Ընդունելութիւն՝ Ի Պատիւ Առաջնորդ Սրբազան Հօր – Ֆերմանեան Զոյգը Պարգեւատրուեցաւ «Կիլիկեան Ասպետ» Շքանշանով – Հնչեց Լիբանանահայութեան Զօրավիգ Կանգնելու Կոչ

Ուրբաթ, 6 Օգոստոս 2021-ի երեկոյեան, ի պատիւ Արեւմտեան Թեմի բարեջան Առաջնորդ՝ Գերշ. Տ. Թորգոմ Ս. Եպս. Տօնոյեանի, Տէր եւ Տիկին Պետիկ եւ Մարօ Ֆերմանեաններու կազմակերպութեամբ եւ իրենց տան մէջ տեղի ունեցաւ յատուկ ընդունելութիւն, ներկայութեամբ հիւրընկալ ամոլի կողմէ հրաւիրուած խումբ մը բարեկամներու:

Արժ. Տ. Գարեգին Քհնյ. Պետուրեան որպէս հանդիսավար արտասանեց բարեմաղթական խօսքեր, ապա Տիկին Մարօ Ֆերմանեան իր եւ իր ընտանիքին անունով բարի գալուստ մաղթեց աւելի քան հարիւր ներկաներու եւ իր սրտագին մաղթանքները փոխանցեց Սրբազան Հօր:

Հայաստանի Հանրապետութեան գլխաւոր հիւպատոս, դեսպան Արմէն Բայբուրդեան այս առիթով արտասանեց իր սրտին խօսքը՝ ընդգծելով Սրբազան Հօր առաջնորդական առաքելութեան կարեւորութիւնը, դրուատեց անոր նուիրական ծառայութիւնը եւ իր սրտագին շնորհաւորանքները մատոյց երիտասարդ, նորընտիր Սրբազան Հօր:

Արժ. Տ. Վիգէն Աւ. Քհնյ. Վասիլեան իր խօսքին մէջ վեր առաւ եզակի այս առիթը, որ Առաջնորդ Սրբազան Հօր ի պատիւ ընդունելութիւն ըլլալու կողքին է՛ նաեւ օրհնեալ պահ՝ քով-քովի գալու եւ միասնաբար վայելելու Թորգոմ Եպս. Տօնոյեանի հովուական ներկայութիւնը ոչ միայն այս երեկոյին, այլեւ ընդհանրապէս մեր կեանքին մէջ: Ստեղծուած այս անզուգական պատեհութեան համար Աւ. Քահանայ հայրը նաեւ շնորհաւորեց հիւրընկալ Ֆերմանեան ամոլը իր ազնիւ մտածումին ու բարձր կազմակերպուածութեան համար, ապա հրաւիրեց Առաջնորդ Սրբազան Հայրը, որ ներկաներուն ուղղէ իր սրտին խօսքը:

Առաջնորդ Սրբազան Հայրը առաջին հերթին շնորհակալութիւն յայտնեց Ֆերմանեան ամոլին՝ բացառիկ ընդունելութեան առիթով, ներկաներուն, որոնք ընդառաջելով Պետիկ եւ Մարօ Ֆերմանեաններու հրաւէրին, ներկայ եղան երեկոյին, առ ի խնդակցութիւն Արեւմտեան Թեմի իր Առաջնորդ ընտրութեան, ապա արժանաւորինս գնահատեց հրաւիրեալներուն ցուցաբերած մնայուն զօրակցութիւնը Արեւմտեան Թեմին եւ սրտագին կոչ ուղղեց բոլորին, որ իրենց խնամքն ու զօրակցութիւնը անվերապահօրէն յայտնեն Լիբանանի մէջ ներկայիս տնտեսական եւ ընկերային գետնի վրայ անմարդկային ծանր պայմաններ դիմագրաւող լիբանանահայութեան, որ ազգի վերջին դարու կեանքին մէջ իր լուսափառ ներկայութեամբ միշտ եղած է յաղթանակներու կերտիչ, իսկ այսօր, դժբախտաբար, կը տուայտի երկիրը հարուածող տեսակ-տեսակ տագնապներու անողոք հարուածներուն տակ: Իր խօսքի աւարտին Թորգոմ Եպս. Տօնոյեան, յանուն Ն.Ս.Օ.Տ.Տ. Արամ Ա. Կաթողիկոսին, «Կիլիկեան Ասպետ»ի շքանշանով պարգեւատրեց Տէր եւ Տիկին Պետիկ եւ Մարօ Ֆերմանեանը՝ Արեւմտեան Թեմի եւ ընդհանրապէս հայութեան կեանքին մէջ կատարած իր յոյժ գնահատելի բարեգործութեանց եւ ցուցաբերած ծառայական ոգիին համար:

Հուսկ, ազգային բարերար Պետիկ Ֆերմանեան արտասանեց իր սրտին խօսքը՝ իր եւ իր ընտանիքին անունով խորին շնորհակալութիւններ յայտնելով Կիլիկիոյ Կաթողիկոսութեան գահակալ Արամ Ա. Վեհափառին, իրեն տրուած շքանշանին համար, Առաջնորդ Սրբազան Հօր, իր հրաւէրին ընդառաջելուն համար եւ բոլոր հիւրերուն, իրենց ոգեշնչող ու գօտեպնդիչ ներկայութեան համար:

 

 

Print Friendly, PDF & Email

ՎԵՐՋԻՆ ԼՈՒՐԵՐ

Ուսումնական 2021-2022 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Հովուական գուրգուրանքով եւ հայրական ջերմ սիրով Արեւմտեան Թեմի Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը,... [...]

Կոչ Լիբանանահայութեան Զօրակցութեան

Ն.Ս.Օ.Տ.Տ. Արամ Ա. Վեհափառ Կաթողիկոսի՝ լիբանանահայութեան զօրավիգ կանգնելու համար մեզի ուղղուած կոչին ընդառաջ, այսու պաշտօնապէս բացուած կը յայտարարենք մեր նախագահութեամբ... [...]

2021 – Արցախի Տարի

Մեծի Տանն Կիլիկիոյ Կաթողիկոսութեան Թեմակալ Առաջնորդներուն, հոգեւոր դասուն, Ազգային Իշխանութեանց, եւ մեր ժողովուրդի զաւակներուն 2021 տարուան սեմին, Մեծի Տանն Կիլիկիոյ... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

October 10, 2021 October 3, 2021