Հայրապետական Մաղթանք Ն.Ս.Օ.Տ.Տ. Արամ Ա. Կաթողիթոսի Գահակալութեան 20րդ Տարեդարձին Առթիւ


Ն.Ս.Օ.Տ.Տ. Արամ Ա. Կաթողիկոսի ընտրութեան եւ օծման 20րդ տարեդարձը Կիրակի, 28 Յունիս 2015ին, յատուկ արարողութեամբ, յարգանքի արտայայտութեամբ եւ առաւել շեշտով նշուեցաւ Արեւմտեան մեր Թեմի բոլոր եկեղեցիներուն մէջ, առիթ ընծայելով մեր ժողովուրդին, որ հաղորդակից դառնայ Վեհափառ Հայրապետին վաստակին, իրագործումներուն եւ առաջնորդած ուղիներուն։

Այս ուրախ առիթով, տեղի ունեցաւ Հայրապետական Մաղթանք եւ բարձրացուեցան Նորին Ս. Օծութեան արեւշատութիւն ու ընդերկար գահակալութիւն հայցող աղօթքներ։ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան հանդիսապետեց Էնսինոյի Ս. Նահատակաց Եկեղեցւոյ Ս. Պատարագին եւ իր պատգամին մէջ կանգ առաւ Վեհափառ Հայրապետին ծառայական կեանքին ու վաստակին առջեւ։ Ս. Պատարագը մատուցեց եկեղեցւոյ հովիւը՝ Արժ. Տ. Ռազմիկ Քհնյ. Խաչատուրեան։ Ներկայ էին Ազգային Վարչութեան ու ժողովականութեան անդամներ եւ բազմահարիւր հաւատացեալներ։

“Մաղթանք Հայրապետական”ի աւարտին, եւ “Ի Վեհ Բարձանց” մաղթերգէն ետք, Առաջնորդ Սրբազանը իր պատգամը սկսաւ Հայրապետական Մաղթանքի բառերով, ուր հաւատացեալը խնդրամատոյց կ’ըլլայ աղօթելով. “Օրհնէ՛, Տէ՛ր, մեր Հայրապետին կեանքի բոլոր օրերը, եւ զօրացուր զայն իր ծանրագոյն գործին ու բարձրագոյն պատասխանատուութեանց մէջ”։ Ան նշեց, որ այս աղօթքով էր որ պահ մը առաջ առ Աստուած խնդրանք բարձրացուցինք մեր եկեղեցւոյ անսասանութեան եւ մեր ազգային կեանքի շինութեան համար: Առաջնորդ Սրբազանը ապա անդրադարձաւ շաբթուան ընթացքին նշուած մեր եկեղեցւոյ ու ազգային տօներու այն մթնոլորտին ու անոնցմէ բխող բազմախորհուրդ պատգամներուն, որոնց մթնոլորտին մէջ կը նշենք Վեհափառ Հայրապետին գահակալութեան 20րդ տարեդարձը. ան յիշեցուց, որ Ս. Յարութեան տօնին յաջորդող շաբաթներուն, մինչեւ Համբարձում եւ Հոգեգալուստ, մեր եկեղեցին կը տօնէ Քրիստոսի հրաշափառ Ս. Յարութեան ու յաջորդող հրաշալի դէպքերուն յիշատակը, իսկ Հոգեգալուստէն մինչեւ Այլակերպութիւն, կը տօնախմբուին մեր հաւատքի հիմնադրութեան եւ մեր հայկական ինքնութեան ամրապնդման տօները, որոնց շարքին՝ շարք մը հայ մեծագործ, պատմակերտ ու ազգակերտ հայրապետներու եւ ռահվիրաներու տօները՝ Ս. Գրիգոր Լուսաւորիչի, Մեծն Ներսէս Հայրապետին, Ս. Տրդատ Թագաւորին եւ Ս. Աշխէն Թագուհիին, Ս. Սահակ Կաթողիկոսի եւ Ս. Մեսրոպ Վարդապետի իրագործումները, անոնց՝ որոնք քրիստոնէութեան լոյսը տարածեցին Հայաստանի մէջ, եղան շինարար ու կազմակերպող, Հայ Տառերու գիւտով՝ հայ կնքեցին մեր ազգը եւ թողուցին իրենց վաստակը մարմնաւորող անջնջելի ժառանգութիւն։ Ան յայտնեց, որ մեր աղօթքներուն մէջ կը յիշենք այդ մեծ հայրապետներն ու մեծագործ թագաւորները, կ’ոգեկոչենք մեր հայրենիքին ու մեր ժողովուրդի կեանքին մէջ քրոստոնէութեան հաստատման ու տարածման անոնց աւանդը, ինչպէս նաեւ Հայ Գիրով հայութեան յաւերժութիւնը երաշխաւորելու անոնց իրագործումները։

Այս իրագործումները նշող տօները կը խորհրդանշեն մեր հաւատքի ու ազգութեան յաւերժութիւնն ու ամրապնդումը, շարունակեց Առաջնորդ Սրբազանը, ընգծելով, որ անոնք արդիւնք էին ծառայութեան ու ստեղծագործութեան, կը պատգամեն նոյն ուղիին հաւատամութիւն։ Ու խօսելով Ս. Աթոռոյս գահակալ Վեհափառ Հայրապետին արժանիքներուն մասին, ան շեշտեց, որ Ն. Ս. Օծութիւնը հաւատարիմ եւ ուխտապահ ժառանգորդն է Ս. Գրիգոր Լուսաւորիչ Հայրապետին հաւատքին ու յանձնառութեան, Ս. Տրդատ Թագաւորին քրիստոնէաշունչ եւ ազգաշէն ծառայութեանց, Մեծն Ներսէս բարեկարգիչ ու կազմակերպիչ Հայրապետին, Վռամշապուհ լուսամիտ արքային եւ անոր գործակիցներուն՝ Ս. Սահակ Հայրապետին եւ Ս. Մեսրոպ Մաշտոցի տեսիլքին, որոնց աւանդին ներշնչումով էր որ ան գործեց ու կը շարունակէ գործել 20 տարիէ ի վեր։ Առաջնորդ Սրբազանը յիշեցուց, որ Վեհափառ Հայրապետը, Մեծի Տանն Կիլիկիոյ Ս. Աթոռին գահակալ ընտրութենէն առաջ, Լիբանանի Առաջնորդութիւնը վարելու օրերէն, կերտեց վաստակ, անցնելով Լիբանանի քաղաքացիական պատերազմի բազմերես փորձառութիւններէն, իսկ երբ 20 տարի առաջ, իր մկրտութենէն ետք չորրորդ անգամն ըլլալով Հայց. Եկեղեցւոյ Սրբալոյս Միւռոնով օծում ստացաւ, դարձաւ արժանընտիր հայրապետ եւ շարունակեց ծառայել մեր եկեղեցւոյ, ազգին ու ժողովուրդին, գործելով Լուսաւորիչ Հայրապետին ու անոր յաջորդ պատմակերտ դէմքերուն ներշնչումով, եղաւ խիզախ առաջնորդ, բարեկարգող ու կազմակերպող, մշակոյթ հարստացնող, ու տակաւին, մեր Ս. Աթոռին ճանաչում ապահովեց միջազգային բեմերու վրայ, եղաւ միջ-եկեղեցական ու միջ-կրօնական յարաբերութիւններու ղեկավար, եղաւ յառաջապահ պաշտպանը մեր Դատին եւ դրօշակիրը մեր պահանջատիրութեան։ Այս բոլորը նկատի ունենալով, շարունակեց Առաջնորդ Սրբազանը, մենք աղօթեցինք, որ Աստուած օրհնէ Ն. Ս. Օծութեան կեանքի օրերը, որպէսզի ան շարունակէ իր բարձրագոյն պատասխանատուութիւնները, հովուէ մեր եկեղեցին ու ժողովուրդը, իսկ մենք, հետեւելով իր օրինակին, մեր ծառայական կեանքով մասնակից ըլլանք մեր եկեղեցւոյ ու ազգի պայծառացման սրբազան գործին։

Առաջնորդ Սրբազանը այս տօնական հանգրուանին առիթով եւ յանուն մեր Թեմի հոգեւորականաց դասուն, ժողովականութեան ու հաւատացեալ ժողովուրդին, շնորհաւորութեան խօսք ուղղեց Վեհափառ Հայրապետին, ընդգծելով, որ իբրեւ Ս. Աթոռոյս միաբանութեան անդամ, այս հանգրուանը կը նկատէ ուխտի վերահաստատման առիթ։ Ան մաղթեց, որ մեր ժողովուրդը երկար վայելէ Վեհափառ Հայրապետին հովուապետութիւնն ու մատուցած ծառայութիւնները, որոնց նորագոյն էջերը կերտուած են այս տարի, Ցեղասպանութեան 100ամեակին, պահանջատիրական ձայնի բարձրացումով ու Սիսի Կաթողիկոսարանի կալուածներուն գծով ներկայացուած դատական պահանջով. ան յոյս յայտնեց, որ Կաթողիկոսութեան կալուածներուն պահանջը առաջնորդէ հայապատկան բոլոր կալուածներուն վերադարձին, եւ ինչպէս որ անցեալին մեր պահանջն էր Հայաստանի անկախութեան վերահաստատումը, նոյնպէս ալ, ամբողջական Հայաստանի վերակերտումը դառնայ մեր վախճանական իրագործումը։

ՀՈԳԵՀԱՆԳԻՍՏ
Յաւարտ Ս. Պատարագի, հոգեհանգիստի պահուն, յատուկ աղօթք բարձրացուեցաւ Տ. Կորիւն Արք. Պապեանի վախճանման քառասունքին առիթով, անոր հոգւոյն խաղաղութեան համար։

Առաջնորդ Սրբազանը յարգանքով խոնարհեցաւ վախճանեալ Սրբազանին յիշատակին ու վաստակին առջեւ։ Ան յիշեցուց, որ Կորիւն Սրբազանը երկրաւոր այս կեանքէն հրաժեշտ առաւ 21 Մայիսին, անոր վերջին օծման եւ թաղման արարողութիւնները տեղի ունեցան 23 Մայիսին, Անթիլիասի մայրավանքին մէջ։ Մեր Թեմին մէջ եւս, 24 Մայիսին, յատուկ աղօթք բարձրացուեցաւ վախճանեալ Սրբազան Հօր հոգւոյն համար։

Առաջնորդ Սրբազանը հանգամանօրէն անդրադարձաւ Կորիւն Սրբազանի կեանքի վաստակին ու ծառայական կեանքին։ Ան նշեց, որ Վախճանեալ Սրբազանը, Դպրեվանքին մէջ իր ուսումը ամբողջացնելէ ետք, բարձրագոյն վկայականներու արժանացաւ եւ Ս. Աթոռ վերադառնալով, իր ծառայական կեանքը շարունակեց իբրեւ ուսուցիչ, թեմակալ Առաջնորդ եւ մտաւորական հոգեւորական, մնալով պարզ, համեստ, զուարթախոհ եւ ընկերային։ Առաջնորդ Սրբազանը յայտնեց, որ Կորիւն Սրբազանը եղած է իր ուսուցիչներէն, ծառայած է Բերիոյ (Ճեզիրէի շրջան), Պարսկաստանի եւ Քուէյթի ու Ծոցի Թեմերուն, իսկ քանի մը տարի առաջ, Մայրավանք վերադառնալով, վերստին եւ բոլորանուէր կերպով ձեռնարկած է մտաւորական եւ բանասիրական աշխատաքի, որովհետեւ նաեւ հայ գիրին ու հայ մշակոյթին մէկ հաւատաւոր նուիրեալն էր։ Ան այս ուղիին հաւատարիմ մնաց մինչեւ կեանքի վերջին օրերը, ու հակառակ զինք տառապեցնող հիւանդութեան, միշտ ալ մնաց յուսալից՝ վերադառնալու իր սիրած աշխատանքին։

Առաջնորդ Սրբազանը յայտնեց, որ մեծ է ցաւը Կորիւն Սրբազանի կորուստին, սակայն զինք միշտ պիտի յիշենք իբրեւ ուսուցիչ, իբրեւ մեր եկեղեցւոյ եւ Ս. Աթոռոյս մէկ հաւատարիմ ծառան, պիտի յիշենք անոր ծառայասիրութիւնը, խոնարհ եւ հեզ նկարագիրը, պիտի յիշենք, որ մշակոյթի ու գրականութեան երկրպագու մըն էր, տոգորուած՝ ազգային զգացումներով, ազգային տենչերով, ազգային գանձերը հարստացնելու հոգիով։ Ան հրաւիրեց հաւատացեալները, որ հոգեհանգստեան պահուն աղօթք բարձրացնեն հոգելոյս Սրբազանին հոգւոյ խաղաղութեան համար, եւ իր խօսքը եզրափակեց իր եւ ժողովականութեան անունով ցաւակցութիւն յայտնելով վախճանեալ Սրբազանի ընտանեկան հարազատներուն ու սգակիր բարեկամներուն, որոնք վասահաբար զինք պիտի յիշեն այնպէս, ինչպէս զայն ճանչցած են կեանքի բոլոր օրերուն։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022