Առաջնորդ Սրբազանը Այցելեց Ազգ. Մեսրոպեան Վարժարան


Ուսումնական 2016-2017 տարեշրջանի վերամուտին առիթով կրթական մեր հաստատութիւններուն իր այցելութեանց ծիրին մէջ, Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Հինգշաբթի, 15 Սեպտեմբեր 2016ի առաւօտուն այցելեց Ազգային Մեսրոպեան վարժարան եւ մտերմիկ պահ մը բոլորեց տնօրէնին, դաստիարակներուն եւ աշակերտներուն հետ, անոնց ուղղելով իր հայրական պատգամը: Առաջնորդ Սրբազանին կ’ընկերանային Ս. Խաչ Մայր Տաճարի հոգեւոր տեսուչ Գերպ. Տ. Միւռոն Ծ. Վրդ. Ազնիկեան, հոգեւոր հովիւ Արժ. Տ. Աշոտ Քհնյ. Գամպուրեան եւ հոգաբարձութեան անդամներէն Տիար Աշոտ Մուրատեան:

Վարժարանի մուտքին, Առաջնորդ Սրբազանը եւ ընկերակիցները դիմաւորուեցան տնօրէնին՝ Տիար Դաւիթ Ղուկասեանի եւ աշակերտական խորհուրդին կողմէ: Տեղի ունեցաւ աղ ու հացի օրհնութիւն: Ապա, բոլորը ուղղուեցան վարժարանին սրահը, ուր տեղի ունեցաւ պաշտօնական հանդիսութիւնը:

Տիար Դ. Ղուկասեան ողջունեց Առաջնորդ Սրբազանին ներկայութիւնը, գոհունակութիւն յայտնեց, որ Կիրակի օր, Ս. Խաչի Վերացման տօնին, վարժարանէն երկու աշակերտներ՝ Ալեքս Մանուկեան եւ Հրակ Հարպոյեան կը գտնուէին Առաջնորդ Սրբազանին ձեռամբ դպրութեան չորս աստիճաններ ստացող ձեռնադրեալներուն շարքին: Ան նաեւ անդրադարձաւ վարժարանի հայակերտումի առաքելութեան ու մեր ազգային արժէքներուն հաւատարիմ ըլլալու աշակերտներուն յանձնառութեան:

Երկու աշակերտներ ապրումով արտասանեցին «Եկեղեցին Հայկական» բանաստեղծութիւնը: Այնուհետեւ, տնօրէնը բեմ հրաւիրեց Առաջնորդ Սրբազանը, որպէսզի ուղղէ իր պատգամը:

Առաջնորդ Սրբազանը իր կողքին հրաւիրեց երկու ձեռնադրեալ դպիրները եւ առիթ տուաւ, որ անոնք արտայայտուին ձեռնադրութեան արարողութեան ու իրենց ապրումներուն մասին: Ապա, Առաջնորդ Սրբազանը կանգ առաւ սրահի պատին ամրացուած այն նշանախօսքին վրայ, որ կ’ըսէ.- «Լոյսի աղբիւր, յոյսի օրրան, Մեսրոպեան Սուրբ Վարժարան»: Ան անդրադարձաւ Ս. Մեսրոպ Մաշտոց վարդապետին սրբազան աւանդին եւ շեշտեց, որ հայ աշակերտն ու հայ ժողովուրդի զաւակները պարտին հաւատարիմ մնալ այդ սրբազան ժառանգութեան, հայերէնն ու հայ գիրը պահպանեն իրենց կեանքին մէջ: Առաջնորդ Սրբազանը նաեւ խօսեցաւ Ս. Խաչի տօնին մասին եւ յիշեցուց, որ խաչը հայ քրիստոնեային համար կենսական խորհրդանիշ է, լոյսի աղբիւր է, յոյս եւ ապաւէն, հետեւաբար, պարտինք անոր նայիլ մանաւանդ մեր նեղութիւններուն ընթացքին:

Առաջնորդ Սրբազանը յայտնեց, թէ Սեպտեմբերի վերջերուն եւ Հոկտեմբերի առաջին օրերուն, մեր Թեմը պատիւը պիտի ունենայ վայելելու Ս. Աթոռոյս գահակալ Ն.Ս.Օ.Տ.Տ. Արամ Ա. Կաթողիկոսին շնորհաբեր այցելութիւնը, տօնակատարելու համար գահակալութեան 20րդ տարեդարձը։ Պաշտօնական հանդիսութեան բանախօսներէն մէկն է այս վարժարանին տնօրէնը՝ Տիար Դաւիթ Ղուկասեան, հետեւաբար, յորդորեց աշակերտներն ու դաստիարակները, որ ներկայ ըլլան այդ հանդիսութեան, ինչպէս 30 Սեպտեմբերի երեկոյեան, Կլենտէյլի “Civic” հանդիսասրահին մէջ նախատեսուած՝ Վեհափառ Հայրապետին հետ պատանիներու եւ երիտասարդներու հանդիպումին: Խօսքի աւարտին, Առաջնորդ Սրբազանը «Երկիր 2 Yergir» ալպոմէն օրինակ մը նուիրեց վարժարանին:

Հանդիսութիւնը վերջ գտաւ Առաջնորդ Սրբազանին Պահպանիչով եւ Տէրունական Աղօթքով: Այնուհետեւ, Առաջնորդ Սրբազանը այցելեց վարժարանին մանկապարտէզն ու նախակրթարանի դասարանները, ուր արժանացաւ ջերմ ընդունելութեան, մտերմիկ զրոյցներ ունեցաւ մանուկներուն եւ աշակերտներու հետ:

Կէսօրին, տնօրէնութիւնը ճաշով հիւրասիրեց Առաջնորդ Սրբազանն ու յարգելի հիւրերը:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 23, 2022 October 16, 2022