Ազգ. Առաջնորդարան Այցելեցին


Չորեքշաբթի, 30 Ապրիլ 2014-ի առաւօտեան, Ռոզ եւ Ալեք Փիլիպոս Ազգ. Վարժարանի 11-րդ դասարանի աշակերտները, իրենց ուսուցիչ ուսուցչուհիներուն հետ միասնաբար այցելեցին Ազգային Առաջնորդարան, եւ դիմաւորուեցան Թեմիս Բարեջան Առաջնորդ Բարձր. Տ. Մուշեղ Ս. Արք. Մարտիրոսեանի կողմէ։ Առաջնորդ Սրբազան Հօր կողքին էին Հոգշ. Տ. Պօղոս Աբղ. Թինքճեան եւ Արժ. Տ. Վիգէն Աւ. Քհնյ. Վասիլեան:

Աշակերտները նախ “Ս. Տրդատ եւ Ս. Աշխէն” մատրան մէջ “Աստուած օգնական”-ով եւ բարի լոյսով ողջունեցին Սրբազանը, որմէ ետք միասնաբար Տէրունական աղօթքը արտասանեցին: “Այսօր Յարեաւ” շարականի երգեցողութենէն եւ “Իմաստութիւն Հօր Յիսուս” աղօթքէն ետք “Տիգրան եւ Զարուհի Տէր Ղազարեան” սրահ անցնելով աշակերտները ներկայացուցին գեղարուեստական կոկիկ յայտագիր մը:

Բացման խօսք արտասանեց Հայագիտական բաժանմունքի պատասխանատու դաստիարակ Գէորգ Սարգիսեան, որ շնորհակալութիւն յայտնեց Առաջնորդ Սրբազան Հօր ջերմ ընդունելութեան եւ իր հոգածութեան համար։

Հանդիսավարն էր վարժարանի ուսուցչուհիներէն Տիկ. Թամար Թիւֆէնքճեան-Սերայտարեան։

Դաշնամուրի, կիթառի, շուիի եւ սրինգի ընկերակցութեամբ աշակերտները անհատաբար թէ խմբովին ներկայացուցին ազգայնաշունչ երգեր եւ բանաստեղծութիւններ:

Ապա, Առաջնորդ Սրբազան Հայրը բեմ հրաւիրուելով, նախ ողջունեց աշակերտներուն ներկայութիւնը իրենց հարազատ տան մէջ, որմէ ետք անդրադարձաւ անցնող շաբաթներուն յիշատակուած պատմական իրադարձութիւններուն ու յիշեցուց թէ Քրիստոսի Յարութեան յոյսով ու հաւատքով ապրող Քրիստոնեայ զաւակներուս համար, Ս. Յարութիւնը կը գօտեպնդէ մեզ դիմադրելու եւ տոկալու ամէն տեսակի դժուարութեանց: Իսկ Ս. Զատիկէն անմիջապէս ետք մեր ազգի աւելի քան մէկ ու կէս միլիոն նահատակներուն յիշատակի ոգեկոչման մասին խօսելով, գնահատեց աշակերտներուն մասնակցութիւնը գաղութի զանազան ձեռնարկներուն եւ նահատակաց օրուան նուրիուած իրենց դպրոցի ձեռնարկի յայտագրին համար: Սրբազանը աշակերտներուն յիշեցուց, թէ մենք ապացոյցն ենք, որ Քրիստոսի Յարութեան յոյսով ու հաւատքով յարուցեալ ժողովուրդ ենք: Ապա Առաջնորդ Սրբազանը աշակերտներուն բացատրեց ցեղասպանութեան նահատակներու սրբադասման ծրագրին մասին, ու բարի ճանապարհ մաղթեց աշակերտներուն, որովհետեւ երկու շաբաթներ ետք անոնք պիտի մեկնին Հայաստան ու պիտի այցելեն պատմական կոթողներ ու սրբավայրեր ինչպէս նաեւ բախտաւորութիւնը պիտի ունենան այցելելու Արցախ:

Առաջնորդ Սրբազանը Հայրը “Տէր ուղղեա զճանապարհս” աղօթքով ու “Պահպանիչ”ով բարի երթ ու դարձ մաղթեց աշակերտներուն, ու ապա խմբովին, բոլոր նուագագործիքներու ընկերակցութեամբ երգեցին “Կիլիկիա” մաղթերգը։ Հաւաքական խմբանկար մը առնելէ ետք, աշակերտները այցելեցին ու ծանօթացան Ազգային Առաջնորդարանի բաժանմունքներուն եւ անոնց մէջ տարուած աշխատանքներուն:

Աշակերտները յիշատակալի օր մը անցնելէ ետք, գոհունակութեամբ վերադարձան իրենց դպրոցը:

Print Friendly, PDF & Email

ՎԵՐՋԻՆ ԼՈՒՐԵՐ

Առաջնորդ Սրբազան Հօր Ս. Զատկուան Պատգամը

ԱՄԵՆԱԼՈ՜ՅՍ ՊԱՅԾԱՌ ԿԻՐԱԿԻՆ Կիրակիները, արեգակնային դրութեան ճշգրտութեամբ, կը յաջորդեն իրարու: Բայց Կիրակին այն, որուն կը սպասեն երկիր ու մարդկութիւն, Կիրակին,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

August 7, 2022 July 31, 2022