Աւագ Շաբթուան հոգեպարար արարողութիւնները մեր հաւատացեալները պատրաստեցին Ս. Յարութեան յաղթանակը դիմաւորելու եւ մեր հաւատքը վերանորոգելու։
Շաբաթ, 19 Ապրիլի երեկոյեան, մեր Թեմի եկեղեցիներուն մէջ Ճրագալոյցի Ս. Պատարագի աւարտին Քրիստոսի Ս. Յարութեան լոյսը անգամ մը եւս պայծառացուց մեր հաւատացեալ ժողովուրդի հոգիները եւ բոլոր հայ օճախները, Ս. Խորանէն բերուած Յարութեան լոյսը խորհրդանշող մոմերով։
Թեմիս Բարեջան Առաջնորդ Բարձր. Տ. Մուշեղ Ս. Արք. Մարտիրոսեան, Հոլիվուտի Ս. Կարապետ Մայր Եկեղեցւոյ մէջ Ս. Յարութեան Ճրագալոյցի արարողութեան նախագահեց եւ Ս. Պատարագը մատուցեց։
Ս. Գրային ընթերցումներէն ետք, Ս. Պատարագի սկիզբը, “Քրիստոս Յարեաւ Ի Մեռելոց” աւետիսը տարածուեցաւ ամենուրէք։
Իր պատգամին մէջ, Առաջնորդ Սրբազանը, Յարութեան յաղթական աւետիսով գօտեպնդուած, հրաւիրեց հաւատացեալները Յարութեան յաղթական շունչով ընթանալու եւ վերանորոգ յոյսով եւ հաւատքով դիմակալելու ամէն տեսակի դժուարութիւն եւ նեղութիւն։