Թելեթոնի Նախօրեակին Նախագահ Բակօ Սահակեան Հիւրընկալուեցաւ Առաջնորդ Սրբազանին եւ Թեմիս Ժողովականութեան Կողմէ


“Հայաստան” Համահայկական Հիմնադրամի տարեկան հանգանակային արշաւին՝ Թելեթոնին առիթով, Արցախի նախագահ Բակօ Սահակեան, Լոս Անճելըս իր այցելութեան առիթով, ու յարգելով տարիներու բարի աւանդութիւնը, Չորեքշաբթի, 26 Նոյեմբեր 2014ի առաւօտուն այցելութիւն մը տուաւ Ազգային Առաջնորդարան եւ հիւրընկալուեցաւ Թեմիս բարեխնամ Առաջնորդ Բարձր. Տ. Մուշեղ Արք. Մարտիրոսեանի ու ժողովականութեան ներկայացուցիչներու կողմէ:

“Ս. Տրդատ եւ Ս. Աշխէն” մատրան մէջ աղօթքի պահէ մը ետք, պաշտօնական ընդունելութիւնը տեղի ունեցաւ “Սիւլահեան” դահլիճին մէջ: Նախագահին կ’ընկերանային Արցախի փոխ վարչապետ Զօր. Արթիւր Աղաբէկեան, Առողջապահութեան նախարար Յարութիւն Գուշկեան, Միացեալ Նահանգներու մօտ Հայաստանի արտակարգ եւ լիազօր դեսպան Տիգրան Սարգսեան, Միացեալ Նահանգներու եւ Քանատայի մօտ Արցախի մնայուն ներկայացուցիչ Ռոպէրթ Աւետիսեան, Միացեալ Նահանգներու մօտ Հայաստանի դեսպանատան ռազմական կցորդ Գնդ. Մեսրոպ Նազարեան, Լոս Անճելըսի մէջ Հայաստանի փոխ հիւպատոս Արտակ Գալստեան եւ Արցախի նախագահի աշխատակազմի ղեկավարի տեղակալ եւ մամլոյ պատասխանատու Դաւիթ Պապայեան: Ներկայ էր նաեւ “Հայաստան” Համահայկական Հիմնադրամի Արեւմտեան շրջանի ատենեապետ Տիար Անդրանիկ Պաղտասարեան: Առաջնորդ Սրբազանին կողքին էին Կրօնական Ժողովի, Ազգային Վարչութեան եւ Ազգ. Առաջնորդարանի Տիկնանց Օժանդակ Մարմինի անդամներ:

Առաջնորդ Սրբազանը ջերմ խօսքերով ողջունեց նախագահն ու ընկերակիցները, նշելով, որ այս այցելութիւնները, Գոհաբանութեան տօնի օրերուն, դարձած են բարի աւանդութիւն եւ Ազգ. Առաջնորդարանիս մեծ ընտանիքին առիթ կ’ընծայեն ուղղակի հաղորդակից ըլլալու Արցախի մեր ժողովուրդին հետ: Ան վեր առաւ նախագահին այս տարուան առաքելութեան յատուկ բնոյթը, որ կեդրոնացած է գործին վրայ, եւ անգամ մը եւս հաստատեց, որ հայութիւնը կը կանգնի քաջարի Արցախին կողքին, պատրաստ է հետեւողականօրէն զօրակցելու անոր պաշտպանութեան ու բարգաւաճման աշխատանքներուն, կը գօտեպնդուի Արցախի ժողովուրդին պայքարով ու պատրաստ է փոխադարձաբար գօտեպնդելու զայն: Իսկ անդրադառնալով Արցախի սահմանային գօտիին մէջ վերջերս զոհուած զինուորներուն, ան յիշեցուց, որ նոյն օրերուն, Ս. Էջմիածինի մէջ տեղի ունեցող Հայց. Եկեղեցւոյ Եպիսկոպոսաց Ժողովը յատուկ աղօթք բարձրացուց անոնց հոգիներուն համար, եւ նոյն Կիրակին Թեմիս եկեղեցիներուն մէջ հոգահանգիստ կատարուեցաւ:

Ազգային Վարչութեան ու ժողովականութեան անունով ողջոյնի խօսք արտասանեց Ազգ. Վարչութեան փոխ ատենապետ Դոկտ. Տիգրան Պապիկեան: Ան հպարտութիւն արտայայտեց նախագահին եւ ընկերակիցներուն ներկայութեան համար, անդրադարձաւ Արցախի դիմագրաւած արտաքին ու ներքին մարտահրաւէրներուն եւ համոզում յայտնեց, որ համայն հայութիւնը միասնական ճիգերով մասնակից պիտի ըլլայ Արցախի դիմագրաւած հարցերուն լուծման, բնակչութեան աճի միջոցներուն գոյացման:

Նախագահ Բակօ Սահակեան շնորհակալութիւն յայտնեց այն ջերմ ու զօրակցական վերաբերմունքին համար, զոր ինք ու Արցախը կը գտնեն Ազգային Առաջնորդարանի յարկին տակ: Ան անդրադարձաւ Արցախի մէջ արձանագրուող բարեփոխութիւններուն, ինչպէս նաեւ ազերիական ծանօթ ոտնձգութիւններուն, շեշտելով, որ Արցախի ժողովուրդը իր պայքարի առաջին օրերէն սկսեալ զոհաբերած է, սակայն նաեւ հասած է պահը, որ ապահովութիւնն ու բարգաւաճումը պէտք է պահպանել առանց զոհաբերումի: Ան երախտագիտական արտայայտութիւն ունեցաւ Հայ Եկեղեցւոյ զօրակցական կեցուածքին համար եւ մասնաւորաբար դրուատիքով խօսեցաւ արձանագրուած նուաճումներուն մէջ Մուշեղ Սրբազանի դերակատարութեան եւ խոնարհ նկարագիրին մասին:

Նախագահը կարեւորութեամբ անդրադարձաւ նաեւ Արցախի հիւսիսային գօտիի տնտեսական ու ռազմավարական ամրապնդումի առաջադրանքին, որուն մեծապէս պիտի նպաստէ Վարդենիս-Մարտակերտ ճանապարհին ամբողջացումը: Վերջապէս, ան դրուատիքով խօսեցաւ դեսպան Տիգրան Սարգսեանի գործունէութեան մասին, յիշեցնելով, որ Հայաստանի ու Արցախի միջեւ գործակցական բազմաթիւ ծրագիրներ կազմուած ու գործադրութեան դրուած են անոր վարչապետութեան օրերէն:

Խօսք առաւ նաեւ դեսպան Սարգսեան, որ գոհունակութիւն արտայայտեց Ազգ. Առաջնորդարան իր առաջին այցելութեան առիթով, եւ պատրաստակամութիւն յայտնեց կարելին ընել Արցախի ամրակայման նպատակով, որովհետեւ, ըսաւ ան, Արցախը մեր ազգի ողնաշարն է, անոր հզօրացումը կը նշանակէ ազգի հզօրացումը: Ան հաստատեց, որ նախագահ Բակօ Սահակեան կը վայելէ վստահութիւն եւ իր գործունէութեամբ կ’ամրապնդէ մեր կեցուածքը:

Պաշտօնական խօսքերու փոխանակումէն ետք, տեղի ունեցաւ մտերմիկ զրոյց. ներկաներուն հարցումներուն պատասխանելով, նախագահ Բ. Սահակեան եւ Զօր. Արթիւր Աղաբէկեան լուսաբանութիւններ տուին Արցախի տարբեր շրջաններու եւ աշխատանքի մարզերուն մէջ մշակուած ծրագիրներուն մասին, անդրադարձան Արցախ հաստատուած սուրիահայ ընտանիքներու ներդրումին եւ, վերջապէս, բանակայիններուն ու ընդհանրապէս Արցախի ժողովուրդին բնակարանային կարիքներուն:

Աւելի քան մէկ ժամ տեւած հանդիպումը վերջ գտաւ յուշանուէրներու փոխանակումով եւ խմբային լուսանկարով մը:

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

Sempetmber 25, 2022 Sempetmber 18, 2022