Առաջնորդ Սրբազանը Անթիլիասի Մէջ կը Մասնակցի Ն.Ս.Օ.Տ.Տ. Արամ Ա. Կաթողիկոսին Քահանայական Ձեռնադրութեան 50-ամեակին եւ Ազգ. Կեդրոնական Վարչութեան Ժողովներուն

Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան այս շաբաթասկիզբին մեկնեցաւ Լիբանան, մասնակից ըլլալու համար Ն.Ս.Օ.Տ.Տ. Արամ Ա. Կաթողիկոսին քահանայական ձեռնադրութեան ու օծման 50-ամեակի տօնախմբութեան եւ Ս. Աթոռոյս Ազգ. Կեդրոնական Վարչութեան Կրօնական ու Քաղաքական ժողովներու նիստերուն։ Լիբանան մեկնեցաւ նաեւ Առաջնորդական փոխանորդ Գերշ. Տ. Թորգոմ Եպս. Տօնոյեան մասնակցելու հայրապետական Ս. Պատարագին եւ տօնախմբութեան։ Ազգ. Վարչութեան ատենապետ Տիար Կարօ Էշկիեան եւս պիտի մասնակցի տօնախմբութեան։

Հինգշաբթի, 18 Հոկտեմբեր 2018-ին, նախագահութեամբ Վեհափառ Հայրապետին, տեղի ունեցաւ Կրօնական Ժողովի լիակատար հանդիպումը։ Զեկոյցներ ներկայացուեցան եւ քննարկուեցան Կաթողիկոսութեան առաքելութեան ծիրին մաս կազմող քրիստոնէական դաստիարակութիւն, երիտասարդութիւն, միջ-եկեղեցական ու միջ-կրօնական յարաբերութիւն, Դպրեվանք, տեղեկատուական աշխատանքներ, հրատարակութիւններ, ՀԱՍԿ պաշտօնաթերթ, ընկերաբարոյագիտական հարցեր, հայրապետական ու հանրապետական մաղթանքներու վերամշակում, Հայոց Ցեղասպանութեան որբերու ու «Կիլիկիա» թանգարաններու առնչուած հարցեր, Վեհափառ Հայրապետին ձեռնադրութեան 50-ամեակ եւ թեմերէն եկած հարցեր ու առաջարկներ։ Տրուեցան համապատասխան որոշումներ։ Վեհափառ Հայրապետը շեշտեց մեր ժողովուրդի հոգեւոր կեանքին վերանորոգումը՝ մեր հոգեւոր ու բարոյական արժէքներու առաւել կենսաւորումով։ Ան նաեւ ընդգծեց եկեղեցի-ժողովուրդ յարաբերութեան կենսական կարեւորութիւնը՝ յիշեցնելով, որ եկեղեցին առաքելութիւն է ու ծառայութիւն։

Ուրբաթ, 19 Հոկտեմբերին, Վեհափառ Հայրապետին նախագահութեամբ, գումարուեցաւ Ազգային Կեդրոնական Վարչութեան Քաղաքական Ժողովի լիակատար նիստը։ Կը մասնակցէին Արեւմտեան մեր Թեմի անդամները՝ Տեարք Վահէ Եագուպեան եւ Կայծակ Զէյթլեան։ Քննարկումի նիւթ դարձան Կաթողիկոսարանի կալուածներու ու շինարարութեան առնչուած աշխատանքներ ու ծրագիրներ, շահարկման ու տնտեսական հարցեր, թեմերու վերակազմակերպումի գործընթացին հետ աղերս ունեցող աշխատանքներ, յարաբերութիւն ու գործակցութիւն Հայաստանի ու Արցախի հետ, Կաթողիկոսարանի հովանաւորութիւնը վայելող ընկերային ու մարդասիրական հաստատութիւններու հետ կապ ունեցող աշխատանքներ եւ ընդհանրապէս թեմերուն կողմէ ներկայացուած առաջարկներ ու մտահոգութիւններ։

Նոյն օրը, երեկոյեան, Մեծի Տանն Կիլիկիոյ Կաթողիկոսութեան Սահմանադրութեան համաձայն, տեղի ունեցաւ Խառն Ժողովի նիստ։ Քննարկուեցան Անթիլիաս-Էջմիածին եւ Անթիլիաս-Հայաստան-Արցախ գործակցութեան առնչուած հարցեր, թեմական կանոնագրութիւններ, Սիսի Կաթողիկոսարանի դատը, Արցախի մէջ «Նոր Կիլիկիա» գիւղի ծրագիրը եւ Սուրիոյ հայութեան վերականգնումի աշխատանքը։ Ժողովականներուն տրուեցան անհրաժեշտ բացատրութիւններ եւ յառաջիկայ աշխատանքներուն գծով տրուեցան որոշումներ։

Վեհափառ Հայրապետը, եզրակացնելով օրուան ժողովական աշխատանքները՝ շեշտեց մեր եկեղեցւոյ կեանքին մէջ ժողովական կառոյցներու ճամբով ժողովուրդի մասնակցութեան առաւել զարկ տալու հրամայականը, յատկապէս թեմական մակարդակի վրայ։ Նորին Սրբութիւնը գոհունակութիւն յայտնեց, որ մեր Ս. Աթոռը միշտ կը մնայ թափանցիկ իր գործունէութեան մէջ եւ համառատու՝ իր ժողովուրդին։ Ան նաեւ շեշտեց մեր եկեղեցւոյ նուիրապետական աթոռներուն հետ մեր գործակցութիւնը աւելի ամրապնդելու, ինչպէս նաեւ Հայաստանի ու Արցախի հզօրացման նպաստող աշխատանքները աւելի ծաւալելու անհրաժեշտութիւնը։

Կիրակի, 21 Հոկտեմբերին, պիտի նշուի Վեհափառ Հայրապետին քահանայական ձեռնադրութեան եւ օծման 50-ամեակը։ Վեհափառ Հայրապետը Ս. Պատարագ պիտի մատուցանէ Անթիլիասի Ս. Գրիգոր Լուսաւորիչ մայր տաճարին մէջ եւ իր հայրապետական պատգամը պիտի ուղղէ։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022