Առաջնորդ Սրբազան Ս. Նահատակաց Եկեղեցւոյ Մէջ Նախագահեց «Տասը Կուսանաց»ի Արարողութեան


Երեքշաբթի, 11 Ապրիլ 2017-ի երեկոյեան, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Էնսինոյի Ս. Նահատակաց Եկեղեցւոյ մէջ նախագահեց «Տասը կուսանաց»ի հոգեպարար արարողութեան, որուն ներկայ էին Ազգային Վարչութեան ատենապետ Տիար Վահէ Յովակիմեան եւ անդամներէն Դոկտ. Գալուստ Յակոբեան։ 10 կոյսերուն կերպարով իրենց բաժինը ունեցան Կիրակնօրեայ Վարժարանէն 10 աշակերտուհիներ։

Օրուան աստուածաշնչական ընթերցումները, աղօթքները, սաղմոսերգու-թիւններն ու շարականները հոգեպարար յատուկ մթնոլորտ ստեղծեցին ներկաներուն մօտ, զանոնք հաղորդակից դարձնելով Քրիստոսի երկրաւոր կեանքի վերջին օրերը խորհրդանշող՝ Աւագ Երեքշաբթիին։

Առաջնորդ Սրբազան Հայրը ուղղեց օրուան խորհուրդը արտայայտող պատգամ մը, բնաբան ունենալով շարականին բառերը. «Թող պայծառանան մեր հոգիներուն լապտերները, որպէսզի մեզ երկինքի արքայութեան կոչունքին հրաւիրեալներուն հետ բազմեցնես»։ Ան նախ հակիրճ կերպով պատմեց Տասը Կոյսերուն դրուագը մատնանշելով իմաստունին յատկանիշները։ Ի պատասխան այն հարցումին՝ թէ ինչպէ՞ս կարելի է իմաստուն ըլլալ, ներկայ աշակերտները պատասխանեցին՝ Ս. Գիրք կարդալով եւ աղօթելով։ Առաջնորդ Սրբազանը աւելցուց ըսելով, որ թէեւ Ս. Գիրք կարդալը, սերտելն ու աղօթելը կենսական են, սակայն իմաստուն ըլլալու եւ Աստուծոյ ներկայութեան արժանանալու համար պէտք է մեր սրտերը բանանք իրեն եւ իր հետ յարաբերութեան ու հաղորդութեան մէջ ըլլանք եւ խնդրենք Ս. Հոգւոյ պարգեւները ունենալ։

Ակնարկելով Ծաղկազարդի օրը Յիսուսի Երուսաղէմ մուտքի դէպքին, Առաջնորդ Սրբազանը նշեց թէ Տէրը դիմաւորողներուն մէջ երկու խումբ մարդիկ կային այդ օր։ Առաջին խումբին կը պատկանէին անոնք, որոնք Յիսուսը լսած էին, անոր կատարած հրաշքները տեսած էին, իրենց հոգիի լապտերները վառած էին եւ այնտեղ էին զինք փառաւորելու ու իրենց հոգիները պայծառացնելու. մինչ երկրորդ խումբին պատկա-նողները թէեւ լսած էին զինք եւ տեսած էին իր հրաշքները, սակայն իրենց սրտերը փակած էին եւ այնտեղ էին զինք հալածելու եւ դաւեր սարքելու։ Առաջնորդ Սրբազանը կոչ ուղղեց ներկաներուն ըլլալ առաջիններուն պէս եւ մեր սրտերը բանալ իրեն եւ միշտ պատրաստ ու արթուն ըլլալ, որովհետեւ չենք գիտեր Անոր երկրորդ գալստեան օրը։

Սրբազան Հայրը աւելցուց՝ «10 կոյսերն ալ բարի ու առաքինի էին, սակայն միայն հինգը արժանի եղան անոր ներկայութիւնը վայելելու, որովհետեւ իրենց հետ յաւելեալ ձէթ առած էին, որ կը խորհրդանշէ Աստուծոյ օրհնութիւնն ու շնորհքները»։ Առաջնորդ Սրբազանը յիշեցուց, թէ «ճիշդ է որ մենք մկրտուած ու դրոշմուած ենք եւ յաճախ բարի ենք ու բարեգործութիւն կ’ընենք, սակայն այդ բոլորը բաւարար չեն. առաւել եւս պէտք է մեր անձերը ընծայենք Աստուծոյ, ծառայենք Անոր, իբրեւ քրիստոնեաներ պարտաճանաչ ըլլանք մեր պարտականութեանց մէջ, բանանք մեր սրտերը եւ Զինք հրաւիրենք մեր էութենէն ներս, որպէսզի արժանի ըլլանք լեցուելու իրմէ բխող աստուածային սուրբ իմաստութեամբ հինգ իմաստուն կոյսերուն նման», եզրափակեց Սրբազան Հայրը։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022