Առաջնորդ Սրբազանը Ընդունեց Հայկական Ոսկրածուծի Հիմնարկի Վարչութեան Ներկայացուցիչներուն Այցելութիւնը


Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Երեքշաբթի, 14 Յունուարի երեկոյեան, Ազգային Առաջնորդարանին մէջ ընդունեց այցելութիւնը Հայկական Ոսկրածուծի Հիմնարկի վարչութեան ներկայացուցիչներուն, գլխաւորութեամբ Հիմնարկի նախագահ Տոքթ. Ֆրիտա Ճորտընի։ Առաջնորդ Սրբազանին կողքին, հանդիպումին ներկայ եղան Ազգ. Վարչութեան ատենապետուհի Տիկին Ռիմա Պօղոսեան եւ անդամ Տոքթ. Տիգրան Պապիկեան։

Առաջնորդ Սրբազանը ողջունեց ներկայացուցիչներուն այս այցելութիւնը, բարձր գնահատեց այս կազմակերպութեան մարդասիրական ու հայրենասիրական ծառայութիւնները, որոնք կը հետեւին Բարի Սամարացիին ծառայութեան օրինակին։ Առաջնորդ Սրբազանը նկատել տուաւ, որ այս Հիմնարկին ծառայողները, հաւատարիմ մնալով Աստուածաշունչի պատգամին՝ ծառայութիւնը գործով ու կեանքով կþապացուցեն, եւ ոչ թէ միայն խօսքով ու գիրով։  Տիկին Ռ. Պօղոսեան եւս գնահատանքով արտայայտուեցաւ Հիմնարկի մատուցած ծառայութեանց եւ անդամներուն նուիրումին մասին։

IMG_0388Աւանդական հանդիպում մըն էր. արդարեւ, Հ. Ո. Հիմնարկի ներկայացուցիչները ամէն տարեմուտի կþայցելեն Առաջնորդ Սրբազանին, Ամանորի եւ Ս. Ծննդեան տօներու առիթով շնորհաւորանք ու բարեմաղթութիւն փոխանցելու եւ տեղեկութիւններ տալու իրենց աշխատանքներուն ու յառաջիկայ ծրագիրներուն մասին, որոնք կþընդգրկեն Հայաստանն ու հայաշխարհը։ Տոքթ. Ֆրիտա Ճորտըն եւ այլ ներկաներ յայտնեցին, թէ անցեալ տարեշրջանին ունեցած են յաջող եւ արդիւնաբեր գործունէութիւն, ոսկրածուծի պատուաստումի համար նուիրաբերողներու ցանկը հասցուցած են 25,000ի, ու պիտի աշխատին բարձրացնել 30,000ի, նշելու համար Հիմնարկութեան 15րդ տարեդարձը, որ այս տարի է։ Հիմնարկութիւնը երախտապարտութեան զգացումով կը գործակցի “Մեմորիըլ”, “Էտվենթիսթ” եւ “Չիլտրընզ” Հիւանդանոցներուն հետ. վերջին շրջանին, ներկայացուցիչներ այցելած են Պուլկարիա, Կիպրոս, կը յուսան կապեր ստեղծել նաեւ Ռուսիոյ հայութեան հետ։ Յաջորդ ժողովը նախատեսուած է Օսլոյի մէջ։

Իբրեւ յառաջիկայ գլխաւոր ծրագիրներ, Հիմնարկը կը փափաքի, որ ըստ մեր Թեմին հետ զարգացած գործակցութեան, Ապրիլ 6ին, մեր բոլոր եկեղեցիներուն մէջ յատուկ աղօթք բարձրացուի Հիմնարկին հոգատարութիւնը վայելող հիւանդներուն համար, 3 Մայիսին պիտի ունենայ իր տարեկան քայլարշաւը, իսկ 10 Օգոստոսին՝ տարեկան ճաշկերոյթը։ Հիմնարկին մասնագէտ ներկայացուցիչները այցելութիւններ կու տան նաեւ մեր վարժարանները եւ պատրաստակամ են աւելի եւս ընդարձակելու այս աշխատանքը, մեր պատանիներուն ծանօթացնելու համար մարդասիրական այս աշխատանքին նպատակն ու մասնակցութեան կարելիութիւնները։

Պատուիրակութեան անդամներէն Տիար Հրաչ Լուքասեան, որ այլ ընկերակիցներու հետ Արարատի գագաթը բարձրացած էր վերջերս, Առաջնորդ Սրբազանին իբրեւ յուշանուէր բերած էր լուսանկար մը եւ Արարատէն վերցուած ժայռաբեկոր մը։ Առաջնորդ Սրբազանը, իր կարգին, հիւր ներկայացուցիչներուն նուիրեց Ազգ. Առաջնորդարանի նորագոյն հրատարակութենէն՝ աշակերտներու կողմէ մայրերուն ձօնուած աղօթքներու եւ մաղթանքներու գրքոյկէն օրինակներ, ինչպէս նաեւ Հայ Մօր նուիրուած աղօթք մը եւ Առաջնորդարանի օրացոյցը։

Հ. Ո. Հիմնարկի ներկայացուցիչները շնորհակալութիւն յայտնեցին Առաջնորդ Սրբազանին եւ Ազգային Առաջնորդարանին՝ զօրակցութեան ու քաջալերանքին համար։

Print Friendly, PDF & Email

ՎԵՐՋԻՆ ԼՈՒՐԵՐ

2022 – Սփիւռքի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային իշխանութեանց, եւ մեր ժողովուրդի զաւակներուն 2022 տարուան սեմին, Մեծի Տանն Կիլիկիոյ... [...]

2022 – Սփիւռքի Տարի – Մենք Կը Նայինք Ձեզի…

Երկնային օրհնութիւններով լեցուն Ս. Ծննդեան հրաշափառ տօնին յաջորդեցին հոգեւոր մտամփոփման քանի մը օրեր, որոնց ընթացքին կարելիութիւնը ունեցայ մտածումներուս կարկինը լայնցնելու,... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

January 23, 2022 January 16, 2022