Զօրակցինք Տագնապահար Քեսապի Հայութեան


Ինչպէս տեղեակ էք, Սուրիա տագնապալից օրեր կþապրի աւելի քան երեք տարի է վեր։ Անցեալ շաբաթավերջին, Թուրքիոյ սահմանէն եւ վստահաբար, թրքական բանակի օժանդակութեամբ, զինեալներ եւ ահաբեկիչներ, ներխուժեցին Սուրիոյ հիւսիսային շրջանը գտնուող սահմանակից, հայաշատ եւ պատմական Քեսապ աւանը, որ պատճառ դարձաւ մեր ազգակիցներուն ու տեղւոյն բնակչութեան ամբողջութեամբ տեղահանման։

Kessab2Իբրեւ գաղթական, մեր հայորդիները մեծ մասամբ ապաստան գտան Լաթաքիոյ Ս. Աստուածածին եկեղեցւոյ յարկին տակ, վայելելով խնամքն ու հոգատարութիւնը տեղւոյն ազգային եւ պետական պատկան կազմակերպութիւններու։

Այս դէպքերու լոյսին տակ, անցնող շաբթուան ընթացքին, գաղութիս հոգեւոր եւ քաղաքական ղեկավարները մնայուն հանդիպումներու մէջ եղան քեսապահայութեան զօրակցութեան նպատակով։

Այս ծիրէն ներս, Չորեքշաբթի, 26 Մարտի գիշերը, Թեմիս Բարեջան Առաջնորդ Բարձր. Տ. Մուշեղ Ս. Արք. Մարտիրոսեան եւ Հ.Յ.Դ. Արեւմտեան Ամերիկայի Կեդրոնական Կոմիտէի ներկայացուցիչ Դոկտ. Վիգէն Յովսէփեան մեկնեցան Washington D.C., ուր Հայ Դատի Յանձնախումբի ճիգերով ու հետապնդումներով, կարեւոր հանդիպումներ ունեցան պետական անձնաւորութեանց հետ, քեսապահայութեան Քեսապ վերադարձի եւ անոնց զօրակցելու պահանջքներ ներկայացնելով եւ մեր համայնքի հաւաքական բողոքը արտայայտելով։

Հինգշաբթի, 27 Մարտի առաւօտուն, Առաջնորդ Սրբազանն ու Դոկտ. Յովսէփեան հանդիպում ունեցան Հայաստանի Հանրապետութեան դեսպան՝ մեծարգոյ Թաթուլ Մարգարեանին հետ։ Հանդիպումին առանցքը հանդիսացաւ Հայաստանն ու հայութիւնը յուզող հարցեր, յատկապէս Քեսապի վերջին իրադարձութիւնները։

Յայտնենք, որ անցեալ Կիրակի, 23 Մարտին, Առաջնորդ Սրբազան Հօր տնօրինումով, Սուրիոյ խաղաղութեան, ապահովութեան եւ մեր եղբայրներուն ու քոյրերուն փորձանքներէ զերծ մնալու մաղթանքով, Թեմիս բոլոր եկեղեցիներուն մէջ, յընթացս Ս. Պատարագի “Տէր Ողորմեա”ի յատուկ աղօթք բարձրացուեցաւ Սուրիահայութեան եւ մանաւանդ Քեսապահայութեան համար, խնդրելով Աստուծմէ, որ Իր հովանին անպակաս ընէ Սուրիոյ եւ Սուրիահայութեան վրայէն:

Կոչ կ’ուղղենք մեր ժողովուրդին, որպէսզի անգամ մը եւս Սուրիահայ Օժանդակութեան Ֆոնտի (SARF)-ի միջոցաւ, նիւթապէս նեցուկ կանգնին եւ զօրակցին Սուրիոյ եւ Քեսապի մեր քոյրերուն ու եղբայրներուն, ամոքելու անոնց ցաւերն ու օժանդակելու կարելի միջոցներով։

Այս Կիրակի, 30 Մարտին, անգամ մը եւս մեր աղօթքները պիտի բարձրացնենք Սուրիոյ խաղաղութեան, Սուրիահայութեան ապահովութեան եւ յատկապէս Քեսապահայութեան տուն վերադարձին համար եւ Թեմիս բոլոր եկեղեցիներէն ներս յատուկ դրամահաւաք պիտի կատարուի քեսապահայութեան զօրակցութեան համար։

Print Friendly, PDF & Email

ՎԵՐՋԻՆ ԼՈՒՐԵՐ

Առաջնորդ Սրբազան Հօր Ս. Զատկուան Պատգամը

ԱՄԵՆԱԼՈ՜ՅՍ ՊԱՅԾԱՌ ԿԻՐԱԿԻՆ Կիրակիները, արեգակնային դրութեան ճշգրտութեամբ, կը յաջորդեն իրարու: Բայց Կիրակին այն, որուն կը սպասեն երկիր ու մարդկութիւն, Կիրակին,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

June 26, 2022 June 19, 2022