Առաջնորդ Սրբազանը Մասնակցեցաւ Ս. Էջմիածինի Միւռոնօրհնէքին եւ Յարակից Արարողութիւններու


Ս. Աթոռոյս գահակալ Ն.Ս.Օ.Տ.Տ. Արամ Ա. Կաթողիկոսի յանձնարարութեամբ, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան 26էն 29 Սեպտեմբերին Ս. Էջմիածինի մէջ մասնակից եղաւ Սրբալոյս Միւռոնի օրհնութեան արարողութեան, ինչպէս նաեւ նոյն օրերուն նախատեսուած շարք մը արարողութեանց ու պաշտօնական հանդիպումներու: Առաջնորդ Սրբազանը եւ Բերիոյ Թեմի Առաջնորդ Բարձր. Տ. Շահան Արք. Սարգիսեան ներկայ էին իբրեւ ներկայացուցիչները Մեծի Տանն Կիլիկիոյ Կաթողիկոսութեան:

Շաբաթ, 26 Սեպտեմբերին, Սուրբ Էջմիածնի մէջ տեղի ունեցաւ միջ-եկեղեցական հանդիպում, ապա նաեւ միջ-եկեղեցական արարողութիւն:

Կիրակի, 27 Սեպտեմբերին, Հայաստանեայց Առաքելական Ս. Եկեղեցին նշեց Վարագայ Սուրբ Խաչի տօնը: Մայր Տաճարին մէջ առաւօտուն մատուցուեցաւ Սուրբ եւ Անմահ Պատարագ, իսկ երեկոյեան, Մայր Աթոռի շրջափակին մէջ գտնուող Ս. Տրդատի Բաց Խորանին վրայ կատարուեցաւ Միւռոնօրհնէքը:

Սրբալոյս Միւռոնի օրհնութեան արարողութեան պահուն, Թեմիս բարեխնամ Առաջնորդը առընթերակայ էր Ն.Ս.Օ.Տ.Տ. Գարեգին Բ. Ամենայն Հայոց Կաթողիկոսին, իբրեւ ներկայացուցիչը Մեծի Տանն Կիլիկիոյ Ս. Աթոռոյս գահակալ Վեհափառ Հայրապետին: Ամենայն Հայոց Կաթողիկոսը, բալասանին եւ հին Միւռոնին հետ, Ս. Միւռոնի կաթսային մէջ հեղեց նաեւ Անթիլիասէն բերուած նոր Ս. Միւռոնը, զոր Վեհափառ Հայրապետին մատուցեց Բարձր. Տ. Շահան Արք. Սարգիսեան:

Երկուշաբթի, 28 Սեպտեմբերին, Ամենայն Հայոց Հայրապետը եւ միւռոնօրհնէքի առիթով Հայաստան ժամանած հոգեւոր պետերն ու ներկայացուցիչները այցելեցին Ծիծեռնակաբերդի Յուշահամալիրը, ուր նահատակաց յուշարձանին առջեւ, Միւռոնօրհնէքին մասնակիցներուն անունով ծաղկեպսակ զետեղուեցաւ, ապա, կատարուեցաւ Ցեղասպանութեան սուրբ նահատակներուն բարեխօսական կարգ: Արարողութենէն ետք, հոգեւորականներու թափօրը այցելեց Ցեղասպանութեան թանգարանը:

Նոյն օրը, Սուրբ Էջմիածինի մէջ տեղի ունեցաւ նորակառոյց «Գարեգին Ա. կրթական կեդրոն»ի բացումը: Հանդիսութենէն առաջ, երջանկայիշատակ Գարեգին Ա. Ամենայն Հայոց Կաթողիկոսի շիրիմի առջեւ կատարուեցաւ հոգեհանգստեան պաշտօն: Աւելի ուշ, Մայր Տաճարի շրջափակին մէջ տեղի ունեցաւ Ցեղասպանութեան նահատակներու յիշատակին կանգնած նոր խաչքարերու օծումը: Ապա, Գէորգեան հոգեւոր ճեմարանի մէջ տեղի ունեցաւ նաեւ կերպարուեստի ցուցահանդէս-վաճառք, որուն հասոյթը պիտի տրամադրուի սուրիահայութեան:

Նշենք նաեւ, որ յանուն Վեհափառ Հայրապետին, Հինգշաբթի, 24 Սեպտեմբերին, երկու Առաջնորդ Առաջնորդ Սրբազանները ներկայ գտնուեցան Գիւմրիի Սրբոց Նահատակաց Կաթողիկէ Եկեղեցւոյ օծման արարողութեան, եւ Նորին Սրբութեան կողմէ շնորհաւորական իրենց խօսքն ու բարեմաղթութիւնները փոխանցեցին հայ Կաթողիկէ համայնքին։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022