Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեան Ուրբաթ, 11 Յունուրար 2019-ի յետմիջօրէին, Ազգային Առաջնորդարանի իր գրասենեակին մէջ ընդունեց այցելութիւնը Լիբանանի Թեմի Ազգային Վարչութեան ատենապետ Տիար Րաֆֆի Սիսլեանի։ Հանդիպումին ներկայ եղան Ազգ. Կեդրոնական վարչութեան անդամ Տիար Կայծակ Զէյթլեան եւ Ազգային Վարչութեան ատենապետ Տիար Կարօ Էշկիեան։
Այցելութիւնը առիթ եղաւ միջ-թեմական գործակցութեան շուրջ խորհրդակցութեան։ Առաջնորդ Սրբազանն ու Տիար Ատենապետը ընդհանուր գիծերու մէջ տեղեկութիւններ հաղորդեցին Ազգային Առաջնորդարանի հովանիին տակ գործող եկեղեցիներու, ազգային վարժարաններու եւ յարակից միաւորներու աշխատանքի դաշտերուն, ինչպէս նաեւ գաղութի հայկական միաւորներուն հետ գործակցական յարաբերութեանց մասին, միաժամանակ որոշ ծանօթութիւն տալով յառաջիկայ ծրագիրներու մասին։ Յարգելի հիւրը, իր կարգին, խօսեցաւ Լիբանանի Թեմի դիմագրաւած հարցերուն ու մարտահրաւէրներուն մասին. նկատուեցաւ, որ սփիւռքեան պայմաններուն մէջ, կան հասարակաց հարցեր ու մարտահրաւէրներ, որոնք կը կարօտին համագործակցութեան ու համատեղ աշխատանքի։