Մեծարանքի Երեկոյ Հայրենի Վաստակաշատ Երգահան Տիգրան Մանսուրեանի


Հինգշաբթի, 19 Մարտ 2015ի երեկոյեան, հայրենի տաղանդաւոր երգահան՝ Տիար Տիգրան Մանսուրեանի ի պատիւ մեծարանքի ձեռնարկ մը տեղի ունեցաւ Ազգ. Առաջնորդարանի “Տիգրան եւ Զարուհի Տէր Ղազարեան” սրահին մէջ, հովանաւորութեամբ եւ ներկայութեամբ Թեմիս բարեխնամ Առաջնորդ Բարձր. Տ. Մուշեղ Ս. Արք. Մարտիրոսեանի։ Ձեռնարկը կազմակերպուած էր Ազգ. Առաջնորդարանի Մշակութային Դաստիարակչական Յանձնախումբի կողմէ։

Յայտագիրը սկիզբ առաւ մեծարեալ երաժշտագէտի “Հնչիւններու Տարածութիւն” վաւերագրական ամփոփ ժապաւէնի ցուցադրութեամբ, որմէ ետք օրուան հանդիսավարը՝ Ազգ. Վարչութեան փոխ-ատենապետ՝ Դոկտ. Տիգրան Պապիկեան, իր սրտի գոհունակութիւնը յայտնեց, որ առիթը ընձեռուած է ներկաներուն, Տիար Տիգրան Մանսուրեանի հետ ըլլալու եւ ըստ արժանւոյն պատուելու զինք իր ազգանուէր ճանապարհորդութեան ընթացքին։

Ողջոյնի ջերմ խօսքերէն ետք, հանդիսավարը բեմ հրաւիրեց արուեստագէտուհի՝ Տիկ. Թագուհի Արզումանեանը, որ խօսեցաւ Տիար Տիգրան Մանսուրեանի երաժշտական տաղանդին ու ձիրքերուն մասին, եւ ներկայացուց Տիգրան Մանսուրեան երգահանն ու երաժշտագէտը, Հայրենիքի անգին որպէս մէկ գանձ, երգի անսպառ գանձերու աղբիւր, երաժշտութեամբ Հայրենիքն ու Հայը հարստացնող ու անոնց գոհունակութեամբ հարստացող Հայը։

Յայտագրի յաջորդ հանգրուանին, մեծարեալի ստեղծագործութիւններէն ճաշակ մը վայելելու նպատակով, գեղարուեստական բաժին մը իբրեւ ծաղկեբունջ պատրաստուած էր Տիգրան Մանսուրեանի արուեստի ճանապարհը պատկերող ժապաւէններէ քաղուած հատուածներով, որոնցմէ իւրաքանչիւրին մասին Տիկ. Թագուհի Արզումանեան հակիրճ սակայն օգտաշատ պատմականներ եւ բացատրութիւններ տուաւ նախքան ցուցադրութիւնը։

Գեղարուեստական բաժնի աւարտին, օրուան հանդիսավարը բեմ հրաւիրեց արուեստագէտ, խմբավար ու “Լարք” երաժշտանոցի հիմնադիր-տնօրէն՝ Փրոֆ. Վաչէ Պարսումեանը, որ տարիներու մտերմութեան եւ առաջին լսած երաժշտական կտորի առթած հիացմունքին մասին իր յուշերը բաժնեկցելէ ետք ներկայացուց Տիգրան Մանսուրեանը որպէս բանաստեղծ։ Ոչ թէ միայն բանաստեղծական հոգիի շնորհքը, այլ Եղիշէ Չարենցի ամէնէն դժուար բանաստեղծութիւնները երաժշտութեամբ զարդարելու գերազանց իր կարողութիւնը դրուատեց, եւ որպէս երաժիշտ քաջալերեց ներկաները չբաւարարուելու գեղարուեստական յայտագրի կարճ ներկայացումներով, այլ խրախուսեց որ Մանսուրեանը եւ իր բանաստեղծական ոգին ըմբոշխնելու համար կրկին եւ կրկին ունկնդրել իւրաքանչիւր կտոր, մինչեւ երաժշտութիւնը հասկցած ըլլալու գոհունակութեան արտայայտութիւնը կարենան ունենալ եւ վայելել։

Վերջին գեղարուեստական քաղուածքը Տիար Տիգրան Մանսուրեանի յօրինած եւ եղանակաւորած, Հայոց Ցեղասպանութեան 100ամեակին նուիրուած “Ռեքուիէմ” գործէն հատուած մըն էր, որ առաջին անգամ ըլլալով համաշխարհային ներկայացում ունեցաւ Գերմանիոյ մէջ, Պեռլինի երգչախումբի եւ Միւնիխի սենեկային նուագախումբի կատարողութեամբ։

Ներկայացումի աւարտին, Առաջնորդ Սրբազան Հայրը խօսք առնելով, իր գնահատանքը փոխանցեց բոլոր ներկաներուն, Մշակութային Դաստիարակչական Յանձնախումբին եւ բանախօսներուն ու ի մասնաւորի երեկոն իր ներկայութեամբ հարստացնող Տիար Տիգրան Մանսուրեանին։ “Ստեփանոս Աստուծոյ շնորհքներով եւ զօրութեամբ լեցուն մարդ մըն էր, որ ժողովուրդին մէջ մեծամեծ հրաշքներ եւ նշաններ կը կատարէր” (Գրծ. Առք. 6.8) խօսքերով, Տիար Մանսուրեանը նմանցուց Ս. Ստեփանոս Սարկաւագին, որպէս տաղանդաւոր, շնորհքներով լի, զօրեղ ոգիով անձ մը, որ Սուրբին նման իր ժողովուրդին ու նաեւ օտարներուն մէջ հրաշալի ստեղծագործութիւններով ու երաժշտական քաղցրաճաշակ եղանակներով, ազգանուէր ու Աստուածահաճոյ գործեր կը կատարէ։ Տիգրան Մանսուրեանի համեստութեան եւ հեզութեան մասին անձնական տպաւորութիւնները յայտնելէ ետք, Ս. Ստեփանոսին համար գրուած “Յորովայնէ ընտրեալ Ս. Ստեփանոս” ժամամուտի բառերը նշելով շեշտեց, թէ Տիար Մանսուրեան եւս Աստուածային նախախնամութեամբ որովայնէ ընտրուած մշակ մըն է, որովհետեւ իրեն նման ընտրեալ մարդիկ միայն կրնան այսպիսի շնորհք ունենալ եւ երաժշտահան ըլլալ։ Ապա, առողջութեան ու արեւշատութեան ջերմ մաղթանքներ ըրաւ, Աստուծոյ շնորհքը հայցելով օրհնեց զինք ու իր ամբողջ ընտանիքը։

Ապա Սրբազան Հայրը յայտնեց, թէ իր ու Ազգային Վարչութեան խնդրանքին ընդառաջելով Մեծի Տանն Կիլիկիոյ Կաթողիկոս Ն.Ս.Օ.Տ.Տ. Արամ Ա. Կաթողիկոս գնահատանքի ու շնորհաւորանքի Սրբատառ կոնդակ շնորհած է մեծարեալին, որով Նորին Սուրբ Օծութիւնը “Ս. Մեսրոպ Մաշտոց” շքանշանով կը պարգեւատրէ Տիգրան Մանսուրեանը։ Սրբատառ կոնդակի ընթերցումի աւարտին, Սրբազան Հայրը Կաթողիկոսարանիս Ս. Մեսրոպ Մաշտոց շքանշանով պարգեւատրեց Տիգրան Մանսուրեան Հայրենի տիտան, երաժշտագէտ ու երգահանը։

Յուզմունքի ու երախտագիտական խօսքերով, մեծարեալ Տիգրան Մանսուրեան իր շնորհակալութեան խօսքերը փոխանցեց Վեհափառ Հայրապետին, Առաջնորդ Սրբազան Հօր, Տիար Վաչէ Պարսումեանին, Տիկ. Թագուհի Արզումանեանին եւ հանդիսավար Դոկտ. Տիգրան Պապիկեանին։ Իրեն վերագրուած համեստութեան եւ խոնարհութեան մասին ակնարկելով, ըսաւ թէ “եթէ համեստ եմ, ինչո՞ւ իմ անձիս թոյլ տուած եմ զբաղուելու գործով մը, որոնցմով զբաղուած են Կոմիտաս Վարրդապետ եւ Պեթհովըն։ Բայց նաեւ եթէ այս մարդիկը զբաղուած են այս գործով, ուրեմն անշուշտ պէտք է համեստ ըլլամ”։

Յայտագիրը իր աւարտին հասաւ Սրբազան Հօր “Պահպանիչ” աղօթքով, որմէ ետք ներկաները առիթը ունեցան վաստակաշատ մեծարեալին հետ հանդիպելու ու շնորհաւորանքներ փոխանցելու։ Մշակութային Դաստիարակչական Յանձնախումբը ներկաներուն համար պատրաստած էր հիրասիրութեան սեղան մը։

Print Friendly, PDF & Email

ՎԵՐՋԻՆ ԼՈՒՐԵՐ

Ս. Խաչ Ծխական Համայնքի 100-Ամեակ, Մոնթեպելլօ

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Ազգային Առաջնորդարանէն քրիստոնէական ջերմագոյն սիրով, միաժամանակ ազգային արդար հպարտութեամբ կ՛ողջունենք Մոնթեպելլոյի Ս. Խաչ Մայր Տաճարի... [...]

Ուսումնական 2022-2023 Տարեշրջանի Վերամուտի Առիթով

ԱՌԱՋՆՈՐԴ ՍՐԲԱԶԱՆ ՀՕՐ ՕՐՀՆՈՒԹԵԱՆ ԽՕՍՔԸ Քրիստոնէական ջերմ սիրով եւ հայրական անհուն գորովով Ազգային Առաջնորդարանէն կ՛ողջունենք Ազգային վարժարաններու Խնամակալ մարմինը, Ուսումնական... [...]

ՊԱՏԿԵՐԱՍՓԻՒՌԻ ՅԱՅՏԱԳԻՐ

Sempetmber 25, 2022 Sempetmber 18, 2022