Երկուշաբթի, 9 Հոկտեմբեր 2017-ին, Սան Ֆրանսիսքոյի մօտակայ Սան Մաթէօ քաղաքի «Peninsula Golf and Country Club»ին մէջ, տեղի ունեցաւ «Ճերըլտ եւ Մարք» կոլֆի տարեկան 16րդ մրցումը։ Այս մրցումը հաստատուած է ազգային բարերար Տիար Հէնք Խաչատուրեանի եւ իր մահացած տիկնոջ Ռիթայի կողմէ, ի յիշատակ անոնց զաւակներուն՝ Ճերըլտի եւ Մարքի:
Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան, ընդառաջելով բարերարին հրաւէրին, ներկայ եղաւ պաշտօնական ընթրիքին եւ փոխանցեց իր պատգամը: Ներկայ էին Սան Ֆրանսիսքոյի Ս. Գրիգոր Լուսաւորիչ եկեղեցւոյ հոգեւոր հովիւ՝ Հոգշ. Տ. Պարոյր. Վրդ. Շէրնէզեանն ու ծխական համայնքի ներկայացուցիչներ։
Առաջնորդ Սրբազանը առաջին հերթին փառք եւ գոհութիւն յայտնեց Աստուծոյ, որ անգամ մը եւս բարեգործական նպատակներով բոլորուած են յարգելու Տիար Հէնքի զաւակներուն՝ Ճերըլտի եւ Մարքի անմոռաց ու պայծառ յիշատակը, նշելով, որ «թէեւ Հէնքի սիրեցեալ տիկինը այս տարի առ յաւէտ կը բացակայի, սակայն անոր զուարթ հոգին եւ ներկայութիւնը կը զգանք մեր հոգիներուն ու սիրտերուն մէջ»։
Առաջնորդ Սրբազանը ողջունեց եւ բարձր գնահատեց Տիար Հէնք Խաչատուրեանի բարի կամեցողութիւնն ու առատաձեռն բարերարութիւնները, շեշտելով.- «անձնապէս եւ այստեղ գտնուող իւրաքանչիւր անհատ արդարօրէն կը վկայեն, որ դուք ո՛չ միայն հոգեկան գոհունակութեամբ լի նուիրող էք, այլ նաեւ խոնարհ ու գթասիրտ բարերար. տասնամեակներու վրայ տարածուած եւ տարի առ տարի ուռճացող այս բարեգործական ձեռնարկը ցայտուն եւ գեղեցիկ վկայութիւնն է ձեր բարեսրտութեան»։ Այնուհետեւ, ան աղօթք բարձրացուց առ Աստուած, որ օրհնէ բարերարն ու անոր վաստակը, երկնային հանգիստ շնորհէ անոր տիկնոջ եւ զաւակներուն, նաեւ օրհնեց ներկաները, որոնք հետեւողական կերպով նեցուկ կը կանգնին բարեսիրական այս նախաձեռնութեան: