Ազգ. Առաջնորդարանի Տիկնանց Օժանդակ Մարմնի Համբարձման Աւանդական Ճաշկերոյթը Աննախընթաց Յաջողութեամբ Պսակուեցաւ

 

Հինգշաբթի, 29 Մայիսը Համբարձման տօնն էր։ Քրիստոսի հրաշափառ Ս. Յարութենէն 40 օր ետք, Աստուածորդին երկինք համբարձաւ, հաւատացեալ մարդկութեան թողելով անժամանցելի պատգամ մը եւ յաւիտենական կեանքի խոստումը։ Համբարձման տօնը քրիստոնեայ աշխարհին համար նուիրական օր է, եւ մեր ժողովուրդի զաւակներու կողմէ կը յիշատակուի ժողովրդական յատուկ արարողութիւններով եւս։

Մեր Թեմին մէջ եւս, Համբարձման տօնին առիթով տեղի ունեցաւ Ս. Պատարագ, ապա նաեւ զուարթ ճաշկերոյթ։

Հանդիսապետութեամբ Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեանի, առաւօտեան ժամը 10ին, Կլենտէյլի Ս. Աստուածածին Եկեղեցւոյ մէջ Ս. Պատարագը մատուցեց եւ քարոզեց Փասատինայի Ս. Սարգիս Եկեղեցւոյ Հովիւ Արժ. Տ. Պօղոս Քհնյ. Պալթայեան։

Ս. Պատարագէն ետք, Կլենտէյլի “Րէնըսանս” ճաշարանին մէջ տեղի ունեցաւ խրախճանական ճաշկերոյթը։ Ձեռնարկը կազմակերպուած էր Ազգ. Առաջնորդարանի Տիկնանց Օժանդակ Մարմինի կողմէ եւ կը վայելէր Առաջնորդ Սրբազան Հօր հովանաւորութիւնն ու ներկայութիւնը։

Ձեռնարկին հիւրընկալութիւնը ստանձնած էր Թեմիս բարերարուհիներէն Տիկին Նուէր Սամուէլեան, տասը հազար տոլարի առատաձեռն նուիրատուութեամբ։

Ձեռնարկին ներկայ էին շուրջ 300 հիւրեր, որոնց կարգին Ազգային Վարչութեան, Հ.Օ.Մ. Շրջանային եւ տեղական վարչութեանց, ինչպէս նաեւ Թեմի եկեղեցիներու Տիկնանց Միութեանց անդամուհիներ, բարերարներ եւ հիւրեր։  Պատրաստուած էր տոհմիկ յայտագիր մը, համապատասխան այս տօնին առնչուող հայկական աւանդութեանց։

Հանդիսավարութիւնը յաջողութեամբ կատարեց Տիկնանց Մարմնի անդամներէն Տիկին Վարդուկ Աւետիքեանը, իսկ կազմի անդամներէն Տիկին Սօսի Պերղուտեան ներկայացուց Տօնին յատուկ խօսք մը եւ ներկաներուն փոխանցեց Համբարձումը աւանդականօրէն տօնախմբելու սովորութիւններ ու հաճելի մանրամասնութիւններ։ Գործադրուեցաւ գեղարուեստական կոկիկ յայտագիր մը, որուն ժողովրդական երգերով իր մասնակցութիւնը բերաւ արուեստագէտ Գագիկ Պատալեան։ Տեղի ունեցաւ նաեւ աւանդական վիճակաձգումը։ Ներկաները մեծապէս խանդավառուած տիրող մթնոլորտէն, իրենք եւս մասնակցեցան երգեցողութեան ու կատարեցին սրտաբուխ նուիրատութիւններ։

Օրուան մեծագոյն անակնկալը հանդիսացաւ Ազգային Առաջնորդարանիս նուիրատուներէն Տիկին Ալիս Նաւասարկեանի քսան հինգ հազար տոլարի իշխանական նուիրատուութիւնը, որ ազնիւ բարերարուհին սրտաբուխ կերպով կատարեց, գնահատելով Թեմիս այս նախաձեռնութիւնը ու անգամ մը եւս հաստատելով իր նուիրաբերող ու ազգանուէր նկարագիրը։

Առաջնորդ Սրբազան Հայրը իր օրհնութեան խօսքով գնահատանք արձանագրեց Տիկնանց Օժանդակ Մարմնի ժրաջան անդամուհիներուն, ապա յատուկ շնորհակալութիւն յայտնեց օրուան հիւրընկալ՝ Տիկին Սամուէլեանին եւ Տիկին Նաւասարկեանին, ինչպէս նաեւ բոլոր նուիրատուներուն ու ներկաներուն, որոնց  “յարատեւ նիւթական եւ բարոյական զօրակցութեան  կը պարտինք մեր յաջողութիւնները” նշեց Սրբազան Հայրը։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

Sempetmber 25, 2022 Sempetmber 18, 2022